Ads by Google Ads by Google

Tala I Vaifanua

AIGA O LE PEPE - MAE'A FAIA TUI PUIPUIA O LE MENINGOCOCCAL

 

Ua fa'ailoa mai ua mae'a ona faia tui puipuia o sui uma o le aiga o le pepe lua masina le matua, lea sa ulufale mai ua gasegase i le Meningococcal, ma ua te'a fo'i i tua ua manuia, e mafuta ma si ona aiga i lenei vaitau fiafia o le tausaga toe taliu ai i Niu Sila.

 

O lea fa'ama'i o le Meningococcal o se fa'ama'i e pipisi mai se siama e mafai ona ulufale atu i lou tino ma fa'atama'ia ai le afuafu e ufitia ai lou faiai ma le maea ario o lou tuasivi, afai e le vave ona togafitia ina ia e malosi mai ai, e i'u lava ina maliu ai le tagata ua maua ai.

 

O le aufaigaluega a le Matagaluega o le Soifua Maloloina sa latou o'o atu i lea lotoifale ma faia uma tui puipuia o sui uma i lea aiga, ina ne'i i ai se tasi e afaina mai totonu o lea lotoifale ma fa'asolo mai ai le mamalu lautele i aiga tuaoi fa'apea ma le afio'aga.

 

O le galuega lena, sa mua'i faia lava a'o le'i o'o mai se tali maumaututu o le suesuega na lafo i fafo. O le taumafaiga lava e puipuia le atunu'u ma tagata uma mai lea fa'ama'i leaga. O le tama'ita'i o Margeret Sesepasara ma lana vaega fa'apitoa sa latou faia lea galuega lelei.

 

I le amataga o le vaiaso nei, ua o'o le atagaluega i a'oga mo le latou galuega fai. Ua taua'aoina tusi mo matua e aumai ai le latou fa'atagaga mo nei tui puipuia mo fanau  i le va o le 11 tausaga ma le 19 tausaga le matutua. O i latou na o le a faia uma tui puipuia.

 

Ua fa'asalalauina fo'i le vasega o A'oga e asiasia i lea aso ma lea aso i le tatou nusipepa nei, e amata mai a'oga tulaga muamua se'ia o'o i a'oga Maualuluga i le teritori, aoga a le Malo ma a'oga tumaoti uma lava.

 

Ua le gata ai iina, ae ua i ai sui o le DOH i le malae va'alele i Tafuna, ae maise o le Uafu fo'i i Fagatogo, ina ia mataituina pasese femalaga'i, pe ua mae'a faia tui nei pe leai. Afai e le'i faia e muamua lava tui loa i le taimi lea fa'ato'a ulufale pe ulufalfo atu ma Amerika Samoa.

 

Ua fa'ailoa i se lipoti a le tama'ita'i o Sesepasara ma lana vaega o lo'o sofa'ia lea itu o le galuega, "O le matua sapaia lava e matua o lenei galuega ua faia ae le'i lutia i tatou i ni faigata ona o le le togafitia o fanau a le atunu'u."

 

"Ua vala'au mai nisi po'o a fea o le a faia ai tui puipuia o latou fanau, o lea lava e lei o'o mai ni pepa e sainia atu. O nisi ua vala'au i Ofisa o a'oga a latou fanau ma fa'ailoa i ai le latou naunau e faia tui o latou fanau, ia faia loa ua mae'a na aumaia lana fa'atagaga lea ua fa'aleo mai."

 

Fa'afetaia le atunu'u, ona o le faautagia fo'i o lenei vala'au alofa, ia malu puipuia lava le tatou atunu'u mai le tele o fa'ama'i ua lutia ai i tatou, ae ia mau fa'atuatuaina pea le tatou matagaluega o le Soifua Maloloina, o lo'o faia lava le latou tautua.

 

I le taimi nei, ua avatua e matua latou fanau i falema'i tua e faia ai latou tui puipuia mai le Meningococcal.

 

LEAI NI FANAU A'OGA E TAU'AVEA KOSI TAU MATATA ESEESE I IUNIVESITE

 

Ua fa'ailoa mai e leai lava se tasi o le vasega fa'ai'uaso a le Kolisi Tu'ufa'atasi na mae'a atu nei le latou fa'au'uga na fa'aaogaina le avanoa na ofo ane mo so'o se tasi e fia fa'aauau lana kosi fa'amatata eseese i Iunivesite i fafo.

 

Peita'i, o lea lava se mana'oga tupito o lo'o i ai a le Matagaluega o A'oga ma le Malo fo'i ina ia maua nisi o fanau talavou e fiafia e tau'avea kosi nei o matata eseese i le isi la'asaga o a'oa'oga mo fa'ailoga maualuluga atu ma fa'aleleia atili ai nei tautua i totonu o le atunu'u ma le malo.

 

Na fa'alauiloa le fuafuaga a le Malo e fesoasoani ai i le totogia o a'oga i le tulaga tau le sikolasipi e ofo atu fa'apea fo'i ma nogatupe e totogia ai le pili a'o a'oga i se Iunivesite o le a talia ai talosaga a nisi e manana'o i lea avanoa, ma sa fa'assalalauina fa'alaua'itele lava lea fesoasoani i le masina o Tesema 2018 a'o loma le fa'au'uga na te'a nei.

 

O lea sikolasipi na ofo mai e le Malo mo i latou e fia tau'avea nei kosi e $2,000 i le afa tausaga mo le totogia o vasega i le ASCC mo le tausaga e tasi, o se ofo na fa'ato'a faia muamua lava lea i le vasega na fa'au'u i le masina ua te'a.

 

O lea lava ofo na fa'amalosia e le Matagaluega o Aoga a le malo ina ia toe ulufale atu fanau a'oga i le ASCC ma fa'aaoga lea sikolasipi e tausailia ai tusi pasi maualuluga atu e afua i le amataga o lenei tausaga.

 

"O le tala moni lava, o le to'atele o inisinia o ta'avale ma masini eseese fa'apea fo'i ma fai ea malulu, o kamuta ma isi uma matata eseese, e le o nisi o le tatou atunu'u, ua matele ina fa'afaigaluega mai ai tagata mai fafo,” o se tala lea a le malo.

 

O le ala lea ua una'ia mai ai e le ASG Financial Aid lea fo'i fesoasoani e una'ia ai le fanau a Amerika Samoa ina ia malaga atu e sailia tusi pasi maualuluga nei, ma toe fa'alautele atli ai le atamai i nei kosi aoga i le fausia o se fa'avae lelei mo Amerika Samoa e ala i lona tulaga malolosi o ona fale, lelei o ona auala mo feoa'iga, ae maise ia lalelei ona talafatai.

 

Ua toe fa'ailoa mai, e faaauau pea ona toe ofoina mai lea sikolasipi i tausaga ta'itasi e le ASG Financial Aid ina ia lava tapena i ai le fanau talavou ma faia latou fa'aiuga tatau.

 

MAMATE MOA I SAMOA - LE'I MAILOA SE FA'AMA'I O MAFUA AI

 

I se lipoti mai le malo o Samoa o lo’o taua ai o le ma'i o le "Fowl Cholera" ua masalomia nei o lo'o ua maua ai lafumoa i Samoa ua mafua ai ona mamate nai meaola aoga i le atunu'u. Peita'i ua na'o ni nai masalosaloga lava, ae ua avatu i fafo suesuega ina ia fa'amautu mai po'o le a tonu lava le mafuaga ua mamate ai moa i Samoa.

 

Ua fa'ailoa i tala tusia fa'asalalau e faapea, "Na saunoa lava se tasi o saeanisi suesue a le Matagaluega o Fa'ato'aga a le Malo Tuto'atasi, o auga va'aia i moa ua mae'a mamate ma fa'ao'o mai i le matagaluega mo sailiga, e iloga mai lava o le Fowl Cholera lea e mamate ai, ae le mafai ona fa'amaonia se'iloga ua mae'a mai suesuega ua avatu i fafo ina ia tamau lea fa'ai'uga."

 

Ua fa'ailoa mai e le afaina ai tagata soifua ona o le mama'i o moa nei, ae le tatau ona faia ai ni mea taumafa i a'ano o moa ua mamate i lea fa'ama'i.

 

O le lafu moa fo'i ua tele moa ua mamate, e le tatau ona toe tausamia se moa mo se taimi umi ma e toe asiasi atu lava i ai le Matagaluega o Fa'ato'aga ma Lafumanu i lea lafu, e fa'amautu le lelei atoatoa o latou meaola mai le fa'ama'i pe afai e fa'amaonia mai le Cholera ua maua ai lau lafumanu.