Ads by Google Ads by Google

Tala I Vaifanua


O lo'o ua logologoa fo'i le taumafaiga a le tama'ita'i o Stephanie Floor mai Amerika Samoa i lana ulua'i pi'iga fa'atauva i le va o lana Iunivesite o a'o'oga ai ma lona uso Gannon University ma le au pi'i a le Nassau Community College. Ua manumalo o ia i lana paga 3-2. Malo le fa'amalosi i mea lelei, manaia fo'i ma lona la'ei Samoa Moni. Tagai tala tusia i Tala Vaifanua. [ata: foa'i]

PI'IGA I KOLISI MA IUNIVESITE - STEPHANIE FLOOR

 

Manumalo le tama'ita'i mai Amerika Samoa o Stephanie Floor i lana pi'iga mo lana Iunivesite o le Gannon University lea ua a'oga ai ma ta'alo pi'i ai, e fesoasoani i lana sikolasipi mo ana a'oga.

 

O le ta'amilosaga ua amatalia nei, ua fa'ailoa mai, o le manumalo a Floor, ua tulaga 9 ai nei Gannon University fa'atasi ma le i le fa'asologa a le NWCA National Duals.

 

O le manumalo o lea alo o le atunu'u ua fa'ato'a amata a'oga i Gannon Uiversity, na maua i lana pi'iga fa'atauva muamua lenei talu ona amatalia ona pi'i ma sa auai atu i ai lona uso o lo'o la'ua a'o'oga ma tau fai pi'i uma lava mo lea Iunivesite Danielle Floor.

 

E lua aso na faia ai nei tauvaga pi'iga ma o 'ai na malo ai Floor e 3-2 ma sa faia lea i le Louisville Exposition Center i Louisville, Kentucky i le aso 5 & 6 Ianuari, 2019.

 

O malo e lua na maua e Gannon o tama'ita'i uma mai le atumotu o le Pasefika. O Gabby Perez mai Moanalua, Hawaii lea sa ia mauaina le 10 - 0 tech.

 

Peita'i ona o lea fa'ato'a amata fo'i ona fa'atauva le tama'ita'i Samoa, e le o popole tele o ia aua e umi lona olaga a'oga i Gannon e mafai fo'i ona taumafai atili i lana lea ta'aloga ua fa'atauva ai. O lo'o ua fa'ailoa mai o lo'o koleni fo'i le tama'ita'i o Danielle FLoor fa'atasi ma lona uso, peita'i e le'i pi'i o ia i lenei ulua'i ta'amilosaga i le va o Gannon ma Nassau Community College.

 

Ua fa'atulaga mai ua tulaga 9 ai nei Gannon i le fa'asologa o 'au e 12 i le latou itu, ae ua fa'amauina fo'i le latou malo ia Nassau 'ai e 22-11.

 

O Ianuari 12, e fetaui ai 'au a le Gannon University ma Tiffin i Gannon ma e faia ta'aloga nei i le Hammermill Center, e amatalia i le itula e 4:00 i le afiafi e mafai ona maimoaina fo'i i le Uepesite:  http://www.nwcaonline.com/…/nwca-multi-divisional-nationa…/.

 

AISEA UA LE TALIA AI ISI FALEOLOA PEPA O MEA'AI AFA O GITA

 

Ua i ai nisi o e na maua le fa'amanuiaga o pepa e talafua ai mea'ai mo le $185 ona o afaina o le Afa o Gita, ua le taliaina e nisi o faleoloa sa o ane i ai.

 

O le fa'asalalauga sa faia, ma fa'atonuina ai i latou na agava'a i lea alamanuia, ina ia o ane i faleoloa o lo'o tala ai Food Stamp e tala ai fo'i latou pepa 'ai nei.

 

Ona o lea fa'afitauli ua feagai ma nei sui, ua toe fesiligia ai le ali'i fa'atonu o le DHSS, Muavaefa'atasi John Suisala i se mea e ao ina fai, po'o i ai fo'i se fa'afitauli i nei sui ua latou o ane me pepa 'ai nei a le Gita, ae le taliaina e faleoloa.

 

Ua tali mai le susuga le fa'atonu, a Muavaefaatasi John Suisala, "Masalo o faleoloa ia e le'i mae'a fa'afouina latou laisene e talia ai le Food Stamp ma le WIC fa'apea fo'i ma penefiti nei o le Gita. E aofia fo'i i lea laisene fa'ataga mo faleoloa le fa'atauina atu o le Sikaleti i tagata matutua, ae fa'asaina a'ia'i ai le fanau talavou."

 

"O faleoloa uma lava e fa'afouina laisene nei i le amataga o le tauasga, ma afai e le'i fa'atagaina e faia nei fa'atauga, e le ona o lau penefiti ua e agava'a ai ma ua taua'aoina ia te oe, ae ona e le'i agava'a le faleoloa mo lea ituaiga o fefa'ataua'iga, se'i vagana lava ua mae'a pasia atu i le matou Ofisa nei,” o se tala lea a Muavaefaatasi.

 

O pepa nei e talafua ai mea'ai mo i latou na i ai afaina i le afa o Gita e fa'ato'a fa'amuta le aoga ia Fepuari 18, 2019.

 

Ua lipotia mai e tusa ma le 51 faleoloa ua agavaa mo fefa'ataua'iga o nei polokalama e fa'atautaia e le DHSS, ma e i ai fo'i le vaega o le pasiga o nei laisene mo nei pisinisi e fa'atautaia e le Matagaluega o le Soifua Maloloina, fa'ato'a taua'ao aloa'ia ai ia i latou o latou laisene fa'aletausaga e fa'atautaia ai nei tautua.

 

O le lisi mo pisinisi uma ua mae'a ona agava'a mo fefa'ataua'iga nei ua lisia ma fa'apipi'i fo'i i le Ofisa o le Food Stamp ma le WIC i Utulei mo le silafia e tagata uma o faleoloa e aga'i atu i ai.

 

I lenei tausaga e 75 pisinisi ua talosaga atu mo se avanoa e tautua ai i le mamalu o le atunu'u e ala i nei fefaataua'iga, ua mae'a iloilo toto'a ma sailiilia fo'i o latou agava'a, peita'i e na'o le 51 lea ua mae'a pasia, ae 20 faleoloa o lo'o fa'aauau pea ona sailiilia lelei o latou agava'a, a pasia ona taua'ao aloaia lea o latou laisene mo nei fefa'ataua'iga i le atunu'u.

 

O faila uma o latou agava'a ma mea ua pasia ai e fa'ao'o uma lava i le laulau a le ali'i fa'atonu mo lana saini e fa'amausali atili ai le latou Konekarate mo fefa'ataua'iga i polokalama nei e fa'atautaia e le DHSS i tausaga ta'itasi. Peita'i o nisi ua i ai fo'i nisi o mea o misi i le latou talosaga ma ua fa'atonuina fo'i e toe taua'ao atu a'o le'i pasia le latou laisene e tautua ai.

 

Ua fa'ailoa mai, "E le o tamau se aofaiga o faleoloa e mafai ona pasia mo lenei tautua, peita'i afai lava ua le fia fa'aulu mai se talosaga a se tasi ona e le fia faia lea tautua, ua le taua'aoina lava sona laisene, o le to'atele o le lelei fo'i lea ona tautua o le atunu'u." O se toe fa'aopoopo mai lea a Suisala e tusa o faleoloa o lo'o tautuaina le atunu'u e ala i nei alamanuia.

 

TAPENA INITENETI SAOASAOA I SAMOA, TOGAFITIGA O GASEGASE

 

Mai le malo o Samoa, ua lipotia le saunoaga a le Palemia, Tuilaepa Sailele Malielegaoi ua mae'a faia le tautua a le Malo ina ia fa'aleleia atili ala o feso'ota'iga, ia saoasaoa ma ia gafatia ai ona fa'atino le tele o tiute fa'afoma'i a'o feso'ota'i ma foma'i fa'apitoa i fafo atu o Samoa.

 

"O le taumafaiga lea na ausulusulu ai Samoa ina ia tula'i mai le Tui Cable i sona lelei atoatoa e mafai ai ona fa'atautaia galuega a foma'i a'o maimoaina mai i fafo le galuega atoa ma matau mai ni mea e fa'aleleia i taotoga po'o togafitiga fo'i e fetufa'i ai foma'i i le taimi lava lea o tau togafiti se tasi, ua mae'a ma ua tatau loa ona suia i ai le fa'afoega o galuega vaifofo a le atunu'u,” o se tala lea a Tuilaepa.

 

O le faiva lava lenei sa mataituina lona si'itaga e ao ina i ai, pe a lelei le tatuuaina o le atunu'u e ala i le initeneti.

 

Ua le gata i lea, ae ua mae'a fo'i ona fa'aleleia atoa falema'i fa'aitumalo i le atunu'u ae maise lava le motu tele i Salafai, ina ia fa'aaogaina lea so'otaga e togafitia ai gasegase ae maise lava i e sulufa'i fa'afuase'ia atu i falema'i tua, ae o lo'o mamao tele mai le falema'i tele i Tuasivi ma Motootua fo'i i Upolu.

 

Ua fa'ailoa mai ua o'o i le $6miliona ST le tupe ua fa'aalu e Samoa e la'u atu ai gasegase mai lona malo e avatu mo togafitiga i Niu SIla.