VOAD - SOSAIETE VOLUNITIA GALULUE PE A MAE'A FA'ALAVELAVE MATUIA

O lo ua mae'a toe fa'aa'e le VOAD po'o le Sosaiete a Volunitia Galulue pe a mae'a Fa'alavelave Matuia i le atunu'u lea sa mua'i fa'atula'ia ina ua mae'a le 2009 Tsunami, ae le'i fa'atinoa e i latou se galuega talu mai lea taimi, se'ia o'o mai i lenei tausaga, ua mae'a ai ona feagai i tatou ma le Asiosio o Gita.

O lo'o a tatou mafuta pea ma Charles Craig o se tasi ua galue i le va o le FEMA, le vasega o Sosaiete Tumaoti e le fa'atupea e le Malo,  fa'atasi ai ma le Malo o Amerika Samoa, ina ia mautinoa, ua fa'agaoioi le VOAD i sona malosi'aga e mafai ai ona latou tali atu i mana'oga e le'i gafatia e le FEMA ona fesoasoani i ai, ona o nisi o aiaiga e le talafeagai ma le latou tautua mo ni aiga po'o Sosaiete Tumaoti i le vaitau na a'afia ai i tatou i le Asiosio o Gita.

O Graig o se so'oupu aloa'ia a le FEMA mo lea ituaiga o fa'amoemoe, ia galue mai le VOAD ua i le atunu'u e tali i mana'oga o tagata sa le maua se fesoasoani ona e le o ni tagata nu'u o Amerika Samoa, ma ua le maua e i latou se fesoasoani mo latou aiga, ona o lea vala o aiaiga tau fesoasoani toina mai e le FEMA.

"O fesoasoani nei o le a iloa ai e le Malo tele, le agaga o le atunu'u atoa e avatu se a'ao fesoasoani i ona lava tagata ona o le pagatia sa feagai ai ma i latou na a'afia tele i le fa'alavelave ua fa'ato'a mae'a fesoasoani mai ai le FEMA i le atunu'u atoa." O se tala lea a Craig.

Ua fa'atulaga fo'i le vaitaimi e mafai ona fa'amuta ai lenei talosaga, ma ua agava'a ai nai o tatou uso mai malo tuaoi o lo'o ua tatou mau ma soifua fa'atasi ai iinei.

18 SUI US ARMY RESERVE FA'AFAIGALUEGA I SASA'E TUTOTONU

Ua fa'ailoa mai e to'a 18 i latou o sui po'o tatou fanau ua mae'a ofo e tautua i le USArmy Reserve lea ua fa'amau lo latou vala'auina e tiute i Sasa'e Tutotonu ma e malaga ese atu i le vaiaso nei.

O le to'atele o lenei to'a 18 o tama'ita'i ma o i latou uma e aofia i le 962nd Quartermaster Company.

Na faia le sauniga fa'amavae ma i latou uma nei i le sauniga lotu fa'apitoa na faia lea i le Malumalu EFKAS i Nuuuli i le afiafi o le aso Sa na te'a nei ma sa matua fa'atumulia lea sauniga i le to'atele o aiga, o matua, ae maise o ta'ito'alua ma fanau a i latou o le a tu'ua le mafutaga mo tiute fai i na atunu'u o lo'o fa'aauau pea ona tutupu mai ai vesiga tau taua ma fevaevaea'iga.

O le afioga le Sui Kovana, Lemanu Peleti Mauga sa auai atu ai, ma ia tima'ia fo'i lenei vaega o fitafita tiute o le a malaga atu, "Ia outou tutumau i la outou auaunaga ma le le mata'uleagaina, ia outou mautinoa o loo nofo tatalo lo outou malo ma ona tagata mo lo outou saogalemu, ma o la outou tautua e taua tele, o lo ua fa'amoemoe ia te outou ma sailiiliga, le toe fa'afo'i mai o tino maliliu o tatou fitafita pele i o latou aiga o lo'o fa'atali atu ma le onosa'i atoa ma loto o'otia lava!"

O Sgt Seko sa tula'i ma fa'alauiloa le agatonu o le latou tautua e fa'atino i Sasa'e Tutotonu, "O le tiute e taua tele, aua e toe fa'atino aloa'ia ai sauniga mamalu o le ave'esea mai o toega o tino maliu a pelega uma a le Iunaite Setete na fasia ma amia o latou soifua i tafa o taua. E leai se isi e fa'atauagavale i le maualuga o le tautua ua i'u i le oti."

Ua fa'ailoa mai fo'i, o i latou o le a malaga atu, ua mae'a tapena ma saunia tomai fa'apitoa mo lea lava faiva, e ala i a'oa'oga fa'apitoa ua mae'a pasia e i latou. Ae le mapu ai fo'i le mata'alia lava i so'o se taimi a'o faia nei faiva, aua e le o mailoa lava le fili ma lona taulamalama e ui lava ina ua mae'a le taua i lea vaega o le lalolagi, ae o lo'o tele lava fa'aletonu o lo'o alia'i ma tutupu mai ai pea i atunu'u i sasa'e tutotonu.

O i latou o le a tu'ua le atunu'u ma pelega i le aso Lulu nei mo le valu masina, ua aofia ai:

Captain Ruth Faatiga, Staff Sgt Seko, Sgt Doris Pulu, Spc Leonetta Samuelu Solaita, Spc Daniel Saufoi, Spc Josephine Salipopo, Spc Sigago Samiu, Spc Nainiu Aliitaeao, Spc George Ioasa, Spc Betty Wells, Spc Mehittabell Aiono, Spc Mariah Leaumoana, Spc Daryleen Moi, Spc Sinaaletoaga Mauga, Spc Frank Mauigoa, Spc Jasmine Suakalio, PFC Roberta Puni ma PV2 Salamasina Letuli.

Ia manuia o outou faiva!

MAUA AVANOA MO KOSI ESEESE MAI VAEGA O LE FETERALE:

Ua maea fa'atulaga nei se taimi e fa'alauiloa ai avanoa eseese ua mafai ona silafia e le fanau a'oga maualuluga e ao ina tau'avea fa'atatau i ai latou Kosi i a'oa'oga maualuluga mo e fa'ailoga, ina ia agava'a ai i galuega e pulea mai e matagaluega eseese o le Malo Tele po'o le Feterale.

O le aso Lua, Iuni 12, 2018 o le a amatalia ai mai le 9:00 i le taeao - 4:00 i le afiafi, lea fa'amoemoe i le Potu Fono o le Ofisa o Va'ai Tau i Tafuna.

O le fa'alauiloaga o ituaiga o galuega eseese e mafai ona talosaga i ai le fanau a'oga maualuluga, fanau fo'i ua mae'a umia fa'ailoga maualuluga eseese, o le a folasia uma i lea aso mo le silafia e le fanau a Amerika Samoa, a'o tapena ma sauni mo a latou kosi e tau'avea i a'oga maualuluga i Kolisi ma Iunivesite i'inei po'o fafo fo'i.

E ese mai lea ua maua ai fo'i ma fa'alauiloaga o ituaiga galuega e mafai ona muamua talosaga i ai mo sina taimi e galue fa'amasani ai, a'o le aga atu e a'oga mo na ituaiga o tomai fa'apitoa, ma toe agava'a ai e faigaluega tumau ai i na ofisa o le Feterale.

Ua i ai fo'i le fa'alauiloaga mai le Kamupani o le Fale'aiga lauiloa o le McDonalds Restaurants i American Samoa, o le aso Tofi e taua'aoina aloaia ai fa'ailoga fa'asikolasipi a i latou i e ua agava'a ai. E amata mai i fa'ailoga taua mo le fanau a'oga maualuluga e aga'i atu i le tatou Kolisi Tu'ufa'atasi i Malaeimi, fa'apea fo'i fa'ailoga fa'asikolasipi mo le fanau a'oga i Kolisi ma Iunivesite i fafo atu o le tatou teritori.

O lea fa'amoemoe e faia i le 11:00 i le taeao i le fale'aiga o McDonalds i Fagatogo lava, ma o le a auai uma i latou ua mae'a taliaina a latou talosaga mo nei fa'atupega o a'oa'oga maualuluga mai le latou Kamupani, latou matua atoa ai ma i latou sa mua'i maua nei fa'amanuiaga e fesoasoani i latou pili a'oga, ae ua i'u mai ma le manuia le taumafaiga.