FOA'I KALAPU LIONA - VAILA'AU MA MEAFAIGALUEGA FA'AMAMA HOPE HOUSE

O le aso Tofi o le vaiaso ua te’a, sa faia ai le foa'i aoga tele a le Kalapu a le Liona i Pago Pago mo le Hope House i Fatuoaiga, o mea fa'amama uma e aofia ai mea faigaluega ma vaila'au eseese ina ia mautinoa ua fa'aaogaina tatau mo le fufuluina ia mama lelei lea nofoaga, mea e tapena ai latou mea taumafa, ae maise o faleta'ele ma potu uma o lea nofoaga, ina ia mama lelei.

Ua mautinoa e le Laulauatofi a le Kalapu o le Liona i Pago Pago, e mana'omia tele nei mea faigaluega ma vala'au fa'apitoa mo le fa'amamaina o le Nofoaga e tausia lelei ai tama ma tina matutua, ae maise o gasegase fa'apitoa lo latou tausiga lelei i taimi uma. O le ala fo'i lea o le fa'atutu o le foa'i i lea itu, ina ia fa'atautaia ai galuega o lenei tausaga i le tautuaina o e o nofoia lea nofoaga o fa'amoemoega i le Fatuoaiga.

Ina ia fa'ao'o atu lea foa'i, sa masi'i atu le Peresetene o le kalapu a le Liona, Christopher King, sa la'ua va'ava'alua fo'i ma le tama'ita'i sui Peresetene Lisa Tuato'o ma nisi o sui totino mo lea fa’amoemoe.

O le tama'ita'i pule o le Hope House, Beatrice Block Mageo sa ia fa'ailoa lona agaga fiafia ma le fa'afetai tele i lea foa'i taua, aua sa ia saunoa, "Ua iloa lelei e le Kalapu a le Liona, e ao ina matua'i fa'amamaina lelei lenei nofoaga ona o le tausiga fa'apitoa o gasegase fa'apea ma Matua matutua o lo'o matou gafa ma le tausiga i le Hope House nei, fa'afetai tausoa mai i lea fo'i vaega o le tautua, ma e le faigofie lava fo'i lea itu o le tiute fai, ia mautinoa lava ua mama ma lelei le tausiga o i latou o matou mafuta ea i le Nofoaga o Fa'amoemoega."

FALETUPE ANZ FA'ALETONU MASINI TALA TUPE MA MASINI I FALEOLOA

Na fa'ailoa mai se tala a le pulega e tusa o le fa'aletonu i a latou masini tala tupe ATM ma masini fo'i e fa'aaoga ai Cards mo fa'atauga i faleoloa, i le aso Faraile talu ai.

Ua fesiligia fo'i e le tatou nusipepa ma isi sui fa'asalalau se tala mai le pulega, aua ua matua fa'atumulia le vasega o Emeli ma fa'amatalaga i luga o feso'ota'iga i le Facebook ona o lea fa'aletonu i a latou tautua mo le lautele.

Ona e le'i mamao atu fo'i ni tausaga sa tupu muamua ai lenei ituaiga o fa'aletonu, peita'i na toe fa'aleleia ma ua fai fo'i sina umi o aluga lelei mea uma, e i ai lava lape o nei ituaiga o tautua, e le matua sa'o atoatoa i taimi uma mea e faia e le tagata soifua.

Na fa'alauiloa mai se fa'aletonu ua motusia ai lea auaunaga aoga tele ma le vave mo tagata uma o teuina a latou tupe i lea faletupe.

O le tama'ita'i Pule sili o le faletupe ANZ Amerika Samoa Bank, Tasi Scanlon, sa ia fa'ailoa i le atunu'u le motusia lea o le tautua ona o nisi o feso'ota'iga taua i le latou polokalama o fa'amaumauga i luga o latou masini. Na toe fa'aauau lava le tautua ina ua toe fa'aleleia lea so'otaga, peita'i e ao lava ina tape le polokalama atoa ina ne'i avea lea ma mea e gaoia ai fa'amaumauga e se tasi o lo'o matauina mai le gaoioiga o tatou galuega tau teugatupe ma tausitusi.

FA'AAUAU LE PA'U O LE TAU SUAU'U MA OLOA TAU SUAU'U

Ua amata le tausaga fou 2019 ma se amataga lelei i le pa'u fo'i o tau o le suau'u ma oloa uma tau suau'u, ma o se mea lelei fo'i mo le mamalu lautele.

O le tau ua mae'a fa'atulaga mo le suau'u ma oloa tau suau'u ua fa'aitiitia ai le tau o le Kesi i le isi 12sene i le Kalone. O le kiso ua fa'aitiitia i le isi 6sene i le kalone, e aofia fa'atasi ai le kiso mo ta'avale i le alatele ma va'a i feoa'iga i le sami, ma afi moli tetele.

Fa'ailoa mai e le Pulega o le Suau'u a le malo "O le tau ua pa'u nei i ai le Suauu ma Oloa tau Suauu i lenei vaitau o le tausaga, o se tau pito i maulalo lea ua fa'amauina i lenei kuata lona tolu o le lua tausaga ua te'a 2017. Ua i ai fo'i ma le popolega i le lalolagi atoa i kamupani o sapalaia mai le suau, ua vave tele ma so'ona fa'atau mai le suau'u i lenei vaitau, ae i'u ai ina vave uma fo'i le suau'u latou o pamu a'e."

Peitai ua fa'aalia fo'i e le susuga Sione Kava, i le Ofisa Pulega o le Suau'u i Amerika Samoa, "Ua fiafia fo'i e amatalia lenei tausaga i se tau ua ofoina atu e pa'u mo le lautele, e fesoasoani fo'i i le tele o aiga e ala i le tau o feoa'iga, e amata ai lenei fo'i tausaga fou."

FA'AUTAGIA MATAGI MALOLOSI MA LOLOGA I LE ATU SAMOA

E afua mai le Aso To'ona'i i le aoauli ua te’a ona fa'alauiloa mai se va'aiga louloua ma le timuga i le Atu Samoa, ma ua lapata'ia fo'i le vasega o va'a la'iti i malaga i le va o motu o Samoa fa'apea ma motu tuaoi e tulata mai i le Atu Samoa.

E le'i mamao lena fa'asalalauga mai le tatou Ofisa o Va'ai Tau i Tafuna, ae soso'o mai ma le isi latou tala o le tau, ua fa'ailoa mai ai le tetele o timuga o le a lofia ai le atunu'u i tafega ma lologa, ae maise ia nofouta fo'i ina nei tutupu ai ma ni sologa i vaega o le atunu'u e maualuluga o atumauga.

Ua fa'ailoa mai o le motu tele o Savaii o le atu Samoa ua latalata ma ua mae'a a'afia vave i latou i le malolosi o matagi ona e o le fetaula'iga o aupeau o ao pouli o timuga mamafa ua i le saute i sisifo ma ua foliga mai o lo'o aga'i atu ese atu mai Savaii.

Ua fa'atulaga e mou ese atu lea mai le teritori i le aso Gafua peita'i e i ai lava ni la'au o le a toulu ma ni mea totino fo'i e ono fa'aleagaina pea afai e oso fa'ata'uta'u mai le malosi o nei savili i lea taimi ma lea taimi. Ua taofia nei fo'i feoa'iga i va'a laiti ua aofia fa'atasi ai va'a fagota ma va'a la'ua pasese i le va o motu laiti.

Ua lapata'ia mai fo'i le atunu'u talu mai le 7:00 o le afiafi o le aso To'ona'i, ona o le a tele lologa i le atunu'u ona o timuga. Ua tula'i mai fo'i le tau o le aso ananafi, e amata mai lava i le timuga, ma ua fa'apena ona fa'aauau le fa'aaupouli o le motu atoa i Tutuila.