"IA FAI IA MAE'A LE TATOU FALEMA'I - POLOKETI AOGA MO TAGATA UMA!"

E fa'atauva'a lau silasila i le tagata, ae le fa'atauva'a galuega o lo'o ia naunau e fa'atino ona o le soifua ma ola a'e i Amerika Samoa, ua iloga mea o lo'o tatou mana'omia, ma ua silisili lava ona mana'omia e fa'aumiumi ai mafutaga ma pelega i lenei olaga.

Le susuga le Faifeau, a'o le Fitafita Tuai o le alo lava o Amerika Samoa, ua toe taliu mai ma le fa'amoemoe mauauga, e fia fa'aaoga aso o totoe ma le tomai ua maua, a'o se taumafaiga fo'i ia au, e tautua ai ona tagatanu'u ma lona malo.

O Bishop Vaifanua Mulitauaopele, o se tasi sa matua mafuli e fa'afeso'otaia tautua eseese tau soifua maloloina ina ia asiasi mai i lo tatou atunu'u ma faia talavai e le totogia, ia fa'amaumau gasegase o fatuatia ai le atunu'u, ina ia taumafai e fa'atuina se isi falema’i i le atunu’u.

Fa'afetai i le sao o lea fo'i alo ole atunu'u ua iloga lana tautua. E le'i galo fo'i ia te ia lona Atua aua sa matua ia tausailia ona tusi fa'a Faife'au e aoga ai mo le to'atele o fitafita ua a'afia tumau o latou mafaufau ona o taua ma fevaevaea'iga sa lotolotoi ai i latou i le tau soloia o se vaifofo mo le nofo vevesi ma le tausiga o le filemu.

E to'atele i latou ua avea ma fitafita tuai, ua latou fa'amatala ma toe tau manatu i aso o le tautua a'o talavou, peita'i i lea lava sui, sa ia fa'ailoa i lana tala mai ina ua fesiligia, "O lea se vaega o lo'u olaga, ua ou taumafai lava ina ia galo ma le toe tepa i ai."

Ina ua litaea mai o ia mai le Vaega Au, sa ia taumafai loa e suesue atili i le Tusi Pa'ia ma ua fa'amanuiaina. Ua avea fo'i ma to'omaga ia te ia, e toe fa'atonutonu ai lona ola ina ua mae'a le Militeri.

O lo'o sapaia lana poloketi e le Sosaiete a Tama o Amerika Samoa, o i latou uma o totino o lea Sosaiete, o Faife'au mai Ekalesia eseese i le atunu'u. O lona toe i ai iinei, sa taumafai pea ina ia fa'atuina le Hope Ministries Hospital ma fa'amae'a uma pepa e tatau ona sainia ma pasia mai e le Malo, aua le fa'amoemoe lelei.

Na tu'ua e ia le atunu'u ina ia fa'atasi ma le tina o Eva Mulitauaopele ma le fanau i South Carolina ona toe taliu mai lea amatalia galuega fa'atula'ia o lea Poloketi.

Peita'i, ua fa'ailoa mai le tala fa'avauvau, ua maliu o ia i lea a'ai, ona o lona fatu. Ua mae'a fo'i lana sa taumafai i ai, ma ua ia fa'ailoa, o le susuga le Fa'atonu o le Matagaluega o Fefa'atua'iga, Keniseli Lafaele, o lo ua ia sapaia malosi le fa'amae'aina o pepa e tatau ona mua'i pasia ai le fa'atuina o le galuega.

Sa galulue fa'atasi fo'i Mulitauaopele ma Utu Abe Malae i lenei fa'amoemoe mai lona amataga lava. Peita'i, ua le i'u le galuega, ae ua tu'ua uma e i la'ua i tatou. Na fa'ailoa e Lafaele, sa mua'i asiasi atu Bishop Vaifanua ia te ia a'o le'i malaga ese atu, ma ia taua'aoina atu ia te ia se tusi faitau, o lo'o tima'ia ai le "Taua o le Ola i se olaga e mautinoa ona e maua ai le Ola e fa'avavau!"

"O la'u toe va'ai lea ia te ia, ma o se meaalofa fo'i ua mae'a ona ou faitauina, ua fa'ailoa mai ai fo'i ia te a'u le fe'au taua, e ao ina fa'amae'a le galuega o lo'o foufou e fa'atuina,” o se tala lea a Lafaele. “Ua malaga uma nei sui sa taumafai ia tula'i lenei falema'i, peita'i, o le toega o le galuega fa'atino, e ao ina faia e i tatou o lo'o soifua pea.”

Fa'afetai i le tautua a lea tama o le atunu'u, e ui ina mamao mai le nofoaga e alaala ai lona aiga atoa, ae le tu'ua e ia Amerika Samoa i le tele o taimi, e nofonofo lava iinei ma tautua ai. Ua tatou iloa lona naunauta'iga, ua tatou iloa lana taumafaiga, fa'afetai i lou sogasoga i mea e lelei ai le tautua a le Malo mo ona tagata, ae maise o lou silasila ia i latou o lo'o mana'omia ona togafitia lelei o latou gasegase.

Fa'amaise le Atua i le faletua ia Eva Mulitauaopele ma le fanau. O se tasi o ona alo tama'ita'i o ia lea o le foma'i o mata, ma o lo'o fuafua fo'i lea tama'ita'i foma'i e avea lana auaunaga lea ma se tasi o tautua e ofoina mai i le Hope Ministries Hospital pe a mae'a fa'atuina.

6 POTUAOGA LEONE HIGH OSOFA'IA I LE VAIASO O LE TAUSAGA FOU

O se tasi o soligatulafono ua fa'amauina i le aso Malolo o le Tausaga Fou, o le osofa'ia lea o le ono potu a'oga o le A'oga Maualuga a Leone High.

O le ali'i faia'oga o Tautasi Falana'i Jr, faia'oga mo le Science, sa ia fa'ailoa o lona potu a'oga le tasi o potu e ono ua mae'a lipotia ua fa'aleagaina mai osofa'iga e le a'u talepe fale sa faia lea galuega le alofa.

Sa i ai lea faia'oga i lona potu ua mae'a lelei ona tapena ma fa'amama, peita'i o le mea ua toe i ai nei, ua foliga mai e ao ina toe faia atoa le galuega fa'amama i ai.

"O mea uma ua mae'a fa'avasega ma teu lelei i pusa tetele nei, ae sau le tagata osofa'i mai nei pusa ua mae'a lelei fa'aleaga, la'u mai i fafo ma fa'asalalau solo i luga o le foloa,” o se tala fa'anoanoa lea a lea faia'oga tapenapena i mea e lelei ai ana galuega mo le fanau a'oga.

O isi potu a'oga fa'asaeanisi ma potu a'oga o le Igilisi ma le potu a'oga o le Numera lea sa matua fa'aleagaina fa'apena fo'i.

Ua mae'a fa'asalalauina uma i luga o le Facebook mea na fa'aleagaina o nei potu a'oga uma. Ua avea fo'i ma mea ua va'ai uma ane i ai le pulega o le aoga ma isi uma o fanau a'oga ma faia'oga e le'i osofa'ia o latou potu a'oga.

Ua mae'a fo'i ona o'o ane i ai le vasega o Leoleo ma ua latou fa'amauina mea uma ua fa'aleaga.

Saunoa Falana'i,"O nai aiga tutuaoi mai i le a'oga, sa latou va'aia potu a'oga ua ola moli, ona o mai ai lea e asi mai, peita'i ua maua mai le faitoto'a o lo'o matala teisi, ae ua salalau solo mea uma sa i totonu o pusa nei i luga o le fola o le potu a'oga.”

O lenei fo'i potu a'oga a le susuga Falanai na afaina fo'i i le isi osofa'iga muamua i le tausaga ua mae'a atu.

Ua tau fa'avasegaina nei mea uma sa i potu a'oga nei e ono ua osofa'ia, ma ua taumafai ona fa'amautu po'o a mea ua misia o mea totino sa i ai. Peita'i o loo i ai pea lava masini Komipiuta i nei potu. Afai o i ai nisi o lo'o maua ai se molimau ia i latou na faia nei mea, alofa fa'ailoa ane i lea ali'i faia'oga ina ia mafai ona fa'auia atu i leoleo mo se suesuega.

LUTIA FITI I LE "AFA O MONA"- SUIA MAI FA'ASALALAUGA O MATAGI MALOLOSI

O le aso Lulu na lipotia ai le lutia i le atunu’u o Fiti i le afa ua fa'alauiloa o "Mona" talu mai ona suia le fa'asalalauga sa i ai o matagi malolosi mai le Fale Va'ai Tau a lea malo o le Pasefika.

I le aoauli o le aso Lulu o le afa o Mona sa taoto tusa ma le 860 maila le mamao mai Tutuila.

Ua lisia e le Malo o Fiti le afa o Mona, e tauau o se afa numera 2 i lona fa'atulagaga o Afa malolosi. Ua foliga mai fo'i i latou fa'amaumauga e tauau e gata ai lava i le numera 2 lona malosi pe a tu'ua i latou i Fiti.

Ua mae'a lutia lava Fiti i le tetele o timuga ma matagi malolosi ae fa'ato'a si'itia loa le faitauga i le afa ina ua fa'atetele lava le malosi o matagi i le 40-55 maila i le itula.