ITULA MA ASO E TATALA AI OFISA KONESULA O SAMOA I FAGATOGO:

Ua fa'asalalauina mai ina ia mautinoa ua silafia e le mamalu fegasoloa'i taimi o le auaunaga a le Ofisa o le Konesula o Samoa lea e i Fagatogo. Ona o lenei vaitau o aso fiafia e tapunia ai lea Ofisa i le itula e 12:00 i le aoauli mai le aso 24 Tesema, 2018 ae fa'ato'a toe tatala ia Ianuari 3, 2019.

O lenei vaiaso atoa o le a tapunua ai lea ofisa ua fa'alauiloa vave atu i le mamalu fegasoloa'i, afai o oe ua mae'a i ai lau pepa malaga i va'alele mo lau faigamalaga i Samoa, ua tatau nei ona e susu ane i lea Ofisa e totogi ai lou pemita mo lau malaga i Samoa mo i latou uma o e na soifua a'e i Amerika Samoa.

Peita'i afai e i ai se tasi e toe fa'aosofia lana malaga fa'afuase'i i Samoa i nei taimi ua tapunia ai le Ofisa o le Konesula, e mafai ona talosagaina lou pemita e le Samoa Airways po'o le Talofa Airways ma fa'ataga ai lou ulufale atu i Samoa ae totogia ai lou pemita i le Malae Va'alele e te ulufale atu ai i Samoa.

TOE FO'I MAI TAMAITA'I SA E GALULUE I AMERIKA SAMOA:

O lo ua toe fa'atulaga nei le toe taliu mai o Tama'ita'i Sa mai le Sosaiete a le Sisters of Mary ina ia toe ulufale mai e tautua i le Puleaga Samoa Pago Pago e ala i tiute tau faia'oga.

O le vasega o Tamaita'i Sa sa avea ma faia'oga i a'oga uma a le Ekalesia Katoliko mai lona amataga fa'atutu e silia ma le 100 tausaga talu ai, peita'i na faia fo'i se fa'ai'uga ina ia motusia le latou auaunaga iinei ae fa'aaogaina faia'oga e fa'afaigaluega mai lava i le tatou nei malo.

O le vasega o Tama'ita'i Sa nei sa latou fa'atautaia mai lava le a'oga a le St Theresa ma le St Francis Elementaries, peita'i ua suia nei le igoa o le St Francis i le Marist St Francis, ina ua tu'ufa'atasia ma le Marist Brotters i Atuu lava, ma aluga ai fa'apea i lenei vaitausaga.

O le afioga Epikopo Peter Brown sa ia fa'ailoa lona agaga fa'afetai ma fa'afeiloa'ia ma le fiafia le vasega o Tama'ita'i Sa ma ia fa'ailoa ai, "O se fiafiaga tele i le pulega ma le Aufaigaluega atoa i le Puleaga Samoa Pago Pago ina ua toe taliu mai Tama'ita'i Sa o le Society of Mary e fesoasoani atili fo'i i faia'oga mo le a'oa'oina o alo o Amerika Samoa nei. Ua atoa nei le 20 tausaga talu ona tu'ua e i latou le tatou Pule'aga."

"Ona o lenei vaitau o le Kerisimasi, ua iloga ai, o se meaalofa sili lea ua maua e le Pule'aga o le toe o'o mai o nei Tama'ita'i Sa galulue mo le galuega a le Atua i lenei itu o le vai. O Sister Palepa ma Sister Soana o nisi ua iloga lo la'ua tomai i le faiva tau Faia'oga fa'atasi ai ma a'oa'oga fa'a-Tusi Pa'ia e aoga mo le fanau i lo latou tuputupu a'e o nisi o fanau Kerisiano."

"Ma le agaga fiafia lava, e fa'afeiloa'ia ai oulua ma le fa'afetai ona o lua tau'au ua ofo mai mo le galuega i Amerika Samoa."

$123,000 MO LE DOH - TAUSIA LELEI O TINA MA FANAUITI

Fa'afetaia le Faipule i le Konekeresi Aumua Amata ona o le $123,000 mai le fetarale mo le Matagaluega o le Soifua Maloloina (DOH) mo galuega e fa'aautu i le Tausiga lelei o Tina ma Fanauiti o le atunu'u.

Na saunoa o ia, "O tupe nei mai le feterale mo polokalama fa'apitoa ua atofa mo le tautuaina o Tina ma fanauiti, pe itiiti pe tele, ae a tu'ufa'atasia nei tinoitupe ua talosagaina ma ua agava'a ai i tatou, fa'afetai e i'u lava ina lava ma totoe e faia ai suiga lelei i le tausiga o le soifua maloloina o fanau aua le lumana'i o le tatou atunu'u.”

Ua talia fo'i ma le fa'afetai lea vaega tupe e le susuga le Fa'atonu o le DOH, Motusa Tuileama Nua ma le aufaigaluega lea tala fiafia.

Fa'ailoa le agaga fa'afetai o Amata ona o le galulue malosi o Motusa ma le aufaigaluega i tama'ita'i foma'i ma i latou uma o lo'o i lea itu o le tautua, i le galulue punoua'i ma faia fa'amaumauga uma e aoga mo le toe talosagaina o lenei fesoasoani tupe e fa'aauau ai galuega. Sa ia fa’afetaia foi le fetarale mo lea tupe.

FA'ASALA E LE NU'U I SAMOA ONA TAGATANU'U ONA O FA'AUPUGA I LE FACEBOOK

Ua lalamua nei le afio'aga o Lauli'i i Samoa i lo latou fono ma soalaupule ai se fa'asalaga o latou tagatanu'u o lo'o nonofo mamao mai, ae faia mai faitioga ma fa'aupuga masoa i tagata o lo'o aofia i le Pulega a Ali'i ma Faipule o Lauli'i.

E ui ina o nonofo mamao mai nei fanau a le afio'aga, ae o lo'o i ai fo'i o latou matua ma aiga o lo'o nonofo pea i Lauli'i ma fai nu'u, o i latou na e fa'atutu i ai le sala lea, pe afai e le totogia mai e a latou fanau o fa'asalaina a latou sala e $5,000 - Tala Samoa.

Ua le tasi se aiga ua mataituina o lo'o faia fa'amatalaga fa'asea ma le masoa fo'i i luga o le Facebook, ma o i latou uma na ua tofusia ma le $5,000 e totogia i le pulega a le nu’u.

O le Matai o lo'o faia aga'i i ai latou fa'asea o se tasi o Matai taua o le afio'aga, ma ua mae'a fa'amaonia mai fo'i e le susuga le Pulenu'u, Fuamatu Samoa Oloaga Samuelu lea tulaga ua maea faia, ma sa fa'amautu lea fa'aiuga i le fono a le nu'u na faia i le vaiaso ua te'a.

O se tala mai a le Pulenu'u, "Ina ua fa'afofogaina i le fonotaga le tele o fa'amatalaga lalafo e fa'asaga i lea Matai taua o le afio'aga, fa'atasi ai ma le tele o upu masoa ua lalafo ai fo'i, ma fa'asea i lea fo'i matai, ona faia ai lea o le fa'aiuga a le nu'u o le a fa'asala aiga o i latou nei, ma na pasia lava i lea fonotaga lea tulaga i aiga nei e lima."

"I le manatu fa'aalia o alii ma faipule, ua faia e nei sui fa'amatalaga e fa'amaina ai le nu'u i luga o nei ala o feso'ota'iga lautele. Ua mamasagia ai ma le suafa o lea fo'i matai taua o le afio'aga, ae o i latou o nonofo i fafo, e ao ina latou iloa lelei, e le o toe tautua i latou, ua motu atu ma le taula, ua fai lava lo latou sa'olotoga i fafo, ua le tatau fo'i ona toe fa'asea mai i le afio'aga na soifua a'e ai."

I se toe tala mai a le ali'i pulenu'u, "O le mea e ao ina iloa lelei e tatou tagata o lo'o ua alaala i fafo, manatu mai i nai o latou aiga o lo'o nonofo pea i aiga i o outou afioaga na ola a'e ai, aua e faia e i latou nei tu ma aga le taupulea ae selefutia ai nai o latou pelega i nu'u ma afio'aga o alaala ai. O nisi fo'i ua latou faia fa'amatalaga e fa'atupu vevesi i le va o aiga, o le a faia fo'i fa'asalaga e tatau ma na ituaiga o fa'aupuga."

O se fa'ata'ita'iga lelei fo'i ua faia e Lauli'i i lenei mataupu, aua ua matauina pea lava le tele o fa'aupuga masoa e fa'aaogaina i luga o feso'ota'iga nei.