Ads by Google Ads by Google

Tala I Vaifanua


[ata: foa'i]

FAIMEAALOFA LE FAIGAMALO I LE HOPE HOUSE MA LE FALEPUIPUI

 

I lenei tausaga ua fa'aauau ona asiasi le Faigamalo i nofoaga o lo'o tausia fa'apitoa ai Tama ma Tina Matutua ae maise o fanau ua po'ia le soifua i gasegase tumau ma e fa'apitoa fo'i lo latou tausiga lelei, le nofoaga o fa'amoemoega po'o le Hope House i Fatuoaiga.

 

Na latou masii atu ma pesepese e fa'afiafia i latou uma o alaalata'i ai i lea nofoaga taua. O le Tina o le atunuu, Cynthia Malala Moliga ma le afioga le Lutena Kovana Lemanu Peleti Mauga sa auai fa'atasi ma le mamalu o nisi o le aufaigaluega ale Ofisa o le Kovana, fa'apea ma le aufaipese a le Matagaluega o le Alagamauia mo Tagata Lautele (DHSS).

 

O le lima ai lenei o tausaga o lo'o faia pea lenei asiasiga a le Faigamalo i lea nofoaga, ae maise ai fo'i o le Potu o Talavai a le Fanauiti i le Falemai o le LBJ i Fagaalu. O meaaalofa masani lava e tapena e le Tina o le atunu'u ma le aufaigaluega a le Ofisa o le Faigamalo, e avatu ai se fe'au taua mo i latou o lo'o mapuitiga ona o le apulu o tofaga ma le falaefu.

 

"A'o se matou pese ma se fa'asoa itiiti e fa'ao'o atu ai se fiafiaga i o outou loto, aua a fiafia le loto, o le vaila'au taua lea i le tiga o le tino ma le agaga fia mafuta i nai o outou aiga.” o nisi ia o upu na saunoa i ai Lemanu i le Hope House i le taeao o le aso Gafua.

 

Na auai fo'i le afioga Epikopo Peter Brown i lea taimi, ma na avea o ia ma sui o le Fatuoaiga ma le Pule'aga Samoa Pago Pago na te fa'afetaia ai le manatu atu o le Malo ae maise le faletua i le latou nofoaga i le tele o tausaga ma taimi e asiasi atu ai.

 

"Ua le tasi ae ua lasi taimi e fesoasoani mai ai le Tina o le atunu'u i lenei nofoaga, ma ua fa'apea fo'i le sapaia pea o i matou e le malo o Amerika Samoa, fa'afetai tele i le manatu mai, fa'afetai fo'i aua ua avea outou ma talitiga i e uma ua tausia fa'apitoa i le Hope House,” o se vaega lea o le tali fuaitau a Epikopo Brown.

 

E le na'o le asiga i lea nofoaga sa fa'atino e le faigamalo ae maise lava i le Tina o le atunu'u. Sa latou asia fo'i le Maota Gasegase i le Pediatric Ward i le vasega o fanauiti o lo'o fa'ataotolia ai, ma tufatufa atu a latou meaalofa. O le aso Gafua lea na fa'atino ai lea fa'amoemoe, ae o'o i le aso Lua o lenei lava vaiaso, asia loa le To'ese i Tafuna po'o le Territorial Correctional Facility.

 

Na toe avea lava fo'i le aufaipese a le DHSS ma aufaipese siufofoga malie latou te vi'ia vi'iga o le Atua i le sauniga mamalu, ma tatalaina ai faitoto'a o le Fale'ai mo le vasega o Pagota o lo'o tuli fa'asalaga i le To'ese i lea taeao.

 

$185.00/TAGATA AGAVAA O E NA A'AFIA I LE GITA

 

Ua foliga mai ua taunu'u Santa Claus i le Matagaluega o Alamanuia ma Tautua Lautele (DHSS) i le latou tufatufaga o le penefiti ua maua mo i latou na talosaga e fia maua le fesoasoani tau mea taumafa mai le Matagaluega o Fa’atoaga a le fetarale (USDA) mo i latou na afaina i le ‘afa o Gita.

 

E $500,000 mai le USDA mo lea fa’amoemoe ma ua fuafua e tufatufaina atu ia i latou e ala i pepa e talafua ai mea'ai, ma o se fa'amanuiaga lea mo le to'a 2,325 o tagata mai le 903 Aiga sa talosaga mo lea fesoasoani tau mea'ai.

 

O le fa'atupega lenei na mua'i fa'alauiloa e le afioga Kovana Lolo Moliga ia Setema 18, 2018 ma na fa'alauiloa fo'i la ma ona aiaiga e na o le tasi lava le avanoa mo i latou e talia a latou talosaga.

 

Fa'ailoa e le fa'atonusili o le Matagaluega o le DHSS, Muavaefa'atasi John E. Suisala, o le a amata tufatufaina nei fa'amanuiaga i le aso lenei, aso Faraile.

 

O i latou e agava’a mo nei penefiti, o i latou e maulalo le tamaoaiga, ae na fa'aleagaina fo'i a latou meatotino i le afa o Gita ia Fepuari i le tausaga 2018. O aiga fo'i e agava'a e ao ina matauina lo latou mana'omia e sili atu nai lo le to'atele o tatou aiga i le tatou malo.

 

O le aotelega o talosaga mo lea fesoasoani tau mea'ai e 7,359 tagata ta'ito'atasi mai le 1,937 aiga. O talosaga ua le mafai ona agava'a e to'a 5,034. E 3,963 talosaga ua le agava'a ona ua mae'a maua e i latou ni fesoasoani mai le FEMA. E to'a 402 talosaga ua le maua lenei fesoasoani ona o i latou o e ua mae'a maua le ASNAP - food stamp - ma le WIC. E to'a 298 talosaga ua le fa'amanuiaina ona o lo'o lava ma totoe o latou tupe maua fa'alemasina. E na'o le 83 i latou ua le fa'amanuiaina talosaga ona e le'i atoatoa ona fa'atutumu latou talosaga na fa'aulu.

 

O i latou ua agava’a, o le fa'asoa e ta'i $185, e na'o le fa'atasi fo'i ona maua.

 

Ona ua mae'a fa'alauiloa i laisene ua taua'aoina i faleoloa o lo'o tala ai le Food Stamp e mafai fo'i ona tala ai nei pepa mea’ai. O pepa fa'ailo po'o saini i faleoloa ua fa'alauiloa ai, "Food Stamps & Disaster Relief Food Assistance Program!" E na'o le 60 aso e mafai ai ona agava'a lau penefiti lenei e  talaina ai au mea'ai mai faleoloa ua i ai lea saini.

 

O lona uiga e ao ina fa'aaogaina lau penefiti lenei a'o le'i pasi le aso 19 Fepuari 2019.

 

Ua fa'ailoa mai fo'i ua mae'a taua'aoina i le sui o le aiga na talosaga o latou pepa fa'ailo e mafai ai ona tala nei penefiti mo ia ma nisi o lona aiga o lo'o agava'a uma.

 

"Ua iloga lava ona aoga lenei polokalama i nisi o aiga na talosaga, aua ua le gata ina agava'a matua, ae ua fa'asolo fo'i i le fanau e le o maua ni WIC. O lona uiga a tu'ufa'atasi nisi e to'a fa pe to'aono i le aiga, ua lava ma totoe le fa'asoa mo lenei vaitau i tulaga o le tausiga o le aiga atoa i meataumafa,” o se tala lea a Muavaefa’atasi.

 

Ua fa'aalia le agaga fa'afetai tele o le ali'i fa'atonu i le USDA i le taumafaiga o lenei penefiti ina ia maua tonu i lenei fo'i vaitau fiafia o le tausaga, e sili ai ona tele le mana'omia e le to'atele o aiga ua agava'a ai.

 

E le gata i lea ae o le tima'i fo'i mai le faigamalo a le afioga Kovana Lolo Moliga ma Lutena Peleti Mauga, ina ia mautinoa lava e mautu mai lea fa'amoemoe mo aiga e vaivai le tamaoaiga i le vaitau tonu lenei ia fa'afiafiaina le atunu'u.

 

Ua fa'atulaga ina ia amatalia le tufatufaga o nei penefiti i le itula e 8:00 i le taeao se'ia pa'ia le itula e 3:00 i le aoauli i aso atofaina - e fuafua i le mata'itusi amata o le fa'aiu o le sui atofa o aiga ta'itasi. O le aso lenei, aso Faraile e mo i latou i le A,B,C,D,E,F.

 

Fa’afesootai le DHSS/ASNAP mo isi fa’amatalaga i aso tonu e mafai ai ona piki lau penefit.