PASIA "MV LADY NAOMI" SUESUEGA A LE US COAST GUARD

I le aso Gafua o le vaiaso na te'a, na fa'ato'a toe tula'i mai ai le Lady Naomi mo sana ulua'i faigamala mo Samoa talu mai le taimi umi sa faia ai ona galuega lipea i le tatou Mea Toso Va'a i Satala.

Peita'i, na toe taofia lava mea uma ae tatau ona toe suesue auiliili e le US Coast Guard le agava'a o le Sa lea e faia ana faigamalaga i le va o Tutuila ma Upolu. I le taimi atoa na i ai le va'a i luga o le mea toso va'a, sa le asia ai e le US Coast Guard, peita'i ua fa'ailoa mai, "O le asiasiga lava lea e le faia i le mea toso va'a, ae fa'ato'a faia lava pe afai ua i ai se faaiuga  o le a toe malaga lea va'a ma sana pasese i Samoa poo se isi lava atunuu.

Ua fa'ailoa mai e 95 mea e ao ina sailiilia lelei ua mae'a fa'aleleia o lea va'a fa'ato'a alu ai i sana malaga ae maise ma pasese.

Ona o le pu'upu'u o le taimi ua fa'ataga ai le va'a mo lana ulua'i malaga ae le'i toe o'o lana pasese i le to'atele e masani ai, ua fa'atapula'a mai i le na'o le to'a 95. O se tasi o maga o tulafono tamau nei e 95 e le o usita'ia e le va'a, ona e le lava va'a fa'aola mo le lavea'ia o le 220 e masani ona ia malaga ma lea Sa i Samoa.

Ua fa'ailoa e Peter Te'o, Sui o le Kamupani o lo'o feagai ma malaga a le Lady Naomi  i Amerika Samoa nei, "O le toe siakiga lea o le Lady Naomi e le Coast Guard e lautogia ai mo lona fa'atagaga e malaga ai i Samoa ma toe fo'i mai. O lo'o i ai fo'i aiaiga e ao ina usita'ia e le Lady Naomi lava ia mo Samoa i le latou fo'i atu fo'i, aua e tatau ona malu puipuia lava le soifua o femalaga'i i lea Sa i vaiaso ta'itasi."

"O le tasi lava o suesuega masani o lea va'a la'u pasese i Samoa o le Lloyds of London, mo le soifua o le pasese ma auva'a o lo'o femalaga'i ai i lea sa." O se tala lea a Te'o.

Ma maea nei ma ua agavaa lea Sa mo malaga to'atele o lo'o olioli atu e la'u i Samoa aua o le to'atele ua mae'a totogia pasese e malaga ai i le malologa o galuega a le Kamupani a le StarKist Samoa.

FA'AMAVAE 'FOFOGAOSAMOA' RYAN ZINKE MAI LE FAILAUTUSI INITERIA

E tusa ai ma se tala fa'amaonia ua mae'a taua'aoina le tusi fa'amavae a le tofa Fofogaosamoa Ryan Zinke mai lona tofi o le Failautusi o le Initeria.

I le taimi nei, ona o le tele o suesuega o lo'o fa'atautaia ia te ia ma lona tula'i i lea tofiga, ae o lo'o tu'ua'ia o ia o lo'o i ai nisi ana fa'ai'uga e le talafeagai ai ma lona lea tofi, ua fa'ailoa ai e Zinke, "E sili ai ona ou tu'ua le tofi i le taimi nei."

O nei suesuega ma nisi o ana fa'ai'uga faia a'o avea ma Senatoa o Montana ma lona faletua o Lola Zinke ua faifai tetele pea. O sailiiliga nei e matuaina mai i sui o le vaega fa'aupufai a le Temokalasi, ma ua avea fo'i ma ala e fa'afaigata ai ona faia fa'aiuga a lea ta'ita'i.

Peita'i, e ui ina faia lea tele sailiiliga ia te ia ma ana fa'aiuga fai i ana pisinisi ma ona fanua fa'atau ma isi lava ona uiga fa'aalia, ae le'i fo'i ai Zinke i lona faia o le mea sili i le taumafaiga ina ia tineia le Mu tele sa sasao i se vaega i matu o le setete o Kalefonia.

O se tasi lava o aga a le ali'i Failautusi na lipotia e lana matagaluega, ona o le malaga fa'atasi o ia ma lona faletua o Lola i le ta'avale e tatau ona alu ai lava na'o ia. O se tasi o tulafono tamau a le Matagaluega o le Initeria, peita'i e solitu lava i le uiga fa'amiliteri o Zinke nei mea uma.

E ui ina le tele se taimi o Zinke ma Peresetene Trump e talanoa fa'atasi ai a'o va'aia e nisi, ae o le taumafaiga lea ina ia fa'amalosia le puipuiga ma tulafono fo'i ua suia mo Eleele Fa'asao ma Gataifale Fa'asao o le Malo Tele, sa gafatia lava e Zinke ona fa'amalosia suiga fou ua mae'a fa'ataoto mai e le faigamalo ua tula'i nei a le Iunaite Setete o Amerika.

I le taimi nei ua mae'a faia lana fa'ai'uga e ao ina fa'afilemu mea uma ma tula'i ese ai i lea tofiga. Sa ia fa'ailoa, "atonu ua sili ona fa'atuatuaina e nisi tala fatu ma masalosaloga ai lo le mea sa'o."

O se manatu fa'aalia o le Peresetene Trump, "E ui ina pu'upu'u le taimi na tautua ai Zinke i lea tofiga, ae ua iloga lana galuega na fa'atino e ala i le taumafaiga i maliliega tau le suau'u a le atunu'u ma le puipuiga fo'i o eleele ma gataifale fa'asao o le Malo tele. O se tautua ua fai ona 'ai, talu ona tula'i mai."

E ui ua tula'i ese o Zinke, ae sa ia faia se fa'atasiga tele mo ana uo uma ma sa vala'aulia fa'apitoa ai le tatou Sui i le Konekeresi ma se tasi o aumalaga mai Amerika Samoa i le vaiaso ua te'a. Na faia lea fiafia e i la'ua ma lona faletua. O se fiafia matagofie ma sa ia fa'ailoa fo'i i le tatou Faipule i Uosigitone, Aumua Amata Coleman Radewagan, "O lo'o o'u naunau e fa'aleleia le tatou falema'i tele i Faga'alu mo Amerika Samoa ma ona tagata, e pei ona ou fa'ailoa i le atunu'u i la'u tautalaga ia Oketopa 2018."

FA'AAUAU PESEPESEGA O LE KERISIMASI I UTULEI PO #2

O le afiafi lona lua o pesepesega mo le fa'amanatuina o le vaitau fiafia o le Kerisimasi na tatalaina lea e Rev. Paulo Lealaitafea mai le EFKAS i Tafuna, Ierusalema Fou ma o'o ane ai loa le sao e amatalia ai pesepesega o lana Ekalesia mai Ierusalema Fou lava.

Na faia fo'i le sao o le Autalavou a Vatia Metotisi; soso' o lea ma Faga'alu CCCAS, ae lona fa ai Malaeloa Metotisi Youth.

O le avanoa lona lima na tula'i mai ai Tafuna High School Music Choir ae soso'o mai loa ma le aufaipese matua'i siufofoga malie a le SOFIA.

Susana Uesele Metotisi A'oga Aso Sa na fai fo'i lo latou sao ae tula'i mai ai loa ma le Autalavou a le Ekalesia Metotisi Tonga i Tafuna. O le Ekalesia a le AOG Fagasa na pepese fo'i ma fa'ai'u ai loa e Nuuuli CCCAS Youth.

Ina ua mae'a le afiafi a tamali'i na tula'i le susuga Rev. Leitualasa Malietulua mai Nuuuli CCCAS e saunia le tatalo fa'ai'u o lea po.

O le po anapo sa tapunia ai lenei polokalama fa’aletausaga e fa’atautaia e le Arts Council, ae lagolago sua i ai le Matagaluega o Tina, Talavou ma Tamaitai.