Ads by Google Ads by Google

Tala I Vaifanua


O se va'a'iga i tama'ita'i faia'oga mai le Rainmaker Elementary i Aua i le aso o le Carnival a le PLC - fa'atautaia lea e le PLCCT ma le Teacher Quality a le ASDOE. [ata: Leua Aiono Frost]

O se tasi o folasaga sa tapena i ai le vasega o faia'oga mai le Central ina ia ta'a'alo ai faia'oga, ma iloa patino lea fo'i ala e mafai ona fa'aaoga i potu a'oga mo le fanau a'oga. [ata: Leua Aiono Frost]

FA'ATAUTAIA ULUA'I “PLC” - AUA ELEMENTARY GYMNASIUM

 

I le aso Tofi o le vaiaso na te'a na fa'atautaia ai le Ulua'i PLC - PROFESSIONAL LEARNING COMMUNITY - i le Faleta'alo o le A'oga a Aua Elementary mo Faia'oga o lo'o galulue i a'oga tulaga muamua & lua i le Vaega Tutotonu ma Sasa'e o le Motu.

 

"O lea tu'ufa'atasiga o polokalama, e fa'atautaia e faia'oga ina ia fa'aofi gofie ai le a'oa'oga i le fanau, sa faia ina ia fa'aauupegaina ai Faiaoga uma, ia le gata i le a'oa'o atu, ae ia to'aga e sailia ala e mafai ai ona fa'aofigofie le a'oa'oga i mafaufau o le fanau a'oga, i totonu o potu a'oga a'o fa'atautaia latou lesona o so'o se mataupu,” o se fa'amatalaga lea a le tina e taiulu i ai le Ofisa o le Teacher Quality a le Matagaluega o Aoga, Diana Ameperosa.

 

E lua 'auga o lo'o fa'amoemoe i ai le vaega o le Teacher Quality ina ia ausia, pe mae'a nei taumafaiga uma:

 

• Ia mafai ona fa'atula'ia se PLC i totonu o a'oga ta'itasi e fa'atautaia lava e se latou komiti o faia'oga ma le pulega o le latou a'oga.

 

• Ia matua fa'aauupegaina faia'oga e ala i feso'ota'iga ma isi faia'oga i ala ua lava fefa'asoa'i ai ma isi, ina ia fa'afaigofie ona ia fa'aofi ana lesona i mafaufau ma'ale'ale o le fanau talavou o lo'o ia a'oa'oina. O le tele o lou iloa o nei ituaiga faiga ma metotia eseese e fa'aofi atu au a'oa'oga i mafaufau o le fanau, o le faigofie fo'i lea ona malamalama le fanau ma fiafia pe sogasoga i a'oa'oga.

 

I lea aso sa tofusia ai a'oga e 12 ma latou PLC na fa'atino. Na va'aia ai nisi o lo'o fa'ao latou ta'aloga e fa'aaogaina ai ta'aloga soka, Basketball ma le Football e faatei ai le mafaufau o le tamaititi i a latou suesuega i le potu a'oga.

 

O nisi sa latou fa'aaogaina ta'aloga taumate atu le upu pe afai ua aumaia ia te oe foliga o se mea. O nisi ua taumafai lava e saili le tali o se numera ua aumaia ia te oe e saili atu, afai e te maua le tali sa'o e maua au pepa e totogi ai nisi o oloa mo faia'oga e fa'aaoga i potu a'oga.

 

O nisi o nei oloa na avea ma fa'ailoga eseese e aofia ai, Rims Pepa papa'e e fa'aaoga e lolomi ai le tele o meaaoga a le faiaoga mo lana vasega; laupapa ma markers ma isi lava mea fa'apena e aoga i le potu aoga.

 

Sa auai le  4H i lea fo'i Fetufa'iga mo Faia'oga, ma ua va'aia fo'i le soalaupule ma fiafia fa'atasi o nei faia'oga e to'a 130 na auai e tusa ma le lisi o suafa o i latou sa auai.

 

Saunoa ia Jubilee Apulu o le Teacher Quality, "O le ulua'i taumafaiga lenei ina ia so'otau'au atu se fesoasoani i faiaoga i potu a'oga, ia tele ana auala e mafai ai ona ia fa'aulufale a'oa'oga i mafaufau mu'a o le fanau. Afai fo'i e le tele ni auala e gafatia e le faia'oga ona avatu ai le a'oa'oga i fanau i totonu o potu a'oga, atonu o le a faigofie ona musu pe fa'atalatu mafaufau o le fanau, e le fiafia e fia iloa ma tausaili pea le poto i le tele o taimi."

 

"O le taumafaiga la lenei au mae'a tu'ufa'atasia e le PLCCT, o le vasega o faia'oga ma pule a'oga fa'atasi ai ma sui e to'alua o le matou ofisa o le Teacher Quality, e to'afitu sui totino o le PLCCT, na taumafai ai e fa'ao'a le vasega o faia'oga i nisi auala fou, po'o aikia e fa'aosofia ai le naunau ma le fiafia o tamaiti fa'atasi ai ma faia'oga fo'i, e a'oa'o ma le fanau a'oga e fia iloa a'oa'oga."

 

E tolu fa'atofala'iga fa'apenei o le a fa'atautaia i le atunu'u, ia aotelega i ai le vasega o faia'oga uma, ae o PLC ta'itasi i totonu o a'oga uma e tofusia ma le latou fa'atofala'iga e fa'aalia mo sui faia'oga e auai.

 

O le tolu o fa'atofala'iga lea ua mae'a le muamua na tapena mo aoga tutotonu ma a'oga i le itu i sasa'e. O le masina o Fepuari po'o Mati o le a tu'ufa'atasia ai le fa'atofala'iga mo le Sisifo Tutotonu ma Sisifo o le Motu, ae tomuli ai le fa'atofala'iga e fa'atautaia mo le Manu'atele.

 

O le vasega o faia'oga e aotelega uma A'oga Maualuluga seia o'o lava i Faia'oga i le K5. Peita'i i le ulua'i fa'amoemoe na se'i mae'a nei, e i ai a'oga e le'i auai so latou ta'ita'i, le pule a'oga ma le sui pulea'oga, fa'atasi ai fo'i ma faia'oga.

 

PESEPESEGA O LE KERISIMASI AMERIKA SAMOA - ARTS COUNCIL

 

O le po o le afiafi o le aso Sa, Tesema 16, sa tatalaina ai le polokalama fa'atulagaina a le Arts Council, mo "Pesepesega ma Vi'iga o le fanau mai o Iesu” i le malae o le Suigaula o le Atuvasa i Utulei.

 

Ma sa ki ai moli felanulanua'i ma emoemo, o sasa ma fa'ailo, o le vaitau fiafia i o tatou laufanua i Amerika Samoa nei.

 

E ui ina ua tomuli lenei fa'amoemoe i le tele o tapenaga ai afio'aga ta'itasi e aofia ai Aoloau, Matu'u ma Faganeanea ma lumafale fo'i o aiga lava ta'itasi, ae o le sao lenei o le Faigamalo e tapena e le Arts Council i tausaga ta'itasi.

 

I le sauniga na si'itia lea e le susuga le Faafeagaiga Metotisi mai le afio'aga o Nuuuli, Rev. Sailiai Tuma'ai. O lana ekalesia fo'i sa usuina vi'iga o lea sauniga, fa'atasi ai ma le latou sao e tatala ai le vaega o fa'afiafiaga e 10 i latou mo le ulua'i afiafi a tamali'i.

 

O le fofoga o le polokalama fa'asolo o pesepesega i lenei tausaga, o le tofa le to'oto'o Le'i Sonny Thompson, o ia fo'i o le Komesina o Leoleo.

 

Saunoaga a Kovana Lolo Moliga sa ia fa'afetaia le alofa o le Atua, "Aua e ui lava ina tele a mea tatou e fegasoloa'i ai ma taumafai e fa'atino, a'o le finagalo o le Atua ma lana pule faito'atasi e taunu'u ai mea uma. O se mea e fia fa'ailoa atu, ‘O lo'o alofagia lava i tatou e le Atua, o nisi malo o lo'o lutia i fa'afitauli fita, a'o i tatou ua tatou soifua ma ola pea i se olaga saogalemu e o'o mai i lenei tausaga, fa'afetai i lana fa'asoa mai i mea lelei uma ua tatou maua’."

 

“O alo ma fanau uma o lo'o tautua i so'o se vaipanoa o le lalolagi e tautua mo le Malo tele i ana vaega au, fa'afetai i la outou sao mo le tatou saogalemu. O lenei vaitau, tatou tepa ai i tua i le savaliga umi sa tatou folau mai ai, ma si'i a'e le fa'afetai i le Atua.”

 

“Fa'amanuia atu le vaitau o le Kerisimasi ma le Tausaga Fou”.

 

Mo le kiina o moli felanulanua'i o le malae atoa i le laina o la'au Kerisimasi sa faatutuina e le tele o matagaluega ma vaega eseese o le tatou Malo, sa tula'i ai le tina o le atunu'u, Cynthia Malala Moliga.

 

O le aufa'afiafia e aofia ai: Metotisi  Nuuuli; Vatia CCCAS Sunday School; Fa'ilolo Metotisi Autalavou. O le aufaipese sili ona to'atele mai Fagasa CCCAS; ona soso'o lea ma le AOG Youth; Vatia A.O.G na soso'o ai. Lupelele E lementary Cluster 1, o le aufa'afiafia a Faia'oga uma; Leloaloa Metotisi; Matuu ma Faganeanea CCCAS Youth e latalata i le 90 i latou na auai. Ae fa'ai'u ai le afiafi e le Autalavou a Fagatogo Metotisi.

 

O le susuga le fa'afeagaiga Rev. Tupea Seumanu sa ia tatalo e fa'ai'u le fa'amoemoe. O le toe po o lenei tausaga i ona pesepesega o le Kerisimasi e fa'atautaia lea i le po a nanei ma e to'a sefulu fo'i latou aufaipese lautogia o le a pepese ai.