Tala I Vaifanua
‘AIGA FIAFIA 21 AU FA'AU'U KOSI PISINISI (BAOA) - ASCC LATOU TA'ITA'I & FAIA'OGA
I le afiafi o le aso Gafuna na fa'atasia ai le vasega o fanau o lo'o tau'avea Kosi Fa'apisinisi i le Kolisi Tu'ufa'atasi o Amerika Samoa ma o latou uso ma tuagane o le a tu'ua i latou pe a mae'a le fa'au'uga i le Aso Faraile nei.
O lea fa'atasiga e ao ai i le fanau fa'au'u e to'a 21 i latou na fa'atasi atu, ma o sui totino fo'i o le latou Kalapu o le BAOA, e fa'afetaia o latou faia'oga ae maise o le Pulega o le ASCC sa vala'aulia fa'apitoa e fa'afofoga i a latou folasaga fa'ai'u, ae maise oni latou fanoga fo'i ina ia fa'aleleia mo lea ituaiga o a'oa'oga.
Na auai fa'atasi uma lava le Pulega e afua mai le Peresetene o le Kolisi, le Pule o Aoaoga e tau'avea i le kolisi ma Faia'oga fo'i o lea Kosi. O i latou fo'i ia sa fa'atutu i ai le fa'afetai tele a le fanau.
Sa taulima ina fo'i e le tama'ita'i Faia'oga ma o le Ta'ita'i fo'i lea o le Vaega o Kosi fa'apisinisi i le Kolisi, Dr Faofua Fa'atoafe, le tusi fa'amaumau a le latou Kosi i le ASCC, ua mae'a fa'amaumau uma ai le aofai o fanau ua fa'au'u mai le Kolisi ma latou tikeri AA po'o le ASc i Kosi fa'apisinisi ma Suetusi & Tausitusi.
O lea tu'ufa'atasiga o fa'amaumauga ua mae'a fa'ailoa ai, na amata mai lenei vaega o a'oa'oga fa'apisinisi i le Kolisi i le tausaga e 2006 se'ia o'o mai i le fa'aiuga o lenei tausaga 2018. I le aotelega ua maua i e ua fa'au'u ae ua umia a latou tusi pasi na sailia i le Kolisi ua maua ai le 272 o i latou uma.
O i latou na fa'au'u mai le ASCC ma fa'ailoga i le kosi Tau Su'etusi ma Tausitusi ua maua ai le 152, ae o i latou ua fa'au'u mai ma fa'ailoga i kosi fa'apisinisi e 69.
O i latou ua mae'a fa'au'u ma taua'aoina tusi pasi mai le ASCC i le tau'avea o Kosi uma nei e lua e 51 i latou. O i latou fo'i ua mae'a taua'aoina fa'ailoga e to'a 111 i latou ua mae'a mai a'oga na fa'aauau. Peita'i o le aofai o i latou o lo'o fa'aauau pea lava a'oa'oga mo fa'ailoga maualuluga i le taimi nei e to'a 68.
O fa'amaumauga nei, afai e mausali ona fa'aauau pea, e o'o fo'i i le taimi e talosagaina ai le toe si'itia o fa'ailoga e tausailia i le tatou Kolisi Tu'ufa'atasi i tusi pasi Bachelors ma Masters, e aoga tele ai le vaai o le Komiti Suesue o le Agava'a o Kolisi ma Iunivetiste, WASC, i nei fa'amaumauga aoga tele.
O le vaega mulimuli lava o le aotelega o i latou o lo'o i ai nei i le Malo tele e toetoe taliu mai ua mae'a a'oa'oga e to'a 28 i latou. O le a fa'aauau pea lava lenei fa'amaumauga i tausaga o lumana'i, ae maise lava taimi e faia ai fa'au'uga ma fa'aopoopo pea lava le aofa'i o le fanau e tau'avea nei kosi.
I lea afiafi sa fa'afofogaina ai folasaga o le olioli mai le fanau fa'au'u e to'a 19 i latou, sa tuai ai le isi to'alua o i latou ma ua le maua ai se avanoa. Ua ia te'i le manuia o le fa'au'u, ae ua amata fo'i ona lagona le tau le maua se to'a aua o le a tu'ua le mafutaga i le BAOA.
Sa latou fa'afetaia le taimi o faia'oga sa fa'aalu i le a'oa'oina o i latou, ae maise o le fa'atonu ma le tima'i ia i latou faia fa'aiuga lelei. "O le fa'atonu mai e amata mai le va'aiga i lavalava ma ituaiga ofu e la'ei i lea taimi ma lea taimi o le ola a'oa'oina ma faia tiute fa'apisinisi, o se tasi lea mea e maualuga ai le tapula'a a lenei vasega. Fa'afetai ia te oe le tina Faofua mo lea itu o le tomai ua e fa'aofi ia i matou le fanau, ae maise lava i le fanau teine talavou."
I lea vasega e to'atasi lava le ali'i e i ai, ae to'a 20 o tama'ita'i, o isi o ali'i e le auai i le Kalapu a le BAOA.
FA'ATAUTAIA FA'AU'UGA LONA 69 KOLISI TUUFA'ATASI TESEMA 14, 2018
E to'a 119 le fanau ua sauni e savavali e talia o latou fa'ailoga eseese ua agava'a ai, ina ua mae'a a'oa'oina i latou i le Kolisi Tu'ufa'atasi o Amerika Samoa, ma o i latou fo'i na ua avea ma sui e fa'au'u i le fa'au'uga lona 69 o le tatou kolisi i lenei fa'aiuga o le tausaga.
O le tama'ita'i o Dr Akenese Epi Nikolao, o lo'o avea nei ma Pule o Tagata faigaluega i le Falema’i o le LBJ o le fofoga fa’apitoa lea o le fa’auuga. O lenei tina sa mua'i a'oa'oina o ia i le Fa'asao Marist ma fa'au'u mai ai, ulufale ai loa i le ASCC. Sa avea o ia ma se tasi o Sui Totino o le PHI Theta Kappa, le sosaiete a fanau e maualuluga togi i mataupu o lo'o tau'avea i le Kolisi. I lona fa'au'uga mai le Kolisi Tu'ufa'atasi sa agava'a ai o ia i se avanoa fa'asikolasipi mai le Malo o Amerika Samoa ma fa'aauau ai loa ana a'oa'oga i le Northwest Missouri State University ma tausailia ai lona fa'ailoga Bachelor of Science i le Sociology ma le Psychology lea na ia mauaina i lona fa'au'uga o le tausaga e 1993. Na taliu mai ma avea ma faia'oga i le Samoana High ae tau'avea fo'i ma ana kosi mo le avea mo lona Masters in Education Degree i le COHORT i lena vaitau. Ina ua fa'au'u sa ia toe malaga i Amerika ma fa'aauau ai ana a'oa'oga i le tausaga e 2001 ae maua lona fa'ailoga o le Master of Science i le Business Organizational Management & Development mai le Iunivesite o LaVerne i Kalefonia.
I le 2005 ua amata ai ana a'oa'oga i le Iunivesite o Guam ma maua ai lona fa'ailoga o le Education Teaching Certificate mo A'oga Maualuluga & Kolisi, ona soso'o lea ma lona fa'ailoga Doctorate Degree i le Education mai i le Iunivesite o Sothern California.
O lenei fo'i le tausaga ua ia talia ai lona avea ma Matai o lona aiga potopoto Sa Afoafouvale & Sa Lutu i Fagatogo & Utulei, ma ua soloa'i nei o ia i le suafa "Malopao" lea fo'i sa nofo ai si ona tua'a, Malopao Ta'afulisia Nikolao.
POLOKALAMA ARTS COUNCIL - PESEGA O LE KERISIMASI ASO SA:
O le a amatalia le Polokalama o Pesepesega o le Kerisimasi a le malo i le afiafi o le Aso Sa 16 Tesema, 2018, i le itula e 6:00 i le afiafi, e o’o atu i le afiafi o Tesema 18 i le malae o le Su’igaula o le Atuvasa i Utulei.
E to'a 30 i latou ua mae'a saunia e fa'afiafia ma pesepese e fa'aosofia ai lagona fiafia o le tatou nei vaitau o le tausaga, ma ua fiafia i latou e tapenapena ma fa'amatagofie fo'i a latou toniga felanulanua'i, ia matagofie ai lau maimoa ma le fa'afofoga i so latou sao mo se Kerisimasi Fiafia ma le tausaga fou manuia.
Ua fa'afetai mai fo'i le pulega ma le aufaigaluega i le mamalu o sosaiete, autalavou, matagaluega ma isi lava ua tula'i ma fai o latou sao e fa'afiafia ai i lenei fa'aiuga o le tausaga.