AMATA VASEGA WAYLAND BAPTIST UNIVERSITY ME 28

Ua mautu nei se isi avanoa e mafai ai ona sailia tikeri i Amerika Samoa, ina ua tatala le Wayland Baptist University (WBU) i le nofoaga o lo'o i ai le Manumalo Baptist Academy i Malaeimi.

O lenei Iunivesite o se aoga a le Ekalesia Papatiso ma o le nofoaga autu e i Plainview, Texas. E i ai ona lala i setete e ono o Amerika ma ona lala i Kenya, Aferika i Sasa'e. O le tele o a latou kosi mo fa'ailoga maualuluga o lo'o mafai ona tausailia ai e fanau a'oga latou tusi pasi maualuluga e ala i a'oa'oga i laina feso'ota'i a le Initeneti (online).

O le taumafaiga ina ia fa'atula'ia le lala o le Iunivesite i Amerika Samoa ua fa'ailoa mai e tusa ma le tausaga talu ona fa'atautaia mai, e pei ona ta'ua e le ali'i peresetene Dr Bobby Hall i lana folasaga i le sauniga e tatala ai lea aoga ia Me 16  i le Manumalo Baptist.

Sa ia fa'ailoa fo'i, "O lo ua fa'atuina le Wayland Baptist University i Amerika Samoa, e le toe maluelue fo'i lana tautua, e mautinoa e tumau ai lava mo fanau uma a le teritori e fia sailia le atamai ma maua ai fa'ailoga maualuluga."

Na auai le to'atele o malo fa'aaloalogia a le tatou Malo fa'apea ma le WBU mai fafo i lea sauniga mamalu, ma sa tofu sao fo'i sui lautogia mo folasaga fa'alauiloa o le fa'amoemoe ua mafua ai ona manatu le WBU e faatula'ia lona lala i le tatou nei teritori.

"E mana'omia ona galulue fa'atasi i matou i le WBU ma le tatou malo nei ina ia mafai ona ofoina avanoa lelei mo fanau e tausailia ai latou fa'ailoga maualuluga e amata atu i vasega tau kolisi, se'ia o'o i le Iunivesite, i ni tau taugofie ma e gafatia e i latou ona totogi."

I le folasaga a Papali'i Lauli'i Alofa, le fa'atonu o a'oga a le Manumalo Baptist, sa ia fa'ailoa ai, "Ua alagatatau ona fa'atautaia a'oa'oga e ofoina mai e le Wayland Baptist University mai le nofoaga o le Manumalo Baptist aua o lo'o ua fa'avae i le atamai fa'ale-Tusi Pa'ia, ma e tatau fo'i ona agatonu ma le fa'asoa a aiga Samoa ia gafatia ona totogi a'oa'oga a le fanau mo tusi pasi maualuluga."

"E moni e tele taimi ua una'ia malosi mai ai e tatou ta'ita'i o le malo le taumafaiga ia sailia le atamai ma ia fa'amautu mai tatou tusi pasi maualuluga, ae o le fesili, e gafatia e le paketi fa'aletupe a le aiga lea tulaga,” o sana tala lea sa lagona ai lona naunau ia taugofie le totogi mo a'oa'oga maualuluga, ona gafatia lea e le to'atele ona maua tikeri.

O le afioga i le Lutena Kovana, Lemanu Peleti Mauga, sa avea ma sui o le malo lea sa ia fa'afetaia ai le Pulega a le Iunivesity i lo latou manatu e tatala se latou lala i le teritori. Ua fa'amanuiaina fo'i Amerika Samoa i la outou tautua.

O le keke fa'apitoa o le aso na toto'o i ai Dr. Elaine Seebo o le sui peresetene mo lala uma o le WBU o lo'o fa'atutuina e ese mai le Setete o Texas. Saunoa le Fa'atonusili o A'oga a le WBU i Hawaii, Dr Dan Jacobson, e fa’apea, "O lenei se galuega ua vave ona tino mai ona o le galulue fa'atasi o fa'auluuluga uma o le Malo o Amerika Samoa, le fa'auluuluga o le Manumalo Baptist Acaemy, le ASCC, le Vaega a le Militeri i le tatou teritori nei, le pulega a le Paramount Builders, le pulega a le Happy Valley Baptist Church fa'atasi ai ma le Samoa Baptist Academy. Fa'afetai le pulupululima fa'atasi mo mea lelei e mafai ai e le fanau ona tausailia le atamai lautele i so'o se matata, ma agava'a ai mo tusi pasi maualuluga."

O le WBU o lo'o ua i le lisi o Iunivesite e agava'a i le Komisi o Kolisi i le Southern Association of Colleges & Schools ma e mafai ona sailia ai Fa'ailoga Maualuluga o le Associates, Baccalaureates ma Masters.

I le taimi nei o le tatou sui feso'ota'i mai kosi e tau'avea i lea lala o le WBU, o Lumana'i Snow.

VAIASO SAILIA AGAVA'A A'OGA MAUALULUGA - LEONE & TAFUNA

Ua i o tatou laufanua le aumalaga a le WASC (Western Association of Schools and Colleges) ina ia mafai ona sailiilia le agava'a o a'oga maualuluga a Tafuna ma Leone, ma ua mafuli fo'i nei a'oga maualuluga ina ia tapena mea uma e amata mai le lotoa, falea'oga, togi o le fanau fa'atasi ai ma lipoti uma fo'i o togi ma mataupu eseese o tau'avea e le fanau a'oga i totonu o nei a'oga maualuluga.

"E le faigofie le taumafaiga peita'i, e tatau ona o gatasi mea uma ma aiaiga e sailia ai le agava'a o aoga maualuluga i lenei itu o le Malo Tele ma ona Teritori ia pasia lelei a tatou a'oga maualuluga ma taualoa ai tusi pasi o lo'o taua'aoina i fanau a'oga i tausaga ta'itasi,” o se tala mai lea a le tama'ita'i pule aoga i Tafuna High, Tutuila Nauer.

O le aso ananafi o feiloa'iga a le WASC ma aoga maualuluga a Leone ma Tafuna, ona soso’o ai le ma le fonotaga ma le PTA.

Afai e pasia nei a'oga maualuluga, e fa'atulaga mai fo'i ma tausaga o le a pasia ai mo a'oga ae le toe asiasia. Afai e leai, ona fa'ailoa mai lea o ni mea o fa'aletonu e ao ina fa'aleleia, ma e toe asia mai nei mea pe ua mae'a fa'ataunu'u, ona toe iloiloa ai lea e le Komisi o Kolisi ma A'oga a le WASC pe pasia ai loa i latou.

O le a'oga maualuga o Matata Eseese ua mae'a pasia, fa'atasi ai ma Samoana High ma e le mana'omia ona toe pasia i lenei tausaga.