FA'AMAVAE MA SUI FAIGALUEGA A LE FEMA I LE DRC

O le afiafi o le aso Lulu na fa'atasia ai sui na fa'afaigaluega e le FEMA mai le tatou malo ma latou tu'ufa'atasia ai ma le aufaigaluega a le DYWA se 'aiga fiafia ma ni meaalofa mo le vasega o le aufaigaluega uma lava sa latou galulue fa'atasi a le FEMA i totonu o le latou Ofisa Autu Disaster Recovery Center (DRC) i Pago Pago DYWA.

O nei tina loto tetele ma le agaga alofa i nai sui uma sa latou so'otau'au e fa'ao'o se tautua mo tagata na pagatia i le ‘afa o Gita, na mafai ona latou tu'ufa'atasia loto o i latou uma ma tapena ai se 'aiga fiafia ma meaalofa e fa'ailo ai le agaga fa'afetai tele mo le tautua.

O le faletua o Fa'aui Fano Lefotu, Ramona Toeaina, atoa ma Laura Fa'alevao A. Peseta ma le tama'ita'i o Dora Ah Sue lea sa lalamua i lenei fa'amoemoe. I se saunoaga a nisi o tama matutua o le FEMA, ua fa'ailoa ai, "O le agaga ese lea matou te iloa i tagata o Amerika Samoa. E ui ina pagatia, ae i ai lo latou agaga foa'i ma le fiafia. Ua iloga e i matou le eseesega o aganu'u, aua ua matou tautuaina le tele o atumotu i matu, setete eseese na pagatia i fa'alavelave fa'anatura, ae ua ese ai le matou lagona i Amerika Samoa. E alolofa foa'i tele ona tagata, ma e soifua fiafia, pe tele ni mea pe leai ni mea!"

O se isi o tama matua o le FEMA, sa mua'i avea ma Pailate o le Air Force mo le 20 tausaga, peita'i o lea ua atoa le 68 tausaga o le olaga, ae ua ia fa'ailoa, "Ua toe o'o mai se lagona ia te a'u, o le a ou fai i lou atali'i e ma te o mai, ona e fia maua e a'u le avanoa e faia ai se a'oga pailate i Amerika Samoa ma fa'atele ai ni kamupani va'alele e feoa'i i le va ma Hawaii, ua taugata tele le pasese."

O se mea lelei, ua latou va'aia nisi o tautua e mafai ona fa'aleleia atili mo tagata. O le tasi o ia mea, o faletupe ma le tele o taimi e tausailia ai e tagata ni ala e mafai ai ona tala tupe mai le FEMA.

"Ua iloga fo'i, e matua mana'omia lava ona fa'aleleia atili tautua a Faletupe i le tatou nei teritori. Ua maualuluga tele pili e to'esea e faletupe i teugatupe a tagata, e o'o lava i mea e le tatau ona pilia ai le tagata ua fai a latou teugatupe, ua pili, ona ua manatu le faletupe o lo'o maua fua e le tagata tupe nei mai le FEMA. Peita'i o le fesili, e toe taofia la nei pili pe afai o le a mae'a o ese atu i matou ma le FEMA mai le malo?,” o se tala lea a Papa Andy, lona suafa fou sa fa'ailo mai e nisi o le aufaigaluega.

"O le a matou misia le faigaluega fa'atasi ma outou tagata, o se ofisa e faigaluega fiafia tele i matou ma sui na tofia fa'apitoa e matou te faigaluega fa'atasi, ae o lea fo'i e va'aia le agaga o i latou, e fa'amasani gofie, e laufofoga fiafia, ma e le fa'aituau o latou uiga ia i matou,” o se tala lea a Billy Penn se tasi o tama matua  o le FEMA.

"O le ie lavalava lenei, o le a aoga tele i lo'u atali'i ma lona to'alua, e ufiufi ai le matou laulau 'ai, ae fa'ao'o i ai ma ata, e iloa ai le felanulanua'i o le 'aiga lenei ua faia i lo matou toe aso i le DRC,” o se tala ata lea a Roache.

O le tama'ita'i o Laura, ose tasi mai Texas, ua ia fa'ailoa lona lagona, "Ou te toe maua loa se isi avanoa, ou toe sau fo'i, o lea ua ou masani i Amerika Samoa."

O latou meaalofa o Ie lavalava elei ma latou ula pu'a ina ua mae'a ona fa'ala'eia i latou ona usuina lea o le pese samoa ae sa'asa'a i latou ina ua mae'a le 'aiga mamafa o le afiafi, ma sina vai'aiga i le keke sa tusia ai: Fa'afetai FEMA!

POLOKALAMA AVE'ESEA FAGUVAI UNA MAI LAUFANUA

Ua i ai polokalama fa'atautaia e le ASEPA ma ana pa'aga e agaga i le Fa'amama & Fa'amatagofie Amerika Samoa, ina ia mafai ona aoina ai le tele o faguvai palasitika mai o tatou laueleele.

Ua i ai nei le isi amataga fou, ua faia ai tauvaga i A'oga maualuluga, "Poo ai e maua le fa'ailoga o le tulaga muamua, lua, ma le tolu i a latou oloa una ma le alamini e toe fa'afo'i mai mo le avatu e fa'aliliu ma ia toe fa'aaoga."

O le vasega la a le GREEN CLUB i Leone High School, ua fa'amalosia le susuga le faia'oga o Tautasi Falanai, o lana vasega atoa e taalao mai le atigi apa alamini, le atigifagu vai palasitika ma latou fa'aputu i le pa ua mae'a saunia lelei lona loka i lea lava lotoa.

"O lea fa'ato'a mae'a ona la'u ese atu e le ASEPA le matou faaputuga o lenei masina, ma ua fa'ailoa mai o i matou lea e tulaga tolu i le atigiapa alamini, ae tulaga lima i le atigifagu vai,” o sana tala lea.

"O le taimi lenei, ou te fa'ailoa i la'u vasega, e leai, e tatau ona ausia e i tatou le numera tasi i mea uma na e lua. Aumai uma atigi fagu vai e te tau i ai i so'o se mea, lou aiga e o'o mai i le lotoa a le aoga, sau ma aumai i le tatou fa'aputuga, tutusa lelei fo'i ma le atigiapa alamini. Lea ua ausia le tulaga tolu, ae tatau ona numera tasi uma mea e lua,” o se fa'amalosi'au lea a Falana'i i lana vasega i aso ta'itasi.

FA'ATALIA HAWAIIAN AIR PASIA ILS I LE MALAE VA’ALELE

I le taimi nei, ua mae'a fa'apipi'ia le totoga fou o le Instrument Landing System (ILS) a le malae va'alele i Tafuna, ma ua tatalia nei e le Hawaiian Air le pasia e le FAA ona fa'ato'a faia lea o se latou fa'aiuga, e tusa ma latou faigamalaga na suia mai le to'ai taunu'u mai i le po, i le taunu'u mai i le ao.

Na amatalia ona suia taimi e taunu'u ai ma toe tu'uva'a ese atu ai faigamalaga a va'alele a le Hawaiian Air i le masina ua te'a, ma sa latou fa'alauiloa, e fa'ato'a toe suia lea suiga o feoa'iga ia Iulai 27, 2018.

O le vaiaso ua te’a fa'alauiloa mai ai e le FAA ua mae'a fa'apipi'ia anitena fou o le ILS o le malae va'alele i Tafuna. Ma o le vaiaso lenei - Me 16 i le 18 - sa fa’atulaga e siakina ai pe ua tulaga e ona pasia.

Taua e  le Hawaiian Air lo latou fa’atalia o se fa’aiuga mai le FAA.