PASEFIKA

PISIA LE ‘DENGUE’ I AMERIKA SAMOA

Ua fa’alauiloa fa’alauaitele mai e le Ofisa o le Soifua Maloloina a Amerika Samoa, le fa’amaonia o le a’afiaga o nisi e to’aono, i le fa’ama’i o le ‘Dengue Fever’, i totonu o Amerika Samoa, ina ua mauaina i le vaiaso ua mavae, le a’afia o nisi sa faimalaga atu i atunu’u i fafo, ma toe taliu mai i le teritori.

I se saunoaga a le alii fomai o Adam Konrote i le vaega a le KVZK-TV, i le aso ananafi, e to’afa i latou sa  faimalaga mai fafo ua a’afia i le gasegase, ae to’alua ia fa’ato’a a’afia lata mai, sa maua i le fa’ama’i i totonu lava o le teritori.

Na saunoa Konrote, ona o le a’afia o gasegase e to’alua lata mai, i totonu lava o le teritori (e le’i faimalaga atu i fafo), ua mafai ona fa’amaonia ai le pepesi o lenei faama’i, i totonu lava o le teritori.  Ma o se tulaga ‘oga’oga lea, ua mana’omia loa ona taumafai e fofoina.

O lenei fa’ama’i e mafua ona pepesi, ona o namu, ae e le mafai ona pepesi mai i leisi tagata.

O i latou na fa’ato’a taliu mai mai i Fiti, Samoa ma Tonga, lea sa fa’asalalauina ai le pisia ai o lenei fa’ama’I, ua fautuaina e le Ofisa o le Soifua Maloloina, lo latou nofo va’ava’aia mo aso e 14, pe va’aia ni auga o lenei fa’ama’i.

Sa ta’ua e le alii foma’i ia Dr. Mark Schmaedick, e 12 ituaiga namu o lo’o maua i totonu o Amerika Samoa.  Ae e na’o le lua namu ua fa’amaonia, e tau’aveina lenei fa’ama’i.  O namu ia e lanu uliuli ma le pa’epa’e ma e tele lava ina osofa’i nei namu, i le ao.

TOE TALIU MANUIA MAI FANAU A’OGA A LE ATU SOLOMONA MA FITI, MAI ISARAELU

E to’a 13 ni fanau aoga mai i Fiti, ua faapea ona toe taliu mai ma le manuia, talu ona tupu fefaatauaiga i Isaraelu, i le 12 aso talu ai, ma le mafai ai ona o latou tu’ua Isaraelu. 

O fanau aoga mai i le atu Solomona, sa tatau ona malaga ese mai i le ogatotonu o le masina o Iuni, ae peitai, sa tula’i mai le taua i le o Isaraelu ma Iran.

Sa ta’ua e se tasi o fanau aoga, o Leeroy Wate, i le Pacific Waves, lo latou felelei mai Tele Aviv agai i Dubai, ona agai atu lea i Ausetalia (Brisbane) ma fa’ai’u ai i Honiara.

Faatasi ai ma fanau aoga mai i le atu Solomona, ua o latou fa’amae’aina nei ia ni a’oa’oga faifa’ato’aga, mo le 10 masina i Isaraelu.

I se fa’aaliga mai i le Minisita o Foreign Affairs, i Fiti sa ta’ua ai le toe aumaia ma le saogalemu o fanau aoga uma sa i Isaraelu.  O fanau aoga e to’a 13 mai i le Kolisi o Matata ‘Ese’ese (Navuso Agriculture Technical Institute), sa auai i se aoaoga tau faifa’ato’aga, mo le 10 masina i le AICAT (Arava International Centre for Agricultural Training) i Isaraelu, i le faaiuga o le tausaga ua mavae.

OFOINA ATU E LEOLEO PAPUA NIU KINI IA SE TAUI MO LE FASIOTIA O TAGATA

Ua va’aia pea lava pea le tutupu so’o o fa’alavelave i Papua Niu Kini, i le fasiotia e tagata o nisi ua o latou tu’uaia i le faia o amioga fa’ataulaitu (Sorcery), aemaise lava i tina ma tamaitai, e ui ina o lo’o iai se faalapotopotoga (SARV – Sorcery Accusation Relation Violence) o lo’o galulue malosi, e tineia ia tulaga, ae peitai, o lo’o fa’aauau pea ona tutupu nei ituaiga faalavelave.

Sa maua le avanoa a le vaega fa’asalalau o le RNZ Pasefika, e talatalanoa ai ma so latou sui, o Scott Waide e tusa ai ma nei faiga mata’utia, aemaise le fasiotia o tagata i le itumalo o Hela i nofoaga maualuluga i Papua Niu Kini.

Na faamatalaina e Scott ia se tina sa fasiotia lata mai nei, e to’aono si ana fanau, ma na fa’aipoipo atu i se faiaoga.  Ae ina ua maliu lona to’alua, sa tu’uaia ia lenei tina i le faia o amioga fa’ataulaitu ma le mafua’aga na maliu ai lona toalua.  Ma sa faapea ona fa’atigaina (aofia ai le susunuina o le tina) e le aiga o le tamaloa, ia lenei tina, i po e lua ma i’u ai lava ina o latou fanaina o ia.

O nei gaioiga uma sa pu’eina i se ata vitio.

Sa ta’ua e Scott lona faatalanoaina o nisi o totino o ni faalapotopotoga e galulue faatasi ma le SARV ma ta’ua e i latou nei, le tupu so’o o nei tulaga i fafine e maliliu o latou tane.   E muamua ona tu’ua’i e aiga o latou taitoalua, ua maliliu, ona fasiotia lea o i latou.

Na fa’aalia e Scott le fa’atonuina e le Komesina o Leoleo o lea itumalo, o Joseph Tondo, ia le fa’aaogaina o alagamanuia uma o la latou ofisa, e saili ai i latou o lo’o faia nei tulaga mata’utia.  Lea ua mafai ai ona ofoina atu e leoleo ia se taui e $50,000 (kina) mo so’o se faamatalaga e mafai ai ona maua i latou o lo’o faia lea tulaga.

Ma e to’atasi ua mafai ona avefaapagotaina, o se tagata o le aiga, o le tina lea na fasiotia i se vaitaimi lata mai.