Ads by Google Ads by Google

Tala otooto mai le Fono Faitulafono


[ata: foa'i]
ausage@samoanews.com

AVE LE FA’AMUAMUA A LE FONO I LE PAKETI

 

O le talanoaina atoa ai ma le pasiaina o le paketi a le malo mo le tausaga tupe fou 2019, o le mataupu lea o loo laualuga i le kalena a le Fono Faitulafono mo lana toe tauaofiaga i lana nofoaiga lona 35 lea ua fa’agasolo i le taimi nei.

 

I le toe amata aloaia ai o galuega a le Fono i le vaiaso na te’a nei, talu mai lana malologa sa faia mo le 3 vaiaso, na fa’amaonia ai e Ta’ita’i o maota e lua le sauni atu o le Fono e iloilo le paketi a le malo, i le taimi lava e tauaao atu ai e le faigamalo i luma o le fono.

 

Na taua e le sui fofoga fetalai ia Fetui Fetu Jr, o ia lea sa taitaia galuega a le maota o sui i le vaiaso na te’a nei, e ui i le tele o lu’itau i le paketi a le malo mo le tausaga tupe fou, ae tatau fo’i i afioga i Faipule ona matua silasila toto’a i ai i lea tulaga, ona o le tausaga palota fo’i lenei mo i latou.

 

TULAFONO E FA’ASOASOA AI LE FA’AAOGAINA O LE $2.6 MILIONA

 

Ua i luma o le Fono Faitulafono se tulafono tau fa’aofi na fa’aulu e le faigamalo a Lolo ma Lemanu, e fa’ailoa ai le fa’asoasoaina ma le fa’aaogaina o le vaega tupe e $2.6 miliona, lea na maua mai e le malo mai i se maliliega na sainia i le va o le kamupani i’a a le StarKist ma le ofisa a le malo tele e gafa ma le puipuia o le saogalemu o le siosiomaga ma le gataifale.

 

O lea vaega tupe na mafua mai ina ua molia le kamupani i’a i le fa’atamala ua mafua ai ona fa’aleagaina le sami i tulaga o vai o lo o tafe mai i ana fale gaosi oloa i Atu’u.

 

Ona o le tele o galuega atina’e ma fesoasoani i le fa’aleleia ma le puipuia o le siosiomaga, ua aoga tele ai lenei vaega tupe e fesoasoani ai mo le malo i le tausaga tupe lenei 2018.

 

O le fa’asoasoaina o lenei vaega tupe e aofia ai le $1.5 miliona mo le fausia o le Uafu i Malaloa; $400,00 e fa’aleleia ai le Fale Tosova’a; $500,000 mo polokalame e puipuia le siosiomaga o Amerika Samoa, ma le $200,000 e fa’atau mai ai mea faigaluega mo le fa’amamaina o le siosiomaga o le atunu’u.

 

I se tusi a le afioga i le ali’i Kovana sa tuuina atu i le Fono Faitulafono, sa ia taua ai e fa’apea, o le taua o le fa’asoasoaina atoa ai ma le fa’aaogaina o lenei seleni, e fesoasoani ai i le toe fa’alauteleina o gaioiga mo le puipuia o le siosiomaga o le atunu’u, ina ia mautinoa e tulaga lelei ma manuia mo le ola manuia o tagata ma fanau i le lumana’i.

 

ALOAIA SOIFUA GALUE O PULELEIITE I SE IUGAFONO

 

O se iugafono malilie fa’atasi a le Fono Faitulafono, lea na fa’aulu e le afioga i le Tama’ita’i Faipule ia Fialupe Lutu o le maota o sui, e aloaia ai le soifua galue o le tofa a Puleleiite Tufele Li’amatua Jr, o se tasi sa tautua i le tofi Faipule mo le itumalo o Sua #1.

 

Na usufono le tofa a Puleleiite i le aso 11 Me, 2018 a o siomia e lona aiga, uo ma pa’aga i le maota gasegase o le LBJ i Faga’alu, ina ua atoa lona 50 tausaga.

 

A o le i usuia le fono ia Puleleiite, sa avea o ia o se Faipule, o se ali’i faipisinisi, o se Tama tausi aiga, o se auauna fo’i sa tautua fa’amaoni mo lona aiga, malo ma le atunu’u. O le mae’a ai o lona soifua aoaoina i Amerika Samoa i le 1988, na amata ai loa ona galue o ia i vaega eseese o le malo, e aofia ai le tusi pasese i le Manu’a Air Transport mo tausaga e lua, ao lei see atu ma galue mo le Ofisa o Fesootaiga a Amerika Samoa (ASTCA).

 

O le mae’a ai o lea auaunaga, na toe see atu ai o ia ma galue mo le kamupani Telefoni a le BlueSky mo tausaga e tele, seia oo ina avea o ia o se Faufautua Sinia.

 

O le tausaga e 2015 na galulue fa’atasi ai Puleleiite ma ni isi o tagata faipisinisi mo le fa’atutuina o ni pisinisi i le atunu’u, e aofia ai le T & L Service Construction, o le Breaker Point Inc, atoa ai ma le Paradise Pizza.

 

O le tausaga e 2008 na filifilia ai o ia e lona itumalo i le tofi Faipule i le maota o sui, ma ia nofoia ai le nofoa o le itumalo mo nofoaiga sosoo e 5.

 

A o avea ma faipule, sa avea o ia ma taitai komiti, faapea ai le tele o komiti eseese sa tautua ai mo le maota o sui. O le tausaga e 2017 na tofia ai loa o ia e le Kovana e avea ma Pulesili o le Ofisa o le ASTCA, ma fa’aauau mai ai lava seia oo i le aso na maliu ai o ia.