Ads by Google Ads by Google

Tala otooto mai le Fono Faitulafono


[ata: foa'i]

FESILIGIA E FETU ATINA’E SA FOLAFOLA MO MANU’A

 

O le vaiaso na te’a nei na fesiligia ai e le afioga i le Sui Fofoga Fetalai o le Maota o Sui ia Fetui Fetu Jr i luma o le maota atina’e sa folafola e ni isi o Ofisa o le malo mo le Itumalo o Manu’a, peita’i e o o mai lava i le taimi nei e le o i ai lava se tulaga e atagia mai ai se taumafaiga e fa’ataunu’u ia folafolaga.

 

O folafolaga e pei ona saunoa i ai Fetui e aofia ai le va’a e leoleoina le gataifale sa folafola e le Komesina o Leoleo, faapea ai ma le fa’apipi’iina o masini tala tupe (ATM machine) sa folafola e le Faletupe a le malo, le Territorial Bank of American Samoa (TBAS).

 

I le mataupu e uiga i le va’a e leoleoina le gataifale o le itumalo o Manu’a, na saunoa ai Fetui e fa’apea, ua fa’atele ona folafola e le tofa Le’i Sonny Thompson le avatu o se va’a e leoleoina le gataifale o Manu’a i le tele o taimi e oo atu ai i luma o le maota mo iloiloga, ae foliga mai e leai lava se folafolaga o taunu’u.

 

“Ua leva ona fa’atali le itumalo i lana va’a e pei ona folafola e le Komesina o Leoleo, lea ua mavae atu le la tausaga ae na o folafolaga pepelo lava ma le le taunu’u o loo fetaia’i ma le itumalo,” o le saunoaga lea a Fetui i luma o le maota.

 

Na taua e le ali’i Faipule e faapea, e taua tele le tatau lea ona i ai se va’a na te leoleoina le gataifale o le itumalo, e le gata e fesoasoani i le puipuiga o le saogalemu, ae mafai fo’i ona tali atu i soo se taimi e tutupu ai ni fa’alavelave i le va o le Luanu’u i Ofu ma Olosega/Sili faapea ai ma uta i le Faletolu i Fitiuta, Faleasao ma Ta’u.

 

E pei ona manino i le saunoaga a Fetui, sa i ai ni fa’alavelave na tutupu i ni taimi ua mavae atu e lagolagoina ai le matua mana’omia o se va’a mo le gataifale o le itumalo. O ni isi o ia fa’alavelave e aofia ai nisi o va’a fagota o loo vaaia soo lava i le gataifale o Manu’a, lea e masalomia o loo i ai ni taumafaiga i tulaga o fualaau fa’asaina.

 

I le mataupu i masini ATM, sa taua fo’i e le ali’i Faipule le tatau lea ona silasila toto’a le malo i le fa’ataunu’uina o ana folafolaga sa faia i tagata o le itumalo. O le taua o masini tala tupe ATM, e faigofie ai i tagata o le itumalo ona agai ane ma tala atu ai a latou tupe, nai lo la tau malaga mai i Tutuila nei i le taugata o pasese.

 

“O lo’u lava taofi, soo se atina’e lava e lelei ma aoga mo Tutuila nei, e tatau fo’i ona lelei ma aoga mo si o matou itumalo i Manu’a. Afai e lelei i tagata Tutuila ona fa’aaoga o masini ATM e faigofie ona maua ai tupe, e tatau fo’i ona lelei mo nai tagata o le itumalo i Manu’a,” o le saunoaga lea a Fetui.

 

ILOILOGA FAAPITOA A LE KOMITI O LE SOIFUA MALOLOINA

 

E ui o lea ua amata le malologa umi a le Fono Faitulafono mo le 4 vaiaso, peita’i ua mae’a ona fa’atulaga le iloiloga a le Komiti o le Soifua Maloloina a le maota o sui, le fesiligiaina lea o tulaga i le auaunaga a le Komiti Fa’afoe a le falema’i o le LBJ, atoa ai ma ni isi o mataupu o lo o fia malamalama i ai le atunu’u.

 

O le itula e 9:00 i le taeao o le aso Lua o le vaiaso nei lea ua fa’atulaga e fa’ataunu’uina ai lea iloiloga, i lalo o le ta’ita’iga a le afioga i le ali’i faipule ia Vesi Talalelei Fautanu Jr o le Ta’ita’i Komiti.

 

Saunoa Vesi e fa’apea, o ni isi o mataupu o le a talanoaina i le iloiloga, o le tulaga i le lava ma totoe o sapalai o vailaau mo togafitiga, o le malosi o le Komiti Fa’afoe a le Falema’i latou te faia ai fa’aiuga, atoa ai ma le auaunaga atoa lava a le pulega o le Falema’i.

 

O sui o le a fesiligia i lenei iloiloga e aofia ai le Pulesili o le Falema’i o le LBJ, afioga Faumuina Taufete’e J. Faumuina, faapea ai ma sui o le Komiti Fa’afoe.

 

MALOLOGA A LE FONO FAITULAFONO

 

E 4 vaiaso lea ua fa’amalolo ai galuega fa’atino a le Fono Faitulafono, e pei ona aloaia i se i’ugafono na pasia e maota e lua i le vaiaso na te’a nei. O le aso Faraile na te’a nei na mae’a aloaia ai galuega a le Fono mo lana malologa, ma le fa’amoemoe e toe amata ana galuega fa’atino i le aso Gafua, aso 4 Mati.

 

A o alo atu ai le Fono mo lana malologa, ua fautuaina e Ta’ita’i o maota e lua afioga i Ta’ita’i o Komiti ta’itasi ina ia fa’aauau pea le fa’atinoina o galuega e moomia le fa’ataunu’uina mo le manuia o le atunu’u.

 

O le vaiaso lona 2 o le malologa ua fa’amoemoe e malaga atu ai afioga i Senatoa ma Faipule i le Fonotaga Fa’aletausaga a le Ofisa o le Litaea a le malo, lea e usuia i Hawaii i le aso 18-20 o Fepuari.

 

O sui o le Fono Faitulafono o le a malaga i lenei fonotaga e aofia ai totino o Komiti o le Litaea a maota e lua.

 

PA U’AMEA MA SE TALIGALU MO LE AFIOAGA I LAULI’I E OO I FAGAITUA.

 

Ua i luma o le maota o sui se i’ugafono sa fa’aulu e le afioga i le Faipule ia Luaitaua Gene Pan, e talosagaina ai se suesuega mo le fausiaina o se taligalu atoa ai ma se pa u’amea e puipuia ai tafa’ala o le afioaga i Lauli’i ma fa’asolo atu ai i Fagaitua.

 

O le fa’afitauli e pei ona maitauina i lea vaega o le atunu’u, a oo ina tetele tafega ma malolosi lologa, e le gata e tafia le palapala pe a malolosi le fafati o galu, ae le saogalemu fo’i mo le mamalu o le atunu’u feafioa’i i ta’avale faapea ai ma tagata savavali.

 

O le pa u’amea o lo o i ai i se vaega o le itumalo ua elea ma ua tuai, ma ua mana’omia fo’i le toe fausia o se isi pa fou atoa ai ma se taligalu mautu.

 

Ua taoto atu nei i le Komiti o Galuega Lautele a le maota o sui lenei iugafono, ma ua fa’amoemoe e faia i ai se iloiloga pe a toe a’e mai le Fono mai lana malologa e 4 vaiaso.