MANA’OMIA E VESI SE RIPOTI O LE PAKETI FUAFUA A LE MALO

Ua talosagaina e le afioga i le ali’i faipule mai le itumalo o Manu’a #1 ia Vesi Talalelei Fautanu Jr le Ta’ita’ifono o le Komiti o le Paketi a le maota o sui, tauala atu i le Fofoga Fetalai o le maota, mo se ripoti mai le Ofisa o Tupe ma le Paketi a le malo, i le tulaga tonu o loo i ai paketi ma tupe fuafua a le malo mo le tausaga tupe fou lenei, 2019.

E mafua lea talosaga, ona na taua e Vesi le tele o taimi e oo atu ai afioga i Fa’atonusili e molimau i luma o le Fono Faitulafono, latou te tu’uaia ai lava le Fono Faitulafono fai mai, o i latou ia na suia le tele o fuafuaga a le malo sa i totonu o le paketi fa’ataoto a le malo.

“E le tatau ona fa’aauauina pea lea tulaga le sa’o”, o le saunoaga lea a Vesi i le aso Faraile na te’ anei. “E tatau ona aumai le paketi atoa a le malo ina ia faamaonia ai, pe sa i ai ni mea fou na sui e le Fono Faitulafono, poo ni fa’amatalaga e olegia ai le maota ona o ni fa’aletonu ua tula’i mai i galuega fa’atino a le malo.”

Saunoa Vesi e fa’apea, e le tatau i nisi o Fa’atonusili ona latou faia lea tulaga le manuia o le tutupu loa o ni fa’aletonu i le auaunaga a le malo, ona eu mai loa lea o le fa’aletonu i le Fono Faitulafono.

E pei ona lipotia e le Samoa News i le tausaga ua te’a sa pasia e le Fono Faitulafono le tupe fa’asoasoa o le tausaga tupe 2019 a le malo e aunoa ma ni suiga.

FESILIGIA GALUEGA FOU A LE US ARMY RESERVE I TAFUNA

E ui ua le mafai ona fa’ataunu’uina le iloiloga lea sa fa’atulaga mo le aso Gafua o le vaiaso fou, e fesiligia ai le mataupu e fa’atatau i le galuega o lo o fa’agasolo i le nofoaga autu o le US Army Reserve i Tafuna i le taimi nei, peita’i sa fesiligia e ni isi o afioga i faipule le tulaga e fa’atatau i lenei galuega i totonu o le maota i le vaiaso te’a.

E tusa ai ma ripoti na mafai ona fa’ailoa atu i luma o le maota o sui, o le Loia Sili a le malo sa ia tuuina atu le fa’atanaga i le Komiti o le Zoning Board a le territory mo le fa’aauauina lea o le galuega faaopoopo a le US Army Reserve e fausia le fale e ‘ao ai fanafanaga.

O le afioga i le ali’i faipule ia Vesi Talalelei Fautanu Jr, o se totino o le Komiti a le Zoning Board na ia fa’aleoina lea tulaga i le taimi o le iloiloga a le Komiti o le Puipuiga o le Saogalemu Lautele a le maota o sui i le vaiaso na te’a nei.

E tusa ai ma fa’amatalaga na tuuina atu i luma o le komiti i le taimi o le iloiloga, sa taumafai le Komiti o le Zoning Board e talosagaina se faatonuga e taofi ai le fausiaina o le galuega, peita’i na fa’ailoa e le sui loia sili ia William Ledoux i le Komiti, ua mae’a ona fa’atonu e le Loia Sili le US Army Reserve, e le mafai ona taofia le galuega ona o loo fausia i luga o fanua ua pulea e le feterale.

Na taua e le afioga i le faipula ia Manumaua Wayne Wilson i luma o le maota o sui e fa’apea, e mana’omia se isi iloiloga auiliili e tusa ai o lenei mataupu, ina ia mafai ai ona manino atili le maota e fa’atatau i le galuega e pei ona fesiligia.

Sa ia taua fo’i e fa’apea, e atagia mai i fa’amatalaga ua ia maua, e le i mulimulita’i le fa’atinoina o lenei galuega i ta’iala ua mae’a ona fa’atulaga, o le mafua’aga lea ua ala ai ona tele faitioaga ma faasea a le atunu’u i le galuega ina ua fa’atoa latou maua ane le tala i le galuega ae ua toeititi mae’a.

Na taua atili fo’i e Manumaua le tatau lea ona tuuina mai se fa’amatalaga mai le vaega e le feterale e fa’amanino atili ai le tulaga o le galuega, atoa ai ma tulafono o lo o fa’aaogaina.

Ua i ai le fa’amoemoe o le iloiloga o le a fa’atulaga i se taimi o i luma, o le a fesiligia ai le ta’ita’ifono o le Zoning Board ia Tafano Joe Tavale ma le ali’i loia sili lagolago ia Ledoux.

TALOSAGAINA E SANITOA LE RIPOTI A LE OFISA O LE ASTCA

Ua talosagaina e le afioga i le ali’i Faipule ia Larry Sanitoa mai le Itumalo o Tuala-uta le ripoti o le tupe a le Ofisa o Fesootaiga a le malo (ASTCA), ina ia fesoasoani ai i afioga i faipule mo so latou silafia e fa’atatau i le tulaga o lo o i ai le itu tau tupe a le Ofisa a le ASTCA i le taimi nei.

Saunoa Sanitoa e fa’apea, o le masina na tausaga na te’a nei na tuuina atu ai le $50 miliona mo le Pone, ae o le $28.3 miliona o lea vaega tupe o le aitalafu lea a le ASTCA mo le Hawaiki Cable.

O lea tupe tele e pei ona saunoa Sanitoa, e ese mai lea i le $30 miliona lea fo’i na fa’aaitalafu e le ASTCA mai le Vaega o le Litaea a le malo i le 2 tausaga talu ai, ma le fa’amoemoe e fa’atupe ai fo’i ana gaioiga mo le Hawaiki Cable.

I lona talitonuga e pei ona ia folasia i luma o le maota o sui i le vaiaso nei, o le taua o fa’amaumauga ma ripoti mai le ASTCA, e mafai ai ona maua se finagalo malamalama o afioga i sui mamalu o itumalo ta’itasi i le tulaga tonu o lo o aga’i i ai le itu tau tupe a le ASTCA.

Saunoa le affoga i le sui faipule mai Manu’a #1 ia Vesi Talalelei Fautaunu Jr e fa’apea, o le taua o faamaumauga atoa ai ma ripoti tau tupe mai le ASTCA, e faigofie ai i faipule ona latou silafia tulaga tonu ma gaioiga o lo o tutupu i totonu o lea Ofisa, ma maua ai fo’i ma le avanoa latou te fa’amanino atu ai i o latou itumalo pe a fesiligia i latou, tulaga manuia poo le le manuia fo’i o lo o i ai le auaunaga a le ASTCA.