Ads by Google Ads by Google

Tala otooto mai le Fa’amasinoga


[ata: foa'i]
ausage@samoanews.com

FIDELIS TAUMALUA

 

Ua sainia nei e le afioga i le Fa’amasino Sili ia Michael Kruse se poloaiga e pu’e fa’apagota mai ai le ali’i o Fidelis Taumalua, ina ua le auai o ia i lana ulua’i iloiloga sa fa’atulaga e faia i le aso Faraile o le vaiaso na te’a nei.

 

O le mae’a ai o le iloiloga faapitoa a Taumalua na faia i luma o le Fa’amasinoga Fa’aitumalo i le aso Lulu o le vaiaso na te’a nei, na fa’atonuina ai loa o ia e le ali’i Fa’amasino ia Fiti Sunia, ina ia tula’i i luma o le Fa’amasinoga Maualuga i le aso Faraile.

 

E lei auai Taumalua ina ua valaau lana mataupu. O se tasi o tuutuuga o loo tatala ai Taumalua i tua, ia auai i soo se taimi e valaau ai lana mataupu.

 

O loo tuuaia e le malo Taumalua i le moliaga mamafa o lona umia faasolitulafono o vaega o le pauta faasaina o le aisa. O lea moliaga na afua mai ina ua taofia e Leoleo se pikiapu na malaga ai Taumalua ma se isi ali’i, ona o le sese o le laisene o loo faapipii i le pito i luma o le ta’avale.

 

LAFAELE KWON

 

O le ali’i e 35 tausaga le matua lea na loka mai e Leoleo i lona faia o ni uiga e save’u ai le nonofo filemu o tagata faigaluega i totonu o se tasi o fale’aiga i le taulaga, ua fa’atonuina e le afioga i le alii Fa’amasino ia Fiti Sunia o ia ina ia aua ne’i toe alu i ai i le fale’aiga lea.

 

O le vaiaso na te’a nei na loka ai e Leoleo le ali’i o Lafaele Know ma ia tula’i ai i luma o le Fa’amasinoga Fa’aitumalo. O loo tuuaia o ia i le moliaga mama o le faatupu vevesi i nofoaga faitele.

 

O ni isi o tuutuuga ua tatala ai Kwon i tua, e aofia ai le fa’asa lea ona toe alu i le fale’aiga na tula’i mai ai le fa’alavelave, fa’asa ona ia toe tagofia le ‘ava malosi poo fualaau fa’asaina, a ia avea o ia ma tagatanu’u lelei e tausisi i tulafono a le malo i soo se taimi. Ia auai fo’i i soo se taimi e valaau ai lana mataupu.

 

O le mataupu lenei na tofu atu i le Ofisa o Leoleo i Fagatogo, ina ua talosagaina e ni isi o le aufaigaluega le fesoasoani a Leoleo, fa’asaga ia Know o loo ‘ona ma laulauvavale solo i totonu o le fale’aiga.

 

O gaioiga sa faia e le ua molia na faigata ai ona aga’i atu ni isi o le atunu’u e fa’atau, ma ua amata ai fo’i ona fefefe tagata faigaluega e fa’atino a latou galuega.

 

A o taumafai Leoleo e fa’atu i luga Know e ta’ita’i i le ta’avale Leoleo, na fa’afuase’i ona laulauvavale o ia ma ee i luga.

 

FREDDY SATUALA

 

Ua molia nei e le malo le ali’i o Freddy Satuala i le moliaga mamafa o le ave ta’avale a o se’i lona laisene ave ta’avale. O lea moliaga na mafua mai ina ua toe a’afia fo’i Satuala i se isi fa’alavelave tau ta’avale i le vaiaso na te’a nei, e mafua mai i lona fealua’i ‘ona i le ta’avale.

 

O le vaiaso fou lea ua fa’amoemoe e toe valaau ai le mataupu a Satuala i luma o le Fa’amasinoga Faaitumalo.

 

E $500 le tupe lea ua fa’atulaga e le fa’amasinoga e tatala ai Satuala i tua. Afai e mafai ona totogi, ua fa’atonuina o ia e aua ne’i ona toe fa’afoeina se ta’avale, pe na te toe soliina fo’i se tulafono a le malo, a ia avea o ia ma tagatanu’u e tausisi i tulafono i taimi nei. Ua fautuaina fo’i o ia ina ia auai i soo se taimi e valaau ai lana mataupu i luma o le fa’amasinoga.

 

O se fa’alavelave tau ta’avale na tula’i mai i le vaiaso na te’a nei i Tafuna, na a’afia ai ni ta’avale se 2 ina ua so’a e le isi ta’avale le pito i tua o le isi ta’avale. Na taunuu Leoleo ma iloa ai, o le ave ta’avale o le ta’avale na mafua ai le fa’alavelave ua sola ese ma le nofoaga na tula’i mai ai le fa’alavelave. Mulimuli ane na mafai ona maua e Leoleo le ave ta’avale, o ia lea o Satuala.

 

A o taumafai Leoleo e loka lima o Satuala, sa tete’e o ia i Leoleo, mulimuli ane na toe usita’i o ia ma mafai ai ona galulue fa’atasi ma Leoleo. Sa ‘ona Satuala i le taimi na pu’e fa’apagota ai o ia.

 

Ina ua fesiligia o ia i lona laisene, na tali le ua molia, o lana laisene o loo se’i e le fa’amasinoga mo le 6 masina, e mafua mai ina ua ta’usala o ia i le moliaga o le ave ta’avale ‘ona i se taimi o le tausaga nei.