Ads by Google Ads by Google

Tala otooto mai le Fa’amasinoga


[ata: foa'i]
ausage@samoanews.com

FONOTAGA JASMINE FA’ANU

 

O le aso 15 Oketopa, 2018 lea ua fa’atulaga e lau ai le fa’asalaga a le tama’ita’i sa avea ma Pule o le Ofisa a le kamupani o le McConnell Dowell, ina ua fa’amaonia e le fa’amasinoga maualuga moliaga mamafa e 2 sa tu’uaia ai o ia e le malo.

 

Na ulua’i tu’uaia e le malo ia Fonotaga Jasmine Fa’anu i moliaga mamafa e 22 o le gaoi, atoa ai ma moliaga e 22 o le faia o faamaumauga tau fa’asese. Ae i lalo o se maliliega na sainia e le malo ma Fa’anu, lea fo’i ua talia e le fa’amasinoga maualuga, ua malie ai le ua molia e tali ioe i le moliaga e tasi o le gaoi, atoa ai ma le moliaga e tasi o le faia o fa’amaumauga tau fa’asese.

 

I le tali ioe ai o Fa’anu i moliaga mamafa e 2 e pei ona ta’usala ai o ia e le fa’amasinoga, sa ia ta’utino ai e fa’apea, i se taimi o le aso 16 Fepuari 2018, sa ia gaoia ai se vaega tupe e silia i le $100 mai le kamupani a le McConnell Dowell e aunoa ma se fa’atanaga fa’aletulafono.

 

Sa ia tali ioe atili e fa’apea, i se taimi o le masina o Tesema 2016 i Amerika Samoa, a o galue ai i le kamupani a le McConnell Dowell, sa ia faia ai ni fa’amaumauga tau fa’asese i luga o se siaki a le kamupani, e ala i lona aveese o le igoa o le kamupani sa fa’amoemoe e totogi aga’i ai le siaki, ae ona tusia ai le tupu ‘cash’.

 

Na ta’utino atili le ua molia e fa’apea, o lana gaioiga sa faia i lea aso, sa aunoa lea ma se fa’atanaga mai le kamupani.

 

O le ali’i loia sili lagolago ia Jason Mitchell o loo tula’i mo le itu a le malo, ae o le ali’i loia tua ia Richard Desaulles o loo tula’i mo Fa’anu, lea o loo taofia pea i le toese talu mai le aso na loka ai o ia, ina ua le mafai ona ia totogi le tupe e $200,000 ua fa’atulaga e tatala ai o ia i tua.

 

O le tagi a le malo fa’asaga ia Faanu, na alia’e mai i le amataga o le tausaga nei, ina ua maua i suesuega a le kamupani sa faia, le silia lea i le $400,000 o loo leiloa mai teugatupe a le kamupani.

 

Na fa’afesoota’i e se sui o le Faletupe o le ANZ Bank le pule o le kamupani, ma fa’ailoa i ai se siaki e tusa ma le $9,986.56 na taumafai Fa’anu e tala i se tasi aso. I suesuega a le kamupani sa faia na iloa ai, o siaki na tala e le ua molia e amata mai i le $4,000 e oo atu i le $9,986.46.

 

Ina ua fesiligia e se ali’i suesue mai Niu Sila sa gafa ma le suesueina o lenei mataupu ia Fa’anu e tusa ai o le tupe o loo masalomia o ia sa ia gaoia, na ta’utino ai le ua molia e fa’apea, o se vaega o lenei tupe sa fa’aaoga e fa’afou ai lona fale, ae o le isi vaega sa tufatufa atu i ana uo ma nisi o lona aiga.

 

RON ALBERT MAUGA

 

E 12 masina i le falepuipui, lea ua fa’asala ai e le fa’amasinoga maualuga le ali’i e 28 tausaga le matua, lea na ta’usala i le moliaga o le taumafai e talepe se fale o se aiga i le tulaga lua, o se tasi lea o tuutuuga o lana nofovaavaaia e 5 tausaga.

 

Na faatoese le ali’i o Ron Albert Mauga i le fa’amasinoga e tusa ai o lana solitulafono sa faia, ma ia talosagaina ai se isi avanoa o ia. Na taua e le ua molia e fa’apea, o le tele o masina na taofia ai o ia i le toese, ua ia aoaoina ai se lesona taua mo ia i le lumana’i.

 

Na tutu fa’atasi lana loia fautua ia Michael White, atoa ai ma le loia a le malo ia Christy Dunn e finau i le fa’amasinoga mo se fa’asalaga faanofovaavaaia mo Mauga.

 

Saunoa le afioga i le ali’i fa’amasino ia Elvis P. Patea e fa’apea, e tusa ai o le ripoti a le Ofisa Nofovaavaaia, o loo taua ai e le ua molia e fa’apea, na mafua ona alu i le fale na tula’i mai ai le fa’alavelave, na taumafai e saili se avanoa e maua ai se isi fualaau fa’asaina ina ia toe tului ai lana lele o loo i ai.

 

Na fa’amaonia e Mauga i le Ofisa Nofavaavaaia, o ia sa lele i le fualaau fa’asaina i le po na tula’i mai ai le fa’alavelave.

 

O ni isi o tuutuuga o le nofovaavaaia e 5 tausaga a Mauga, o lona tuliina lea o masina e 12 i le toese, e aofia ai ma masina e lata i le 10 lea ua mae’a ona ia tuliina i le toese i le taimi nei.

 

Ua fa’asa o ia ona ia toe tagofia le ‘ava malosi poo fualaau fa’asaina, a ia avea o ia ma tagatanu’u e tausisi i tulafono a le malo i taimi uma.