Ads by Google Ads by Google

Tala otooto mai le Fa’amasinoga

ausage@samoanews.com

TEENA TALOSAGA E FA’AITIITIA AI TUPE TAOFIA MO NI ALI’I SE TO’A 3

 

Na teena e le afioga i le ali’i Fa’amasino o le Fa’amasinoga Fa’aitumalo ia Fiti Sunia talosaga na fa’aulu e le ali’i Loia Fautua ia Ryan Anderson, mo se avanoa e fa’aitiitia ai tupe e tatala ai ali’i e to’atolu na pu’e fa’apagota mai e Leoleo i se osofaiga i Peseta ma Tafuna i le 2 vaiaso talu ai.

 

O i latou e to’atolu e aofia ai Misi Siua, Sui Tago Jr ma Henry O’Brien. E $15,000 le tinoitupe ua fa’atulaga e tatala ai Siua i tua, ae ta’i $5,000 mo Tago Jr ma O’Brien.

 

O i latou nei e to’atolu o lo o tu’uaia i le umia fa’asolitulafono o fualaau fa’asaina o le aisa. O ia moliaga na afua mai ina ua fa’ataunu’u e Leoleo se poloaiga a le fa’amasinoga, ina ia saili meatotino a Siua e aofia ai lona fale ma lana ta’avale, ina ua masalomia lona fa’atauina atu o fualaau fa’asaina o le aisa i tagata.

 

Na osofa’i e Leoleo le ta’avale a Siua ma maua i ai fualaau fa’asaina o le aisa, tupe, atoa ai ma mea e fa’aaoga e tagata e tulei ma fa’atau atu ai le aisa. Na pu’e faapagota e Leoleo ia Siua ma Tago Jr mai totonu o le ta’avale a Siua.

 

Ae mo O’Brien, na pu’e faapagota o ia e Leoleo ina ua taofia e Leoleo lana ta’avale i Tafuna, ma maua ai se paipa tioata o loo i ai se vaega laititi o le pauta o le aisa i totonu o le taga o lona ofu.

 

Na taua e Anderson i lana talosaga e fa’apea, o i latou nei e to’atolu, o ni tagatanuu o Amerika Samoa ua tele tausaga o aumau i le atunu’u, e le mafai fo’i ona o ese i latou i se isi atunu’u, ona o loo i ai o latou aiga iinei e aofia ai ta’ito’alua ma fanau.

 

Na tete’e le loia a le malo ia Jason Mitchell i le talosaga a le itu tete’e. Na taua e Mitchell e fa’apea, e fai lava si matuia o gaioiga sa faia e i latou nei, lea ua mafua ai ona molia i latou i le tulafono.

 

Na teena e Sunia le talosaga ina ia fa’aitiitia le tupe e tatala ai Siua ma Tago Jr. Saunoa Sunia e fa’apea, e tele se vaega o fualaau fa’asaina sa maua i le ta’avale a Siua, ae mo le ali’i o Tago Jr, e le o se taimi muamua lenei ua tula’i ai o ia i luma o le fa’amasinoga.

 

E na o O’Brien na talia lana talosaga mo se avanoa e fa’aitiitia ai le tupe e tatala ai o ia, lea ua suia i le $2,500 mai le $5,000 sa i ai.

 

O le aso 20 Iulai lea ua fa’atulaga e faia ai le ulua’i iloiloga a Siua, ae o Tago Jr ma O’Brien, ua fa’atulaga e faia i le aso 19 Iulai.

 

IOSEFO N. SAGOTE

 

O le fa’aiuga o le masina lenei o Iulai lea ua toe tolopo i ai le mataupu a Iosefo N. Sagote, ina ua fa’amaonia i le suega sa faia e le Ofisa Faanofovaavaaia le maua o le vailaau o loo i le fualaau fa’asaina o le mariuana i lona tino.

 

Ona o lea tulaga, ua talosagaina ai loa e le Ofisa Faanofovaavaaia se poloaiga a le fa’amasinoga, e fa’aleaoga ai tuutuuga na tatala ai Sagote i tua, ae taofia loa o ia i le toese e fa’atali ai le fa’aiuga o lana mataupu.

 

O le masina o Me o le tausaga nei na tu’uaia ai e le malo ia Sagote i moliaga e 2, le moliaga mamafa o le umia fa’asolitulafono o vaega o le fualaau fa’asaina o le mariuana, ma le moliaga mama o lona taumafai e aumai fa’anana i le atunu’u fualaau fa’asaina.

 

O se tasi o tuutuuga na tatala ai e le fa’amasinoga ia Sagote i tua ina ua ia totogi le tupe sa fa’atulaga e tatala ai o ia, o le fa’asa lea ona ia toe tagofia fualaau fa’asaina poo le ‘ava malosi, atoa ai ma le faia o ni suega i lona tino ina ia iloa ai poo ia tagofia fualaau fa’asaina poo le ‘ava malosi fo’i.

 

In ua mae’a ona le iloiloga a Sagote sa faia i le aso 29 Iuni i luma o le fa’amasinoga maualuga, na faia ai loa se suega i lona tino e le Ofisa Fa’anofovaavaaia. O le fa’aiuga o lea suega, na fa’amaonia ai le i ai o le vailaau o loo i totonu o le mariuana i le tino o Sagote. Na ta’utino Sagote i le sui o le Ofisa Fa’anofovaavaaia, sa ia fa’aaogaina le fualaau fa’asaina o le mariuana i le 3 vaiaso ua tuana’i.

 

TO’ATOLU OVERSTAYER MOLIA I LE FA’ATUPU VEVESI

 

E to’atolu ali’i o lo o nonofo fa’asolitulafono i le atunu’u na taofia e Leoleo i le vaiaso na te’a nei, ma tu’uaia e le malo i le moliaga o le fa’atupu vevesi i nofoaga faitele atoa ai ma le fa’ao’olima i le tulaga tolu.

 

O i latou nei e aofia ai Siaosi Taiao, Afred Leleiga ma Tasi Alega.

 

O ni fa’alavelave eseese na tutupu i le fa’aiuga o le vaiaso i ona tua atu i totonu o le atunu’u, na mafua ai ona pu’e fa’aagota i latou e Leoleo ma tu’uaia i moliaga mama ta’i 2. Ae ina ua fesiligia e le afioga i le ali’i Fa’amasino ia Fiti Sunia fa’amaumauga a le Ofisa o Femalagaaiga fa’asaga i ali’i nei, na iloa ai, e leai ma se isi e i ai ni pepa nofomau.

 

O Taiao na ulufale mai i Amerika Samoa i le masina o Fepuari o le tausaga na te’a nei i le pemita e 30 aso, ma nofo fa’asolitulafono ai lava i Amerika Samoa e lei toe alu i lona aiga i Samoa. O Leleiga na ulufale mai i le atunu’u i le pemita e 30 aso i le masina o Mati 2016, ma nofo fa’asolitulafono ai lava e lei toe fo’i i Amerika Samoa. Ae o Alega, na ulufale mai i Amerika Samoa i le pemita e 30 aso i le masina o Aperila o le tausaga nei, ma fa’aauau ai lava ona fealualua’i solo i laufanua o le atunu’u e leai ni pepa faigaluega poo ni pepa nofomau.

 

O Taiao ma Leleiga na taofia mai e Leoleo i Leone i le lua vaiaso talu ai, ona o se fa’alavelave na tula’i mai ai lea, na a’afia ai i laua i le fa’atupu ina o le vevesi i nofoaga faitele, sosoo ai ma le fa’aoolima i ni isi sa latou inupia fa’apatasi.

 

Na tali ioe i laua i le moliaga o le fa’atupu vevesi i nofoaga faitele ae solofua le moliaga o le faaoolima i le tulaga tolu. O ni isi o tuutuuga o le la nofovaavaaia e 24 masina, o le tuua lea o Amerika Samoa ae toe fo’i atu i Samoa ma aumau ai mo le umi o le la nofovaavaaia.

 

Ua fa’asa ona la toe ulufale mai i le atunu’u i totonu o le 24 masina, fa’asa fo’i ona la toe taumafai e fa’atupu se vevesi pe soli ni isi tulafono a le malo, a o fa’atalitali ai le taimi e toe fa’afo’i atu ai i laua i Samoa.

 

Mo le susuga a Alega, o le aso 19 o Iulai lea ua toe tolopo i ai lana mataupu, o le aso fo’i lea e tatau ona maua ai loa ma le fa’aiuga o le mataupu fa’asaga ia te ia. Na taofia mai e Leoleo ia Alema i Pago Pago ina ua ‘ona ma ia faia ni amioga e save’u ai le nonofo filemu o tagata.