FAATALI SE FAAIUGA A LE FA’AMASINOGA

Ua taoto atu nei i se faaiuga a le Fa’amasinoga Maualuga le talosaga na faaulu e le susuga a Thomas Siaumau ma lana loia i le vaiaso na te’a nei, mo se avanoa e mafai ai ona latou fesiligia ma fa’atalatalanoa sui e to’alua o le vaega iloilo iuga sa iloiloina le faaiuga o le mataupu a Siaumau, lea e pei ona ta’usalaina ai o ia i le fa’alavelave na ia tafana ai se ta’avale Leoleo ia Tesema 2017.

Na taua e le loia a Siaumau ia Richard deSaulles i luma o le Fa’amasinoga Maualuga i le vaiaso na te’a nei i le taimi na finauina ai le la talosaga, e i ai fa’amatalaga taua o loo naunau le latou itu e fia maua mai i sui e to’alua o le vaega iloilo iuga, ae faigata ona e le o fa’atagaina e le fa’amasinoga.

Na taua fo’i e deSaulles e fa’apea, e tumau pea lona talitonuga e pei ona folasia i le taimi sa fa’agasolo ai le fa’amasinoga autu a Siaumau, o le feau lea na tuuina atu e le loia a le malo ia Christy Dunn i luga o le Facebook ma ia talosagaina ai ali’i ma tama’ita’i Leoleo ina ia auai uma atu i le aso mulimuli o taualumaga o le fa’amasinoga, sa avea lea ma itu na unaia ai ali’i ma tama’ita’i iloilo iuga ina ia tuuina mai le latou faaiuga e nofosala ai Siaumau.

Sa ia taua atili fo’i e fa’apea, o lo o i ai mafua’aga e talitonu ai le itu tete’e, e to’alua sui o le vaega iloilo iuga e aiga i ni isi o Leoleo, o le mafua’aga lena o lo o mana’omia ai e le itu tete’e se poloaiga a le fa’amasinoga ina ia fa’ataga ai latou ona talanoa ma fesiligia sui e to’alua o le vaega iloilo iuga.

Na matua teena malosi e le itu a le malo le faafinauga a deSaulles. Na taua e le tama’ita’i loia sili lagolago ia Laura Garvey e fa’apea, e leai ma ni mau fou na folasia e le itu tete’e e fa’atatau i lenei mataupu, se’i vagana ai lava mau sa latou folasia muamua i le ulua’i taimi na teena ai e le fa’amasinoga la latou talosaga.

Na taua e Garvey e fa’apea, e to’atele fo’i Leoleo fai toniga sa laulau tutu solo i fafo o le fale fa’amasinoga i le taimi atoa o le fa’amasinoga, ma o ni isi o i latou ia sa aga’i atu i totonu o le potu fa’amasino i le aso mulimuli o le fa’amasinoga. Peita’i, e leai lava se taimi na  fesiligia ai e le itu tete’e Leoleo nei i le tele o taimi e fai ai ma aga’i atu i totonu o le potu fa’amasinoga, a o lea fa’atoa latou lagaina lenei mataupu ina ua lolofi atu le to’atele o Leoleo i le aso mulimuli o le fa’amasinoga.

O le isi mataupu e fa’atatau i le talosaga a le itu tete’e mo se avanoa e toe fa’atulaga ai se isi fa’amasinoga fou a Siaumau, e fofogaina i le aso 9 o Me.

PITONE SIVATIA

O le vaiaso nei lea ua amata aloaia ai le fa’amasinoga autu o se ali’i ave taxi o lo o tu’uaia i lona faia lea o uiga mataga i se teineititi e 9 tausaga le matua, latou te nonofo mau totogi fa’atasi i se fale i Pago Pago.

O Pitone Sivatia, 67 tausaga le matua, o lo o tu’uaia i le moliaga mamafa o le tagofia lea o itutinosa o se teineititi e laititi i lalo o le tulafono, ma le moliaga mama e tasi o lona faia lea o gaioiga e lamatia ai le saogalemu o fanau laiti.

Talu mai le taimi na taofia faapagota ai Sivatia e Leoleo, sa i ai pea o ia i totonu o le toese i Tafuna, ina ua le mafai ona ia totogi le $5,000 na fa’atulaga e tatala ai o ia i tua. Talu mai fo’i le aso na pu’e fa’apagota ai o ia, sa tumau pea lona teena o tu’uaiga fa’asaga ia te ia seia oo mai lava i le taimi nei.

I le isi iloiloga a Sivatia ia Aperila 2017, sa ia faailoa ai loa i le fa’amasinoga lona mana’o ina ia tuuina atu loa lana mataupu e fa’ataunu’u sona fa’amasinoga autu, i le mae’a ai lea ona ia teena o le ofa sa tuuina atu e le malo ia te ia.

O le tagi fa’asaga ia Sivatia na tofu atu i le Ofisa o Leoleo i Fagatogo, ina ua talosagaina e se tama’ita’i Leoleo ofu savili se fesoasoani a leoleo e uiga i lenei mataupu. Na aga’i atu Leoleo ma latou talanoa ma le tama’ita’i leoleo ofu savili sa ia ripotia lenei mataupu, fa’atasi ai ma le teineititi na a’afia ma lona Tina.

Na fa’amatala e le teineititi na a’afia i Leoleo e fa’apea, na tuli o ia e le isi ali’i e alu ia Sivatia e aumai se $0.50 e fa’atau ai sana apa inu. E taunu’u atu le teineititi ma vaaia ai Sivatia o loo i totonu o lona potu, ma o lo o foliga ‘ona o ia.

Na talanoa le ua molia ma le teineititi i le faitoto’a o lona potu, ma la aga’i atu ai loa i totonu o le potu. Na taua e le malo i le latou tagi e fa’apea, ina ua ulufale le teineititi i totonu o le potu, sa fa’atonuina loa e le ua molia o ia e tapuni le faitoto’a.

Na tu’u e le ua molia le $0.50 i le teineititi, ona ia fai lea i ai e soso atu i ona tafatafa. O iina lea o lo o finau le malo na faia ai loa e le ua molia uiga mataga i le teineititi na a’afia, e ala i lona tagofia o ona itutinosa.

Na faamatala e le Tina o le teineititi i Leoleo e fa’apea, e le o se taimi muamua lenei ua alia’e ai tu’uaiga nei fa’asaga i le ua molia, i lona faia lea o uiga mataga i lana tama teine. I le tausaga ua mavae atu ao lei tula’i mai lenei fa’alavelave, sa faia ai fo’i e le ua molia uiga mataga i lana tama teine matua, peita’i sa mafai lava ona toe teuteu i le va o aiga e lua.

Ina ua fesiligia e Leoleo ia Sivatia e uiga i lenei mataupu, sa ia matua teena malosi ai lona faia o ni uiga mataga i le teineititi na a’afia. Na taua e le ua molia i Leoleo e fa’apea, e leai se taimi na alu atu ai se teineititi e 9 tausaga i totonu o lona potu i le aso o lo o tu’uaia na tula’i mai ai le fa’alavelave.

Sa ia faamaonia i Leoleo, o ana pia sa inu i le taeao o le aso Sa e pei ona tu’uaia, o pia sa totoe mai i le po o le aso Toona’i, lea sa ia tuu i totonu o le pusa aisa, ma ia fa’aaogaina loa i le taeao o le aso Sa na sosoo ai.