Ads by Google Ads by Google

Tala otooto mai le Fa’amasinoga


[ata: foa'i]
ausage@samoanews.com

ALESENA LEMAPU

 

Ua toe taofia ai le toese i Tafuna le ali’i o Alesana Lemapu e fa’atali ai le aso 8 o Mati lea ua fa’atulaga e toe tula’i ai o ia i luma o le Fa’amasinoga Maualuga mo le isi ana iloiloga. O le vaiaso nei na pu’e fa’apagota ai e Leoleo ia Lemapu, ona o se tusi saisai mai le Ofisa Faanofovaavaaia, o loo tu’uaia ai o ia i lona le tausisia lea o tuutuuga o lana nofovaavaaia e 5 tausaga sa tuuina atu i le 2015.

 

O ni isi o ia tuutuuga e aofia ai le alu atu e asi le Ofisa Faanofovaavaaia fa’atasi i le masina, totogi lana salatupe e $2,000, ma ia aua fo’i ne’i ona toe tagofia le ‘ava malosi poo ni fulaaau fa’asaina.

 

O le vaiaso na te’a nei na faia ai se suega a Lemapu e se sui o le Ofisa Faanofovaavaaia, ma fa’amaonia ai i lea suega lona fa’aaogaina o le fualaau fa’asaina o le aisa.

 

Na fa’aalia e le loia a Lemapu ia Rob McNeill i le taeao ananafi le tete’e o le ua molia i tu’uaiga, ma ia talosagaina ai loa le faatulaga o se aso e faia ai le ulua’i iloiloga o lenei mataupu.

 

MOLIA SE FAFINE I LE UMIA O FUALAAU FA’ASAINA

 

O le vaiaso nei na tula’i ai i luma o le Fa’amasinoga Fa’aitumalo se Tina talavou ona o tu’uaiga i lona umia fa’asolitulafono lea o se vaega o le laau fa’asaina o le mariuana. O le tama’ita’i loia fautua ia Anna Wells o loo tula’i mo le ua molia, o Grace Tagaloa, ae o le ali’i loia sili lagolago ia Jason Mitchell na tula’i mo le malo i le taimi o le iloiloga.

 

Na teena e le afioga i le Tama’ita’i Fa’amasino ia Gwen Tauiliili-Langkilde le talosaga a Wells e fa’aitiitia le tupe e tatala ai Tagaloa, ma fa’atumauina ai loa le tupe e tatala ai le ua molia i tua i le $5,000.

 

Afai e mafai ona ia totogi le tupe ua fa’atulaga e tatala ai o ia i tua, ua poloaina o ia e le Fa’amasinoga e aua ne’i ona toe umia ni vaega o le laau fa’asaina o le mariuana poo ni isi lava fo’i fualaau fa’asaina poo le ‘ava malosi, e le tatau ona ia toe soli se tulafono a le malo, pe taumafai fo’i e fa’afeso’ota’i molimau a le malo, a ia avea o ia ma tagatanu’u e tausi i tulafono a le malo i taimi uma.

 

O le taeao o le aso Faraile o le vaiaso nei lea ua fa’atulaga e faia ai le ulua’i iloiloga a Tagaloa i luma o le Fa’amasinoga Fa’aitumalo.

 

I le tagi a le malo o lo o taua ai e fa’apea, o le mataupu e pei ona tu’uaia ai Tagaloa na tula’i mai i le Ofisa o Leoleo i Tafuna i le aso 3 o Fepuari, ina ua taofi e Leoleo se ta’avale la’upasese (taxi) sa malaga atu ai Tagaloa ma se isi ali’i e suafa ia Lemi Fiu.

 

Na taua e le malo e fa’apea, a o tu le ta’avale la’upasese, na vaaia e le Leoleo ia Tagaloa ua ia togi se afifi sa uu i lona lima aga’i i le itu o le ta’avale o loo nofo ai Fiu, ma aga’i atu ai loa i fafo lea afifi. Na iloa mulimuli ane, o lea afifi o loo i ai se sikaleti ua uma ona taai, o lo o i ai lau mamago e foliga o lau o le mariuana.

 

Na faia i ai se suega faapitoa e Leoleo ma fa’amaonia ai, o le sikaleti mariuana lea sa togi ese e Tagaloa. Na aveese mai e Leoleo ia Tagaloa ma Fiu mai totonu o le ta’avale la’upasese ma auina atu loa i laua i totonu o le Ofisa o Leoleo mo suesuega.

 

Na taua e Fiu i Leoleo e fa’apea, ina ua mae’a se fiafia sa la tafafao ai ma Tagaloa, na ia manatu loa la te o i se taxi e momoli Tagaloa i lona aiga ona ua ova le ‘ona o Tagaloa. O le afifi sa maua i fafo o le taxi i le vaega na taofia ai i laua, o le afifi a Tagaloa, ae na togi ese e Tagaloa i le itu sa ia nofo ai ina ia fa’afoliga ai, o ia (Fiu) e ana le afifi.

 

A o fesiligia e Leoleo ia Fiu i le isi potu, sa lagona atu le ee leotele mai o Tagaloa mai le isi potu o loo taofia ai o ia e Leoleo.

 

Na tete’e Tagaloa i le molimau a Fiu e faapea o ia e ana le afifi. Na taua e Tagaloa i Leoleo e fa’apea, na gaoi e lana uo tama lana ato o loo i ai uma ana mea aoga i totonu, o le mafua’aga lena na ia viliina ai Leoleo mo se fesoasoani.

 

Ina ua faitau e Leoleo Aia Tatau a Tagaloa, na fa’aalia ai loa e le ua molia lona musu e faia sana fa’amatalaga e tusa ai o fualaau fa’asaina ua tu’uaia ai o ia.

 

O lo o taofia pea Tagaloa i le toese i Tafuna e fa’atali ai le isi ana iloiloga lea ua fa’atulaga mo le vaiaso nei.

 

FESILIGIA E PATEA LE MAFUA’AGA O LE TUAI O RIPOTI A LEOLEO

 

O le tele o mataupu tau solitulafono ua solofua i luma o le Fa’amasinoga Fa’aitumalo, ua fesiligia ai e le afioga i le ali’i Fa’amasino ia Elvis P. Patea le mafua’aga e ala ai ona fa’atuai ia Leoleo e fa’aoo atu a latou ripoti i le Ofisa o le Loia Sili e tusa ai o fa’alavelave o lo o tu’uaia na tutupu.

 

O le mataupu e lua na mafua ai ona fesiligia e Patea tulaga o ripoti a Leoleo e aofia ai le mataupu a Ralph Otto ma Tie Lemon.

 

Saunoa Patea e fa’apea, ua fa’atele ona tolopo mai mataupu a Otto ma Lemon talu mai le tausaga na te’a nei, ae foliga mai e leai lava se ripoti a le malo ua tapena mo nei mataupu. Na taua e Leoleo sa gafa ma le suesueina o nei mataupu, ua mae’a ona tauaao atu i le loia a le malo ripoti mo mataupu o loo fesiligia, peitai i faamaumauga a le fa’amasinoga o loo manino ai, talu lava ona tutula’i Otto ma Lemon i le tausaga na te’a nei seia oo mai i le vaiaso nei, e leai lava ni ripoti ua taunuu atu i le fa’amasinoga.

 

Ona o lea tulaga, na solofua ai loa e le fa’amasinoga le tagi sa faila fa’asaga ia Otto, ae o Lemon ua toe taofia i le toese i Tafuna e fa’atali ai le aso lea ua fa’atulaga e toe tula’i ai.

 

E 3 tagi eseese o loo tu’uaia ai e le malo ia Lemon, e 2 mai le tausaga na te’a nei ma le tasi i le amataga o le tausaga nei. O ia tuuaiga uma o loo atagia mai ai le a’afia o le ‘ava malosi i taimi e fa’atino ai e le ua molia solitulafono e pei ona tu’uaia ai o ia.

 

O Fepuari 19, 2019 lea ua tuu atu e Patea i le malo e tapena mai ai le ripoti mo Lemon, afai e oo atu i le aso lea e lei tapenaina lava le ripoti, ona faia loa lea o le faaiuga a le fa’amasinoga e tusa ai o lenei mataupu.