Ads by Google Ads by Google

Tala otooto mai le Fa’amasinoga

PATI LEPOU

 

O le ali’i pagota lea o lo o tuli sana fa’asalaga fa’a falepuipui e tusa ma le 20 tausaga, e mafua mai i ni solitulafono na ta’usala ai o ia e le fa’amasinoga, ua ia ta’utino i le fa’amasinoga, e moni tu’uaiga o lona sola ese mai le toese i Tafuna i le tausaga na te’a nei e pei ona tu’uaia ai o ia e le malo.

 

O le vaiaso na te’a nei na tu’uina atu ai e le ali’i o Vatoi Ching Sam Jr, poo Pati Lepou fo’i e pei ona iloa ai o ia lana tali ioe i luma o le fa’amasinoga, i lalo o se maliliega sa latou sainia ma le malo, lea fo’i ua talia e le fa’amasinoga.

 

Na ulua’i tu’uaia e le malo ia Lepou i le moliaga mamafa o le sola i tua mai le toese a o taofia faapagota ai o ia, o le vaega D lea o solitulafono mamafa, lea e mafai ona fa’asala ai o ia i le toese mo le umi e le silia i le 5 tausaga, pe fa’asala fo’i i le salatupe e le silia i le $5,000, poo le fa’asala fo’i i fa’asalaga uma ia e lua.

 

Ae i lalo o se maliliega na sainia e le ua molia ma le malo, na ia malie ai e tali ioe i le moliaga e pei ona tu’uaia ai o ia e le malo, le moliaga o le sola ese mai le falepuipui.

 

I le tali ioe ai Lepou i le moliaga e pei ona ta’usala ai o ia, sa ia ta’utino ai e fa’apea, i se taimi o le aso 20 o Mati 2018, a o taofia ai o ia i totonu o le toese i Tafuna, na ia sola ese ai mai le toese.

 

Na taua e le malo e fa’apea, o ni ali’i pagota se to’alua sa i ai i le isi vaega o le lotoa i totonu o le toese, sa la vaaia Lepou ua sola ese mai totonu o le toese, ma la logoina ai loa Leoleo sa tiute i lea aso e tusa ai o lea fa’alavelave.

 

Na siaki e Leoleo sa tiute i lea aso faamaoniga o lenei fa’amatalaga, ma fa’amaonia ai ina ua faitau le aofa’i o pagota, e le o i ai Lepou i totonu o le toese. Na sailia e Leoleo le ua molia ma toe maua mai ai lava i le po o le aso lava lea.

 

O Lepou o loo tuli sona fa’asalaga fa’a falepuipui e 20 tausaga i le toese i Tafuna, ona o ni moliaga mamafa na ta’usala ai o ia e le fa’amasinoga.

 

I le tausaga e 2010, na sosola ai i tua Lepou ma ni isi ali’i pagota se to’atolu ma latou fasi fa’amo’amo’a le ali’i Leoleo o le Faletupe o le ANZ i Tafuna. O le ali’i o Lepou na ia ta ma kiki le Leoleo, a o ia tauanauina o ia e avatu le ki o lana ta’avale. Sa fa’atonu fo’i e Lepou le isi ali’i pagota e tago e tui le Leoleo i se tama’i naifi sa ia uuina.

 

REGGIE VA’AVALE & ASOFA TITIO

 

O le aso 20 o Fepuai lea ua toe tolopo i ai le mataupu fa’asaga ia Reggie Va’avale ma Asofa Titio, ma le fa’amoemoe e tatau ona o o atu i le aso lea ua mae’a ona la sainia le ofa lea ua tuuina atu e le malo mo i laua.

 

O le vaiaso na te’a nei na valaau ai le mataupu a Va’avale ma Titio i luma o le fa’amasinoga maualuga, ma faailoa ai e le loia a le malo ia Christy Dunn, ua mae’a ona tuuina atu i le loia a i laua nei ripoti a Leoleo e uiga i lenei mataupu, atoa ai ma le ofa la te tali ioe ai.

 

Na taua e le ali’i loia fautua lagolago ia Rob McNeill na tula’i mo i laua ua molia, ona o loo gasegase le ali’i loia ia Ryan Anderson, e tatau ona toe tolopo le iloiloga o le mataupu, se’i malosi le ali’i loia fautua ia Anderson.

 

Na talia e le afioga i le ali’i Fa’amasino Sili ia Michael Kruse le talosaga ma toe tolopo ai loa lenei mataupu seia aulia le aso 20 o Fepuari.

 

O Va’avale ma Titio, o i laua ia e to’atolu i ai alii pagota o loo tu’uaia i le fa’alavelave lea na manu’a ai le isi fo’i ali’i pagota ia Nick Mataia i le masina o Oketopa o le 2018. O le isi ali’i pagota e toatolu i ai i latou o loo molia i lenei fa’alavelave e aofia ai le ali’i o Manu Lefatia, lea o lo o tula’i ai le ali’i loia tua ia Marcellus T. Uiagalelei.

 

O lo o tau fai molia i latou i moliaga ta’itolu a le tagata e aofia ai moliaga mamafa e 2 o le faaoolima i le tulaga lua atoa ai ma le taofia faapagota o se tagata, o vaega D ia o solitulafono mamafa. O lo o molia fo’i i laua i le moliaga mama o le faaoolima i le tulaga tolu.

 

CHUNG SE LEE

 

Ua talia e le Fa’amasinoga Maualuga le tali ioe a le ali’i o Chung Se Lee, i lona le usitaia lea o tuutuuga o lana nofovaavaaia sa tuuina atu i le 2013, e aofia ai le aua lea ne’i ona toe solia se tulafono a le malo, ma ia avea o ia ma tagatanu’u e tausisi i tulafono uma.

 

O le masina o Ianuari na te’a nei na fa’amaonia ai e le Fa’amasinoga Fa’aitumalo le nofosala o Lee i le solitulafono i luga o le alatele o le ave ta’avale fa’atamala, e mafua mai i se fa’alavelave na tula’i mai i le tausaga na te’a nei, lea na tu’uaia ai o ia i lona fa’afoeina o se ta’avale a o ia tagofia le ‘ava malosi, ma i’u ina tula’i mai ai se fa’alavelave.

 

O le aso 18 o Aperila o le tausaga nei lea ua fa’atulaga e tuuina atu ai le fa’asalaga a le fa’amasinoga maualuga e tusa ai o lenei mataupu.

 

Na faailoa e le loia a Lee ia Marcellus T. Uiagalelei i le vaiaso na te’a nei e fa’apea, ua mae’a ona faaleaoga e le Fa’amasinoga Fa’aitumalo le solitulafono o le ave ta’avale ‘ona sa tu’uaia ai Lee, ina ua le mafai e le malo ona fa’amaonia lea solitulafono, se’i vagana ai le solitulafono tau ta’avale afi o le ave ta’avale fa’atamala o lea ua ta’usala ai o ia e le Fa’amasinoga Fa’aitumalo.

 

I le ta’usalaina ai o Lee i le ave ta’avale fa’atamala, ua faamalieina ai le Fa’amasinoga Maualuga, ua lava lea e fa’amaonia ai lona le usitaia o le poloaiga o lana nofovaavaaia sa tuuina atu i le 2013, o le aua lea ne’i ona toe solia se tulafono a le malo, ina ua ta’usala o ia i le moliaga mamafa o le ave ta’avale ua mafua ai ona oo le maliu i se isi tagata.

 

O loo tumau pea le tatalaina o Lee i tua e fa’atali ai le aso lea ua fa’atulaga e tuuina atu ai le faaiuga a le fa’amasinoga i lana mataupu.