Ads by Google Ads by Google

Tala otooto mai le Fa’amasinoga

FALEPUIPUI SE ALI’I MO LE 120 ASO

 

E 120 aso lea ua faasala ai e le Faamasinoga Fa’aitumalo le ali’i o Onosa’i Futi e taofia ai i le toese i Tafuna, ina ua ta’usala o ia i le moliaga o le fa’ao’olima i le tulaga tolu.

 

E 3 moliaga mama na ulua’i tu’uaia ai e le malo ia Futi, ae i lalo o se maliliega sa latou sainia ma le malo i le vaiaso na te’a nei, na malie ai Futi e tali ioe i le moliaga o le fa’aoolima i le tulaga tolu, ae solofua e le malo isi moliaga na totoe ai i le pepa o le tagi sa fa’aulu e le malo.

 

I le tali ioe ai o Futi i le moliaga e pei ona ta’usalaina ai o ia e le malo, na ia ta’utino ai i le fa’amasinoga e fa’apea, i se taimi o le masina o Setema o le tausaga na te’a nei, sa ia fa’aoolima ai i le ali’i na a’afia ma manu’a ai o ia.

 

Ina ua oo mai i le aso Faraile na te’a nei na lau ai le fa’asalaga a Futi, ua 99 aso talu ona taofia o ia i le toese. Na finau lana loia ia Ryan Anderson atoa ai ma le loia a le malo ia Jason Mitchell ina ia fa’anofovaavaaia le ua molia, ae ua lava le umi lea ua mae’a ona ia tuliina i le toese e fai ma ana fa’asalaga i lenei mataupu.

 

Ae na saunoa le afioga i le ali’i Fa’amasino ia Fiti Sunia e fa’apea, o le solitulafono e pei ona ta’usala ai Futi i le 2018, ua atagia mai ai le leai o se lesona sa ia a’oa’oina mai le avanoa na tuuina atu muamua ia te ia.

 

E 120 aso ua fa’asala ai e le fa’amasinoa ia Futi, o lea fa’asalaga o le a aofia ai ma aso e 99 lea ua mae’a ona ia tuliina i le toese i Tafuna. Lona uiga, toe 23 aso o loo totoe ona tatalaina loa lea o Futi i tua.

 

TALIA LE TALOSAGA A LE MALO

 

Ua talia e le Fa’amasinoga Fa’aitumalo le talosaga a le loia mo le malo, ina ia tuu atu se isi taimi e fa’aauau ai suesuega a Leoleo e tusa ai o le fa’alavelave e pei ona molia ai sui e to’alima o se aiga mai Faleniu, e mafua mai i se vevesi na tula’i mai i se fanua.

 

O le aso 27 o Fepuari lea ua toe fa’atulaga i ai le valaauina o lenei mataupu. O i latou e to’alima o loo tu’uaia i lenei mataupu o loo molia uma i latou i le fa’aoolima i le tulaga tolu atoa ai ma le fa’atupu vevesi i nofoaga faitele.

 

O i latou e to’alima o loo tu’uaia i lenei mataupu e aofia ai Kuinise Moeai, Romas Napoleone, Malologa Heather, Fuefuealii Talili ma Lavania Fruean.

 

WAYNE SIAUMAU JR

 

O le aso 28 o Fepuari lea ua toe tolopo i ai le mataupu a le ali’i o Wayne Siaumau Jr, i le mae’a ai lea ona ia teena o moliaga fa’asaga ia te ia, ina ua tula’i i luma o le fa’amasinoga faaitumalo i le vaiaso na te’a nei.

 

O tu’uaiga fa’asaga ia Siaumau Jr na afua mai i se fa’alavelave e pei ona a’afia ai o ia ma se isi tagata. E $500 lea ua fa’atulaga e tatala ai o ia i tua, ae talu ai o lo o faanofovaavaaia o ia ona o se isi fo’i mataupu mai le fa’amasinoga maualuga, o le mafua’aga lea na faia ai loa le faaiuga a le afioga i le ali’i fa’amasino ia Fiti Sunia i le vaiaso na te’a nei, ina ia taofia loa Siaumau Jr i le toese ina ua fa’aleaoga e le fa’amasinoga tuutuuga o lana nofovaavaaia.

 

O le tausaga na te’a nei na ta’usala ai e le fa’amasinoga maualuga ia Siaumau Jr i le moliaga o le faaoolima i le tulaga 2, e mafua mai i le fa’alavelave na ia fa’aoolima ai i lona to’alua.

 

O nisi o tuutuuga o lana nofovaavaaia e 5 tausaga, o le fa’asa lea ona ia toe soli se tulafono, pe na te toe faia fo’i ni uiga tau fa’amata’u i lona to’alua.

 

MIKAELE SAVALIGA

 

Ua sainia nei e le afioga i le ali’i fa’amasino ia Elvis P. Patea se poloaiga e sailia mai ai le ali’i o Mikaele Savaliga, ina ua le mafai ona oo atu o ia i luma o le fa’amasinoga maualuga i le taeao ananafi.

 

O ananafi na fa’atulaga e toe tula’i ai Savaliga mo le isi ana iloiloga, e iloa ai pe ua sauni o ia e tuuina atu sana tali ioe i luma o le fa’amasinoga e tusa ai o le tagi fa’asaga ia te ia. Ina ua valaau le mataupu a Savaliga, na fa’ailoa e lana loia fautua ia Michael White e fa’apea, ua fiu e fa’afeso’ota’i le telefoni sa tuuina atu e le ua molia ae leai se isi e tali mai.

 

O nisi o tuutuuga na tatala ai Savaliga i tua ao fa’agasolo ai taualumaga o lana mataupu, e le gata ia auai i soo se taimi e valaau ai lana mataupu, a ia fesoota’i vavalalata fo’i ma lana loia fautua.