ANETELE’A VALOAGA

E 29 tausaga o se ali’i e alala i le afioaga o Pago Pago na loka e Leoleo i le fa’aiuga o le vaiaso na te’a nei, e mafua mai i le fa’alavelave lea na ia fa’aaogaina ai se laupapa e fa’aoo ai manu’a i se isi ali’i.

O loo molia e le malo le ali’i o Anetele’a Valoaga i le moliaga mamafa o le faaoolima i le tulaga lua, faapea ai ma moliaga mama e 2 o le faatupu vevesi i nofoaga faitele, atoa ai ma le faaaoga fa’asolitulafono o se aupega mata’utia.

E $5,000 le tupe lea ua faatulaga e le fa’amasinoga e tatala ai i tua le ua molia. Afai ae tatala o ia i tua, ua fautuaina o ia e le fa’amasinoga e tausisi i tulafono a le malo, ma ia auai i soo se taimi e valaau ai lana mataupu. E le mafai ona ia toe taumafai e fa’afesoota’i le ali’i na a’afia i lenei mataupu i soo se auala, ma ia tuuina atu foi lona tusi folau e taofia e le malo sei vagana ua mae’a taualumaga o lana mataupu.

Na taua e le malo i le latou tagi e fa’apea, o le faalavelave e pei ona molia ai Valoaga na mafua mai i se ta’aloga volipolo sa faia i totonu o le afioaga. I le faaiuga o le ta’aloga volipolo, na tula’i mai ai loa se feeseeseaiga i le va o Valoaga ma le ali’i na a’afia. Na muamua faaoolima le ali’i na a’afia ia Valoaga e ala i lona una’i o ia ma pau ai i lalo.

Na tula’i mai i luga Valoaga ma ia tu’iina loa le na a’afia ma pau i lalo, ona ia aapa atu loa lea i le laupapa sa ta’atia i tafatafa o le vaega na tula’i mai ai le fa’alavelave ma ia sasa ai le ulu o le ali’i na a’afia ma manu’a ai.

Na finau le loia a Valoaga ia Ryan Anderson e fa’aitiitia le tupe e tatala ai le ua molia i tua i le $1,000. Na taua e Anderson i le fa’amasinoga e fa’apea, o Valoaga o se ali’i e galue malosi mo lona aiga, e leai fo’i se fa’amoemoe ia te ia e sola ese ma le atunu’u pe a tatala o ia ia.

Ae na tete’e malosi le loia a le malo ia Jason Mitchell i le talosaga a le itu tete’e, ma ia talosaga ai i le fa’amasinoga e fa’atumau pea le tupe e tatala ai Valoaga i le $5,000. Na taua e Mitchell e fa’apea, e fai lava si matuia o le gaioiga sa faia e Valoaga i le taimi na tula’i mai ai le fa’alavelave, e le gata sa ia fa’aaoga se aupega e faaoo ai manu’a i le ali’i na a’afia, ae na ia lafo fo’i i ai upu tau fa’amata’u e aofia ai lona fasioti o ia.

Na talia e le afioga i le ali’i fa’amasino ia Fiti Sunia le faafinauga a le malo, ma ia fa’atumauina ai le tupe e tatala ai Valoaga i tua i le $5,000.

O le aso Lua na te’a nei na tula’i ai Valoaga i luma o le fa’amasinoga maualuga, ma ia teena ai le moliaga mamafa fa’asaga ia te ia. O le aso 30 o Ianuari 2019 lea ua fa’atulaga e faia ai lana ulua’i iloiloga, ma ua toe taofia nei o ia i le toese i Tafuna ina ua le mafai ona ia totogi le tupe lea sa fa’atulaga e tatala ai o ia i tua.

FAAVAEOLETALALELEI AFITU

O le ali’i e 36 tausaga le matua lea na tu’uaia i lona fa’aaoga o se u’amea e faaoo ai manu’a i se ali’i e 16 tausaga, ua ia ta’utino i le fa’amasinoga maualuga e moni ma fa’amaoni tu’uaiga fa’asaga ia te ia.

Na ulua’i tu’uaia e le malo ia Faavaeoletalalelei Afitu i le moliaga mamafa o le faaoolima i le tulaga muamua, lea e mafai ona fa’asala ai se tasi i le toese mo le olaga atoa, pe faasala foi i le umi e amata atu i le 10 tausaga e oo atu i le 30 tausaga.

Ae i lalo o le maliliega na sainia e Afitu ma le malo, na malie ai le malo latou te toe faia se teuteuga i le moliaga fa’asaga ia Afitu, ina ia faailoa ai le moliaga feololo o le faaoolima i le tulaga lua, le moliaga e mafai ona fa’asala ai se tasi i le toese mo le umi e le silia i le 5 tausaga, pe fa’asala i le salatupe e le silia i le $5,000, poo le fa’asala fo’i i fa’asalaga uma ia e lua.

I le tali ioe ai o Afitu i le moliaga e pei ona ta’usala ai o ia, sa ia ta’utino ai e fa’apea, i se taimi o le aso 14 o Mati 2018, sa ia faaaoga ai se uamea e faaoo ai manu’a i le ali’i talavou na a’afia, e ala i lona sasaina lea o lona ulu i le uamea ma manu’a tigaina ai o ia.

O le vevesi e pei ona taua e le malo na tula’i mai ina ua fasi e le ali’i na a’afia le niece o Afitu ma manu’a ai ona foliga. Na maua e Afitu le tala e fa’atatau i lona niece na fasi e le na a’afia, ma ia alu ai loa e saili le ali’i na fasia lona niece.

Ina ua maua e Afitu le ali’i lea, sa ia tago atu ai loa i le uamea sa uu i lona lima ma ta ai le ulu.

O loo taofia pea Afitu i le toese i Tafuna ina ua le mafai ona ia totogi le $15,000 sa faatulaga e tatala ai o ia i tua, e fa’atali ai le aso 30 o Ianuari 2019 lea ua fa’atulaga e lau ai lana fa’asalaga.