MOLIA SE ALI’I I LONA SASA O LANA FANAU

E 40 tausaga o se Tama na loka e Leoleo i le vaiaso na te’a nei, ona o tu’uaiga i lona sasaina lea o lana fanau e to’alua, e mafua mai i le kilipa oti ulu na malepe ia te i laua.

Na taua e le malo i le latou tagi e fa’apea, o le afiafi o le aso Lulu o le vaiaso na te’a nei, Tesema 5, 2018 na aga’i atu ai le Tina o tamaiti na a’afia ma se sui o le Ofisa o Auaunaga Lautele i le Ofisa o Leoleo i Tafuna, mo le failaina o le tagi fa’asaga i le ali’i ua molia.

Na fa’ailoa e le Tina i Leoleo e fa’apea, e le o se taimi muamua lenei ua sasa tigaina ai fa’apea e lona to’alua lana fanau, ona o mea laiti e tutupu i totonu o le latou aiga, poo taimi fo’i e ita ai lona to’alua i se isi tagata. O tamaiti e to’alua na a’afia e 6 tausaga le matua o le isi ae 10 tausaga le matua o le isi. Na tofu uma fo’i i laua ma manu’a i o laua tino, e mafua mai i le ‘au o le pulumu lea na sasa ai i laua e le ua molia.

I le aso na tula’i mai ai le fa’alavelave, na taua ai e le Tina le oso atu o lona Tama ma taumafai e aveese le pulumu mai le ua molia, peita’i na avea lea ma itu na tau fa’asaga atu ai le ua molia i le Tama o lona to’alua ae tu’u le sasaina o lana fanau.

Na aga’i atu Leoleo ma pu’e fa’apagota mai le ua molia ae auina atu i le Ofisa o Leoleo i Tafuna mo suesuega. E lei mana’o le ua molia e faia sana fa’amatalaga tusitusia e uiga i le mea sa tupu, peita’i sa ia ta’utino i Leoleo, sa ia sasaina lana fanau ona o lona naunau e a’oa’i i laua, ina ia la iloa mea e tatau ona fetagofi i ai, ma mea e le tatau fo’i ona la fetagofi i ai.

O le taeao o le aso Tofi o le vaiaso na te’a nei na tula’i ai le ua molia i luma o le fa’amasinoga fa’aitumalo, ma ia teena ai le moliaga o le faaoolima i le tulaga tolu fa’asaga ia te ia. Sa tula’i mo ia le ali’i loia fautua lagolago ia Ryan Anderson, ae o le tama’ita’i loia sili lagolago ia Laura Garvey na tula’i mo le itu a le malo.

I le mae’a ai o lana ulua’i iloiloga, na tatala ai loa e le afioga i le ali’i fa’amasino ia Fiti Sunia le ua molia i tua e aunoa ma se tupe e totogi, i lalo o tuutuuga e ao ona ia usita’i i ai. O ni isi o ia tuutuuga e aofia ai le le mafai lea ona ia toe taumafai e fa’afeso’ota’i lona to’alua ma lana fanau i soo se auala, a ia saili se isi nofoaga e nofo ai.

Ua fautuaina fo’i o ia ina ia tausisi i tulafono a le malo, auai i soo se taimi e valaau ai lana mataupu, ma ia fesoota’i vavalalata ma lana loia. E le mafai fo’i ona ia toe taumafai e fa’afesoota’i molimau a le malo, e aofia ai lona to’alua ma lana fanau.

O le masina fou o Ianuari lea ua toe tolopo i ai lenei mataupu, ma ua tuuina atu fo’i lenei mataupu e fofogaina lea i luma o le Fa’amasinoga o Aiga.

APELU PATI

O le ali’i lea na fa’atoa tatala atu i tua i le masina na te’a nei ona o tu’uaiga i le ‘ona ma le fa’atupu vevesi, na toe pu’e fa’apagota e Leoleo i le vaveao o le aso Tofi o le vaiaso na te’a nei, ma tula’i ai lava i luma o le fa’amasinoga fa’aitumalo i le taeao lava o le aso Tofi, ona o tu’uaiga i le fa’atupu vevesi i lona aiga.

Na taua e le malo i le latou tagi e fa’apea, pe tusa o le itula e 1:54 i le vaveao o le aso Tofi, ae taunu’u se telefoni mai le aiga o Apelu Pati i le Ofisa o Leoleo i Tafuna, e talosagaina ai se fesoasoani a Leoleo ina ia pu’e fa’apagota Pati ona o le ‘ona atoa ai ma le fa’atupu vevesi.

Na taunu’u Leoleo maua ai le avanoa e feiloa’i atu ai i matua o le to’alua a Pati. Na taua e le ulugali’i i Leoleo e fa’apea, ua fai ma masani a Pati le manava atu i le fale i taimi o le po poo le vaveao fo’i e ‘ona, ona ia fa’atupu lea o le vevesi e ala i le pisapisao solo ma lafo upu i tagata o loo fegasoloa’i i le alatele.

Na taua e le ulugali’i i Leoleo le tatau lea ona ave Pati e taofi i le falepuipui, ina ia a’oa’oina ai se lesona taua i lona olaga.

Ina ua vaaia e Pati ia Leoleo ua taunu’u, sa sola ese o ia ma lafi i lalo o laau o loo i tua o le fale. Na aga’i atu Leoleo ma pu’e fa’apagota mai le ua molia ma auina atu loa o ia i le ofisa o Leoleo i Tafuna mo suesuega.

Na ta’utino Pati i Leoleo, e le toe fia alu i le toese, ona o lea fa’atoa fo’i fa’atoa tatala mai o ia i tua i le masina na te’a nei ina ua ia totogi le $500, a o lea fo’i o le a toe ave o ia i totonu o le toese.

Na teena e Pati le moliaga o le fa’atupu vevesi fa’asaga ia te ia ina ua tula’i i luma o le fa’amasinoga fa’aitumalo. Na fa’atulaga e le afioga i le ali’i Fa’amasino ia Fiti Sunia le tupe e $500 e tatala ai o ia i tua, ae i le mae’a ai o fa’afinauga a loia, na toe fa’aitiitia ai loa le tupe i le $200.

O tuutuuga e pei ona tatala ai i tua Pati pe afai ae totogi le $200, o le fa’asa lea ona ia toe tagofia le ‘ava malosi pe na te toe fa’atupuina fo’i le vevesi i lona aiga, a ia avea o ia ma tagatanu’u lelei e tausi i tulafono a le malo.

O le masina fou o Ianuari lea ua fa’atulaga e toe tula’i ai Pati i luma o le fa’amasinoga fa’aitumalo mo le isi ana iloiloga.

MOLIA SE ALI’I I LONA FA’AO’OLIMA I LONA TO’ALUA

Na taofia e Leoleo mai Mapusaga Fou i le vaiaso na te’a nei se ali’i e 35 tausaga le matua, ona o tu’uaiga i lona fasi lea o lona to’alua, a o si’i e lona to’alua le la pepe a 9 masina le matua, a o matamata i ai le Tina o le tamaloa e aunoa ma sana gaioiga e faia i ai.

O lenei mataupu na tofu atu i le Ofisa o Leoleo i Tafuna, ina ua faila e le Tina sana tagi fa’asaga i lona to’alua. Na taua e le Tina i Leoleo e fa’apea, ua fai soo le amio a lona to’alua o le fasi o ia ona o ni mea laiti e tutupu i le aiga.

Na talosagaina e le Tina se fesoasoani a Leoleo ina ia mafai ai ona aveese mai o ia ma lana fanau mai le aiga o lona to’alua, ona ua le lava i le pologa ma le fasi soo. Na taua e le Tina e fa’apea, ua leva ona fia o ese ma lana fanau peita’i e leai se latou aiga i Amerika Samoa e sulufa’i i ai. O ia e sau mai Samoa, fa’atoa tasi le tausaga talu ona taunu’u mai i Amerika Samoa nei.

Na aga’i atu Leoleo ma latou pu’e faapagota le ua molia mai lona aiga i Mapusaga Fou. Ina ua fesiligia o ia i le mafu’aaga o le fa’alavelave, na taua ai e le ua molia e fa’apea, na mafua ona ia fasi i lona to’alua, ua ova lona le fa’aaloalo i lona Tina atoa ai ma ia.

Na teena e le ua molia le moliaga o le faaoolima ua tuuaia ai o ia e le malo, ina ua tula’i i luma o le fa’amasinoga fa’aitumalo. Sa tula’i mo ia le ali’i loia fautua lagaolago ia Ryan Anderson, ae o le tama’ita’i loia sili lagolago ia Laura Garvey na tula’i mo le malo.

Ua tatalaina nei le ua molia i tua e aunoa ma se tupe e tatala ai o ia, i lalo o tuutuuga e le mafai ona ia toe faafesootaia lona to’alua ma lona afafine i soo se auala. O le aso 28 o Ianuari o le tausaga fou lea ua fa’atulaga e toe valaau ai lenei mataupu i luma o le fa’amasinoga o Aiga.