Ads by Google Ads by Google

Tala otooto mai le Fa’amasinoga


[ata: foa'i]
ausage@samoanews.com

APISALOMA FA’AMANATU

 

O le ali’i lea na tatala i tua e le Fa’amasinoga Fa’aitumalo i le vaiaso na te’a nei ina ua ia teena le moliaga mama o le fa’atupu vevesi i nofoaga faitele, na toe pu’e fa’apagota e Leoleo i le fa’aiuga o le vaiaso na te’a nei, ona o tu’uaiga i lona umia fa’asolitulafono o vaega o le laau fa’asaina o le mariuana.

 

O le amataga o le vaiaso nei na tula’i ai Apisaloma Fa’amanatu i luma o le Fa’amasinoga Fa’aitumalo mo lana ulua’i iloiloga. O le tama’ita’i loia fautua lagolago ia Anna Wells na tula’i mo ia, ae o le ali’i loia sili lagolago ia Jason Mitchell na tula’i mo le malo.

 

O loo tu’uaia e le malo ia Fa’amanatu i moliaga mamafa e 2, o le umia fa’asolitulafono o vaega o le laau fa’asaina o le mariuana, atoa ai ma le umia fa’asolitulafono o mariuana ma le fa’amoemoe e tulei ma fa’atau atu i isi tagata.

 

E $10,000 le tupe lea ua fa’atulaga e le fa’amasinoga e tatala ai Fa’amanatu i tua mai le toese i Tafuna.

 

fautuaina fo’i o ia ina ia aua ne’i taumafai e fa’afesoota’i molimau a le malo i soo se auala.

 

O le aso Faraile o le vaiaso nei lea ua fa’atulaga e toe tula’i ai Fa’amanatu i luma o le Fa’amasinoga Faaitumalo mo lana ulua’i iloiloga.

 

TAGI A LE MALO

 

O le aso 23 o Novema i le itula e 6:00 i le afiafi, na logoina ai Leoleo Faapitoa a le Vaega e Suesueina Fualaau Fa’asaina a le Ofisa o Leoleo, i se ta’avale pikiapu na taofia e Leoleo o loo galulue i luga o le alatele i le itu i sasa’e o le atunu’u, ina ua masalomia le maua i ai o vaega o fualaau faasaina o le mariuana.

 

Na avea le alu saoasaoa o le ta’avale a le ua molia ma auala na taofia ai loa o ia e Leoleo i luga o le alatele. Na vaaia e Leoleo foliga fefe ma le le mautonu o Fa’amanatu, aemaise ai lona taumafai e aapa i lana tama’i ato o loo i le nofoa pito i tua o le ta’avale.

 

Na fesili Leoleo poo a mea o loo i totonu o le ato o loo taumafai e aapa i ai, ae na leai se tali a Fa’amanatu. Sa ia malie e su’e e Leoleo lana ato.

 

I totonu o le tama’i ato lanu uliuli lea sa maua i le nofoa pito i tua o le ta’avale, sa maua i ai ni sikaleti mariuana se 6 ua uma ona taai o loo teu i totonu o se pepa iila. O le isi pepa iila sa maua i ai se tinoitupe. O isi mea sa maua i totonu o le ato e aofia ai se pepa taai, ma le ato tupe o loo i ai pepa faamaonia a Fa’amanatu e pei o lana laisene ave ta’avale.

 

Na malie Fa’amanatu e talanoa i Leoleo e tusa ai o fualaau fa’asaina sa maua i lana ta’avale, i le mae’a ai lea ona faitauina o ona aia tatau fa’aletulafono. I lana fa’amatalaga i Leoleo sa ia taua ai e fa’apea, o mariuana sa ia te ia, na aumai i se tasi o tagata, lea na alu ai loa ma fa’atau atu i ni tagata se to’a 2 i le ta’i $5 i le sikaleti e tasi.

 

Na faia se suega i sikaleti sa maua ia Fa’amanatu ma fa’amaonia ai, o lau mariuana o loo i totonu o ia sikaleti.

 

VILIAMU MALAE

 

O le ali’i lea na taofia i le toese mo masina e 8 e fa’atalitali ai le faaiuga o le mataupu na tuuaia ai o ia, i lona tagofia lea o itutinosa o se tama’ita’i, ua tatalaina nei o ia i tua mai le toese i Tafuna.

 

Na ulua’i tu’uaia e le malo ia Viliamu Malae i moliaga mamafa o le taumafai e fa’amalosi se tama’ita’i atoa ai ma le tagofia o itutino o se tama’ita’i i le tulaga muamua, o vaega C ia o solitulafono mamafa, lea e mafai ona fa’asala ai se tasi i le toese mo le umi e le silia i le 7 tausaga, poo le salatupe e le silia i le $5,000.

 

Ae i lalo o se maliliega na sainia e Malae ma le malo, na ia tali ioe ai i le moliaga o le tagofia lea o itutinosa o se tama’ita’i i le tulaga lua, o le vaega A lea o solitulafono mama, lea e mafai ona fa’asala ai o ia i le toese mo le umi e le silia i le tasi le tausaga, poo le salatupe e le silia i le $1,000.

 

I le tali ioe ai o Malae i le moliaga e pei ona ta’usala ai o ia e le fa’amasinoga, sa ia ta’utino ai e fa’apea, i se taimi o le aso 27 o Fepuari o le tausaga nei, sa ia tagofia ai itutinosa o se tama’ita’i i se auala e fa’amalie ai ona lagona tu’inanau.

 

Na finau le loia a Malae ia Michael White ina ia fa’asala le ua molia i se fa’asalaga faanofovaavaaia, ae ua lava le 8 masina lea na taofia ai o ia i le toese e fai ma ana fa’asalaga i lenei mataupu. O lea fa’afinauga sa lagolagoina fo’i e le loia a le malo ia Christy Dunn.

 

Na talia e le afioga i le ali’i fa’amasino sili talosaga a loia, ma poloaina ai loa Malae ina ia faanofovaavaaia o ia mo le 12 masina i lalo o tuutuuga e ao ona ia usita’i i ai.

 

O nisi o ia tuutuuga e aofia ai le aua lea ne’i ona toe solia se tulafono, ma ia lesitalaina o ia i le lisi o tagata ua ta’usala i le faia o uiga mataga i tama’ita’i. O le a leai fo’i se isi faasalaga faafalepuipui e tuuina atu ia te ia, ae ua lava le 8 masina sa taofia ai o ia i le toese e fa’atalitali ai se faaiuga o lana mataupu, e fai ma ana fa’asalaga i lenei mataupu.

 

ANGELA MONICA LANGKILDE

 

Ua talia e le Fa’amasinoga Maualuga le talosaga a le tama’ita’i sa galue i le Ofisa o Ta’aloga a le malo, ina ia fa’atulaga loa se aso e faia ai lana fa’amasinoga autu fa’asaga i le mataupu o lo o tu’uaia ai o ia e le malo.

 

O le aso 19 o Setema 2019 lea ua fa’atulaga e fa’ataunu’u aloaia ai le fa’amasinoga autu o Angela Monica Langkilde, i luma o le afioga i le ali’i Fa’amasino Sili Lagolago ia Elvis P. Patea.

 

O le vaiaso nei na fa’atulaga ai le isi iloiloga o le mataupu a Langkilde i luma o le fa’amasinoga. O le ali’i loia tua ia Richard deSaulles sa tula’i mo ia, ae o le tama’ita’i loia sili lagolago ia Laura Garvey na tula’i mo le malo.

 

Ina ua valaau le mataupu, na fa’ailoa e deSaulles i le fa’amasinoga lona tauaaoina lea o ripoti uma ma fa’amaumauga e aofia ai ma se ofa mai le malo e fa’atatau i le latou tagi fa’asaga ia Langkilde. Sa ia taua fo’i e fa’apea, i le mae’a ai ona la iloiloina ma Langkilde o faamaumauga uma a le malo, ua la manatu ai loa e sili pe a tuuina atu lenei mataupu e fa’ataunu’u sona fa’amasinoga autu.

 

O Langkilde, lea ua tatala i tua ina ua mae’a ona ia totogi le tupe e $100,000, o loo tu’uaia e le malo i le moliaga mamafa e tasi o le faia o fa’amaumauga tau fa’asese, e ala lea i lona tuuina atu o ni ripoti i le Ofisa o Taui mo Fa’alavelave a le malo, ma ia maua ai se tupe e silia ma le $100,000, ona o se manu’a i lona aao sa ia taua na a’afia i le galuega.