OLOTELE POUESI

Ua talia e le afioga i le ali’i Fa’amasino ia Fiti Sunia le talosaga a le itu tete’e, ina ia toe fa’atulaga le ulua’i iloiloga o le mataupu fa’asaga i le tama’ita’i e 20 tausaga le matua lea o loo tu’uaia i le umia o fualaau fa’asaina mo se isi 2 vaiaso, ina ia maua ai le avanoa e fa’aauau ai a latou suesuega e uiga i lenei mataupu.

O le aso Faraile o le vaiaso na te’a nei na fa’atulaga e faia ai le ulua’i iloiloga o le mataupu a Olotele Pouesi. O le tama’ita’i loia fautua lagolago ia Anna Wells o loo tula’i mo Pouesi, lea o loo taofia pea i le toese i Tafuna ina ua le mafai ona ia totogi le $5,000 sa fa’atulaga e tatala ai o ia i tua, ae o le tama’ita’i loia sili lagolago ia Christy Dunn o loo tula’i mo le malo.

Ina ua valaau le mataupu a Pouesi, sa vave ona talosagaina e Wells le fa’amasinoga mo se avanoa e toe tolopo ai le iloiloga mo se isi 2 vaiaso. Na taua e Wells e fa’apea, e i ai isi fa’amatalaga fou lea ua maua e le latou itu e fa’atatau i le mataupu o loo tu’uaia ai Pouesi, ma, e mana’omia le faia i ai o se suesuega ao lei fa’ataunu’uina i le ulua’i iloiloga.

Saunoa atili Wells e fa’apea, e taua tele fa’amatalaga fou ia ua maua mai e le latou itu, atonu e fesoasoani lea mo Pouesi i le taimi o lana ulua’i iloiloga. Na talia e Sunia le talosaga a le itu tete’e ma toe fa’atulaga ai loa le ulua’i iloiloga o lenei mataupu i le aso 6 o Tesema, 2018.

O Pouesi o loo tu’uaia i moliaga mamafa e 2, o lona umia fa’asolitulafono lea o vaega o le fualaau fa’asaina o le aisa, faapea ai ma le moliaga o le umia fa’asolitulafono o le laau fa’asaina o le mariuana.

O tu’uaiga fa’asaga ia Pouesi na alia’e mai i le fa’alavelave lea na tula’i mai i le po o le aso 11 o Novema 2018, ina ua taofia e Leoleo fa’aaupegaina a le Vaega e Suesueina Fualaau Fa’asaina se ta’avale sa ia fa’afoeina ma le manatu, e maua ai i totonu se ali’i o loo tau sailia e Leoleo ona o se tusi saisai mai le Fa’amasinoga.

E le i maua e Leoleo le tagata sa latou taumafai e saili, peita’i na maua i lea gaioiga, e leai se laisene ave ta’avale o Pouesi. E oo fo’i i le tama’ita’i sa la to’alua i totonu o le ta’avale, e leai fo’i sona laisene.

Ina ua saili e Leoleo le ta’avale, sa maua i ai vaega o fualaau fa’asaina, ma mafua ai loa ona faila moliaga fa’asaga ia Pouesi, ona o ia lea sa fa’afoeina le ta’avale. A o le i sailia e Leoleo le ta’avale mo fualaau fa’asaina, na musumusu Pouesi i se tasi o tama’ita’i Leoleo ma ia fa’ailoa i ai, o lo o i ai ni fualaau fa’asaina i totonu o le ta’avale, o le mafua’aga lea na su’e ai loa e Leoleo le ta’avale.

NICK  MATAIA

Na toe teena fo’i e le Fa’amasinoga Fa’aitumalo i le vaiaso na te’a nei, se talosaga na fa’aleo e le tama’ita’i loia fautuaga lagolago ia Anna Wells, mo se avanoa e aveese ai le tupe lea ua fa’atulaga e tatala ai i tua Nick Mataia mai le mataupu fou lea ua molia ai o ia e le malo, ae lava pea le tupe lea ua mae’a ona fa’atulaga mai le ulua’i mataupu o loo tu’uaia ai o ia e le malo.

O le vaiaso na te’a nei na tula’i ai Mataia i luma o le fa’amasinoga fa’aitumalo mo lana ulua’i iloiloga. O le tama’ita’i loia fautua ia Wells sa tula’i mo ia, ae o le tama’ita’i loia sili lagolago ia Christy Dunn sa tula’i mo le malo.

O le aso Tofi o le vaiaso na te’a nei na teena ai e le afioga i le Tamaitai Faamasino le Tumau ia Gwen Tauiliili-Langkilde le talosaga a Wells ina ia aveese le tupe e $20,000 lea ua fa’atulaga e tatala ai Mataia mai le tagi lona lua fa’asaga ia te ia.

I le aso Faraile na sosoo ai, na toe finauina ai fo’i e Wells le talosaga lava fo’i lea e tasi i luma o le afioga i le ali’i Fa’amasino ia Sunia, peita’i sa teena fo’i. Na taua e Wells e fa’apea, e ui i le eseese o moliaga ua molia ai e le malo ia Mataia, peita’i o ia moliaga e afua mai i le fa’alavelave e tasi o loo tu’uaia sa tupu.

Saunoa Sunia e fa’apea, e ese lava le tagi muamua a le malo fa’asaga ia Mataia, lea na fa’atulaga ai e le fa’amasinoga le $100,000 e tatala ai o ia i tua, ona o moliaga o le faia o uiga mataga i se tama’ita’i, e ese fo’i le tagi lona lua lea ua faia fa’asaga ia te ia, e aofia ai moliaga o le umia faasolitulafono o vaega o fualaau fa’asaina, atoa ai ma le tufatufaina atu o fualaau fa’asaina i se isi tagata.

Na faailoa e Sunia ia Wells e fa’apea, talu ai e 2 tagi eseese a le malo fa’asaga ia Mataia, o le mea moni fo’i la, e eseese uma mataupu ia ua faia fa’asaga ia te ia.

O le teena ai e le fa’amasinoga o le talosaga a Wells, na fa’ailoa ai loa e le tama’ita’i loia fautua, e le mana’o Mataia e faia sana ulua’i iloiloga, ae ua ia manatu e tu’u atu loa lana mataupu i luma o le fa’amasinoga maualuga, e fa’atulaga ai se aso e faia ai lana fa’amasinoga autu.

O Mataia, o ia lea e to’atolu i ai ali’i o loo molia i lo latou faia o uiga mataga i ni tama’ita’i se to’alua e ta’i 14 tausaga le matutua. O lea fa’alavelave na alia’e mai i le masina o Oketopa na te’a nei.

MEALEAGA ALE

O le ali’i lea na ulufale fa’amalosi i le fale o le isi aiga ina ua ova lona ‘ona, tatala le fa’amalama o le potu ae ulufale i totonu ma moe i luga o le moega e aunoa ma se fa’atanaga, ua poloaina e le afioga i le ali’i fa’amasino ia Fiti Sunia, e aua ne’i toe alu i le fale o le aiga na a’afia i lana solitulafono i totonu o le 6 masina lea ua fa’anofovaavaaia ai o ia.

O le ali’i o Mealeaga Ale, lea na ta’usala i le vaiaso na te’a nei i le moliaga o le tu fua i le fanua poo le fale o le isi aiga, ua poloaina na te totogi le salatupe e $100.

I le tali ioe ai o Ale i le moliaga e pei ona ta’usala ai o ia e le fa’amasinoga, sa ia ta’utino ai e fa’apea, i le po na tula’i mai ai le fa’alavelave, sa matua ova ai lava lona ‘ona. Sa ia alu atu ma tatala le fa’amalama o le fale o le isi aiga, ma ia ulufale ai i totonu ma moe i luga o le moega.

Ina ua ala a’e i le taeao na sosoo ai, sa ia iloa ai, e ese le fale lea o loo moe ai. O le taimi fo’i lea na o atu ai tagata o le aiga ma maua o ia i totonu o le fale, ma latou viliina ai loa Leoleo.

O nisi o tuutuuga o le nofovaavaaia a Ale, o le fa’asa lea ona ia toe tagofia le ‘ava malosi, pe na te toe soliina fo’i se tulafono a le malo.