Ads by Google Ads by Google

Tala otooto mai le Fa’amasinoga


[ata: foa'i]
ausage@samoanews.com

JOSEPH MA’ALONA

 

Ua molia nei e le malo le ali’i o Joseph Ma’alona i moliaga mamafa o le talepe fale i le tulaga lua, faapea ai ma le gaoi, ona o le fa’alavelave e pei ona tu’uaia ai o ia, i lona osofaia lea o se faleoloa ae gaoi ni oloa ma se tinoitupe sa i ai i totonu i le masina na te’a nei.

 

O le vaiaso na te’a nei na tula’i ai Ma’alona i luma o le Fa’amasinoga Fa’aitumalo mo lana ulua’i tula’i. O le tama’ita’i loia fautua ia Anna Wells sa tula’i mo ia, ae o le ali’i loia sili lagolago ia Jason Mitchell na tula’i mo le malo.

 

E $10,000 lea ua fa’atulaga e le afioga i le ali’i Fa’amasino ia Fiti Sunia e tatala ai i tua le ua molia.

 

O le faalavelave e pei ona molia ai Ma’alona na tula’i mai i le aso 28 o Oketopa o le tausaga nei, lea o loo tu’uaia ai o ia ma le isi ali’i ia Alapati Foma’i i lo la osofaia lea o se faleoloa i Tafuna. O se ata sa pu’eina i le masini pu’eata o lo o fa’apipii i totonu ma fafo o le faleoloa, na tuuina atu i Leoleo e fesoasoani ai i le latou suesuega.

 

Na taua e le pule o le faleoloa i Leoleo e fa’apea, e $300 le tino i tupe na gaoia, o katuni sikaleti, atoa ai ma pepa fai telefoni (phone cards) e silia i le $100 pe a fa’atupe.

 

Na osofa’i e Leoleo le fale o Ma’alona ma maua ai le tupe e $40 faapea ai pepa faitelefoni. Na taua e se tamaititi e 18 tausaga sa maua atu e Leoleo i le fale, o le tupe ma pepa telefoni sa tuu atu e Ma’alona ia te ia.

 

O le vaiaso fou lea ua fa’atulaga e toe tula’i ai Maalona i luma o le fa’amasinoga faaitumalo mo lana ulua’i iloiloga.

 

ROMEO VALOAGA

 

E 42 tausaga o se ali’i mai Tafuna na taofia faapagota e Leoleo i le vaiaso na te’a nei, ona o tu’uaiga i lona fa’aaoga lea o se agaese e fa’aoo ai manu’a i lima ma le papatua o le isi ali’i sa latou inupia fa’atasi.

 

O le vaiaso lava fo’i na te’a nei na tula’i ai Romeo Valoaga i luma o le fa’amasinoga fa’aitumalo mo lana ulua’i tula’i. O le tama’ita’i loia fautua lagolago ia Anna Wells na tula’i mo ia, ae o le tama’ita’i loia sili lagolago ia Laura Garvey na tula’i mo le malo.

 

O loo molia Valoaga i le moliaga mamafa o le faaoolima i le tulaga lua, o se solitulafono e mafai ona fa’asala ai se tasi i le toese mo le umi e le silia i le 5 tausaga, poo le faasala i le salatupe e le silia i le $5,000.

 

E pei ona taua i le tagi a le malo e fa’apea, o le vevesi na amata mai i se inugapia i le va o Valoaga ma nisi o ana uo, lea e aofia ai ma le ali’i na a’afia. Ina ua lata ina mae’a le inugapia a i latou nei, na alia’e mai ai loa se feeseeseaiga i le va o Valoaga ma le ali’i na a’afia, ma i’u ina fa’aoolima ai le ali’i na a’afia ia Valoaga, e ala i lona ta tu’i o foliga o Valoaga ma pau ai o ia i lalo.

 

Na tu i luga Valoaga ma aapa atu i le agaese sa i ona tua, ma ia taina ai loa le tauau ma le papatua a le ali’i na a’afia ma manu’a tigaina ai o ia.

 

E $5,000 lea ua fa’atulaga e tatala ai Valoaga i tua.

 

O le vaiaso fou lea ua fa’atulaga e toe tula’i ai Valoaga i luma o le fa’amasinoga mo lana ulua’i iloiloga faapitoa.

 

MOLIA SE ALI’I I LONA FAAOOLIMA I LONA TO’ALUA

 

E 45 tausaga o se alii na loka e Leoleo i le vaiaso na te’a nei, ona o tu’uaiga i lona fa’aoolima lea i lona to’alua a o matamata i ai lana fanau e to’a 6. O le ali’i ua molia, o se tagatanu’u o Samoa, ae galuega o ia o se ali’i Kamuta i se tasi o Konekarate fau fale i totonu o le atunu’u.

 

Ua molia nei o ia i le faatupu vevesi i totonu o lona aiga atoa ai ma le fa’aoolima i le tulaga tolu. O le tama’ita’i loia fautua lagolago ia Anna Wells na tula’i mo le ua molia, ae o le ali’i loia sili lagolago ia Jason Mitchell na tula’i mo le itu a le malo.

 

O le faalavelave na tofu atu i le Ofisa o Leoleo i Tafuna i le vaiaso na te’a nei, ina ua logo e nisi o aiga tuaoi Leoleo mo se fesoasoani, i le mae’a ai lea ona fa’alogoina o le ee mai o le to’alua a le ua molia i lona fia maua o se fesoasoani, a o fa’aoolima i ai le ua molia.

 

Na taua e le fafine na a’afia i Leoleo e fa’apea, o le vevesi na tula’i mai ina ua manava atu lona to’alua i le fale e ‘ona, ma amata loa ona ia fesili i nisi o mataupu sa la talanoaina ae lei fa’ataunuuina.

 

Na amata le vevesi i se taugaupu, ae fa’ai’u ina ua tago atu le ua molia ma toso mai le ulu o lona to’alua ae ta tu’i ona foliga. Sa fa’aauau pea le faaoolima o le ua molia i lona to’alua i totonu o le potu malolo ao i ai uma le la fanau e to’a 6.

 

Na ee le fafine i lona fia maua o se fesoasoani ae atili ai ona faaoolima lona to’alua ia te ia. Na taua fo’i e le fafine i Leoleo le folafola e lona to’alua o lona fasiotiina o ia, pe afai na te fa’ailoa i se isi le fa’alavelave. Na taua e le malo e fa’apea, e tusa ai ma le molimau a le fafine na a’afia, e le o se taimi muamua lenei ua faaoolima ai le ua molia i lona to’alua i luma o lana fanau.

 

Ua toe tatala i tua le ua molia e fa’atali ai lana iloiloga lea ua fa’atulaga e faia i le faaiuga o le masina nei, ae ua poloaina e le fa’amasinoga o ia e saili se isi nofoaga e nofo ai, ae aua ne’i toe alu i lo latou fale pe toe taumafai fo’i e fa’afesoota’i lona to’alua ma lana fanau i soo se auala.

 

Na faailoa e le afioga i le ali’i fa’amasino ia Fiti Sunia i le ali’i ua molia, afai e i ai ni ana mea aoga e fia aveese mai i le fale, e tatau ona fesoota’i ma Leoleo ina ia fesoasoani ia te ia.