IOE PAEA FIFITA I TU’UAIGA A LE MALO

O le aso 28 o Novema lea ua fa’atulaga e lau ai le fa’asalaga a le ali’i o Paea Fifita, i le mae’a ai lea ona ia tali ioe i tu’uaiga a le malo sa faila fa’asaga ia te ia. I lalo o se maliliega na sainia e le malo ma Fifita, na malie ai le ua molia e tali ioe i le moliaga mamafa, o lona fa’afoeina lea o se ta’avale ae ua mae’a ona se’i e le fa’amasinoga lona laisene ma fa’asa ai ona ia toe faafoeina se ta’avale i Amerika Samoa.

I le tali ioe ai o Fifita i le moliaga e pei ona ta’usala ai o ia, sa ia ta’utino ai e faapea, i le aso 9 o Aokuso, 2018, na taofi ai e Leoleo lana ta’avale ona o se uta sa i tua o le keli o lana pikiapu e lei saogalemu ona teuina.

Ae ina ua fesiligia e Leoleo lana laisene, na faailoa ai e le ua molia i le Leoleo, o lana laisene ua mae’a ona se’i e le fa’amasinoga.

O loo taofia pea Fifita i le toese i Tafuna e fa’atali ai le aso lea ua fa’atulaga e lau ai lana fa’asalaga.

LEVA’A LESUNI

E 90 aso lea ua tuu atu e le fa’amasinoga maualuga i se ali’i ave pasi e totogi mai ai lana salatupe e $1,000 i le fa’amasinoga, afai e leai, o le a silasila loa le fa’amasinoga i se fa’aiuga talafeagai mo ia.

O le vaiaso na te’a nei na faia ai se iloiloga faapitoa a Leva’a Lesuni i luma o le fa’amasinoga, ona o le mataupu e fa’atatau i lona le totogiina lea o le salatupe sa fa’atonu ai o ia e le fa’amasinoga, o se tasi o tuutuuga o lana nofovaavaaia e 5 tausaga.

Na faailoa i le ripoti a le Ofisa Faanofovaavaaia le faamaoni o Lesuni e tausisi i isi tuutuuga o lana nofovaavaaia, e aofia ai ma lona toe totogiina o le tupe e $305.42 mo le taui o mea sa faaleagaina, se’i vagana ai lana salatupe e $1,000, e na o le $39.57 lea ua mae’a ona totogi.

Na faailoa e Lesuni i le fa’amasinoga, o ia faatoa fo’i mai i Samoa i le fa’alavelave a lona aiga, ma ua mae’a fo’i ona faia sa latou maliliega ma le Ofisa Faanofovaavaaia, na te totogi atu ta’i $150 i le masina mo lana salatupe.

Na faailoa e le afioga i le fa’amasino sili ia Michael Kruse ia Lesuni e fa’apea, e le tatau ona ave lana faamuamua i ana fa’alavelave, aua a oo ina manatu le fa’amasinoga e fa’asala o ia, ona oo lea o ia i se isi tulaga. E oo fo’i i le latou maliliega ma le Ofisa Faanofovaavaaia ua faia, na saunoa Kruse e fa’apea, e le taua i le fa’amasinoga lena maliliega, ae taua le totogi o lana salatupe.

“E 90 aso lea ua tuu atu e totogi mai ai lau salatupe, afai e leai, o le a faasala oe i lou le usitaia o le poloaiga a le fa’amasinoga,” o le saunoaga lea a Kruse.

MAREKO LAFOGA

O le masina o Tesema lea ua fa’atulaga e lau ai le fa’asalaga a le ali’i o Mareko Lafoga, ina ua talia e le fa’amasinoga maualuga lana tali ioe i le moliaga mamafa o le faaoolima i le tulaga lua e pei ona tu’uaia ai o ia e le malo.

I le tali ioe ai o Lafoga i le moliaga e pei ona ta’usala ai o ia, sa ia ta’utino ai e fa’apea, i se taimi o le aso 28 o Ianuari o le tausaga nei, sa ia fa’aaogaina ai se a’upega ma’ai e faaoo ai manu’a i se tasi o ali’i sa latou inupia fa’atasi.

O le vevesi na tula’i mai i le taimi sa faamanatu ai le aso fanau o le Tama a le ali’i na manu’a i lenei mataupu, o ia lea o se uo lelei a Lafoga. Na tau upu Lafoga ma le isi tagata sa i ai i le pati, ma fa’afuase’i ai ona tu’i e le tagata lea Lafoga ma pau ai i lalo. Na tu i luga Lafoga ma sasau loa lana tui i le tagata sa tu i ona tua ma lona manatu, o le alii lea na tu’iina o ia.

O le ali’i na a’afia o le uo mamae a Lafoga, ae o le ali’i na fa’aoolima ia Lafoga ua sola ese mai le nofoaga sa faia ai le fiafia.

O loo taofia pea Lafoga i le toese i Tafuna e fa’atali ai le aso e lau ai lana fa’asalaga, ina ua le mafai ona ia totogi le $15,000 na faatulaga e tatala ai o ia i tua.