IOE SE TINA I LE MOLIAGA O LE GAOI

O le Tina lea na tu’uaia i lona gaoia o se ietoga, le ituaiga o le afuelo mai se tasi Tina, ua ia ta’utinoi le fa’amasinoga e fa’amaonia le tu’uaiga fa’asaga ia te ia.

E 2 mataupu tau solitulafono na molia ai e le malo ia Sauleli’a, poo Li’a Amituana’i. O le mataupu muamua, sa tu’uaia ai o ia i le moliaga o le gaoi, atoa ai ma le moliaga o lona ave fa’agaoi o se meatotino sa tuuina atu i lalo o lana vaavaaia. I le mataupu lona lua, na tuuaia ai o ia e le malo moliaga o le taumafai e gaoi, taumafai e faia ni fa’amaumauga sese, atoa ai ma lona totogi tupe o se tagata faigaluega a le malo.

I lalo o se maliliega na sainia e Amituana’i ma le malo, sa ia malie ai e tali ioe i le moliaga mama o le gaoi lea ua toe teuteu e le malo mai lana mataupu muamua, atoa ai ma le moliaga mamafa o le totogi tupe o se tagata faigaluega a le malo.

I le tali ioe ai o Amituana’i i moliaga e pei ona ta’usala ai o ia, sa ia ta’utino ai e fa’apea, i le aso 17 Iulai 2017 i Amerika Samoa, sa ia gaoia ai le afuelo mai se tasi o Tina.

Na alu Amituana’i ma fai i le Tina se’i ave le ietoga e matamata ai lona Tina, afai e mana’o i ai lona Tina, ona ia fa’atauina lea i le tau e $1,000. Na fiu le Tina e ana le ietoga e fa’atali le toe fo’i atu o Amituana’i ma lana afuelo ua leai se isi. Mulimuli ane maua e le Tina lea le tala, ua alu Amituana’i ma fa’atau atu lana ietoga i le isi Tamaloa Tonga i le tau e $300.

Na ta’utino atili Amituana’i e fa’apea, i le aso 11 Iulai 2017, sa ia totogiina atu ai le $200 i se tagata faigaluega a le Ofisa o Ta’avaleafi a le malo i Tafuna (OMV), ma le fa’amoemoe e sui e le tagata faigaluega lea le pepa o se ta’avale ma fa’aalu i lalo o le igoa o lona to’alua.

Na ta’utino le ua molia e fa’apea, o lana gaioiga sa faia i lea aso sa le tusa lea ma le tulafono.

O lo o taofia pea i le toese i Tafuna ia Amituana’i e fa’atali ai le aso 19 Iuni lea ua fa’atulaga e lau ai lana fa’asalaga.

SASA LE ULU O LONA NEPHEW I LE AGAESE

O le ali’i lea na tu’uaia e le malo i lona fa’aaoga o se agaese e fa’aoo ai manu’a i lona nephew, ua ia ta’utino i le fa’amasinoga e moni ma fa’amaoni tu’uaiga fa’asaga ia te ia.

Na ulua’i tuuaia e le malo le ali’i o Setefano Petelo i le moliaga mamafa o le faaoolima i le tulaga lua, atoa ai ma moliaga mama e 2 o le faaoolima i le tulaga tolu atoa ai ma le fa’atupu vevesi i nofoaga faitele.

Ae i lalo o se maliliega na sainia e Petelo ma le malo, lea fo’i ua talia e le fa’amasinoga, ua malie ai le ua molia e tali ioe i le moliaga mamafa o le faaoolima i le tulaga lua. I le talia ai e le fa’amasinoga o le tali ioe a Petelo, na talosaga ai loa le malo ina ia solofua moliaga o loo totoe ai i le tagi sa latou fa’aulu fa’asaga i le ua molia.

Na ta’utino le ua molia e fa’apea, i se taimi o le aso 30 Ianuari 2018, sa tula’i mai ai se feeseeseaiga i lo latou aiga, ma ia fa’aaoga ai loa le agaese e faaoo ai manu’a i le ulu o lona nephew.

Na ta’utino atili Petelo e fa’apea, o lana gaioiga sa faia i lea aso sa le tusa lea ma ala o le tulafono.

O lo o taofia pea Petelo i le toese i Tafuna ina ua le mafai ona ia totogi le tupe e $10,000 na fa’atulaga e tatala ai o ia i tua, e fa’atali ai le aso 27 Iuni lea ua fa’atulaga e lau ai lana fa’asalaga.

TETE’E SE ALI’I SA GALUE I LE OFISA O TIUTE TU’UAIGA MALO

O le aso 20 Iulai lea ua fa’atulaga e toe valaau ai le mataupu a le susuga a Logona Tigilau, i le mae’a ai lea ona ia teena o moliaga fa’asaga ia te ia i luma o le Fa’amasinoga Maualuga i le vaiaso na te’a nei.

O Tigilau, lea sa galue muamua i le Ofisa o Tiute a le malo, o loo molia i moliaga mamafa e 3. O ia moliaga e aofia ai le umia faasolitulafono o mariuana, umia faasolitulafono o le aisa, atoa ai ma le umia faasolitulafono o mariuana ma le fa’amoemoe e tulei ma fa’atau atu i isi tagata.

O ia moliaga na alia’e mai i le fa’alavelave lea na maua ai e ali’i o le Ofisa o Tiute se afifi na aumai i se pusa meli ae fa’atuatusi mai i le isi fo’i sui tuai o le Ofisa o Tiute e suafa ia Fiatupu Tavai.

Ina ua fesiligia e Leoleo ia Tigilau i le masina na te’a nei, sa ia ta’utino ai e fa’apea, o ia e ana le afifi sa aumai ai mariuana, lea sa ia fa’aaogaina ai le pusa meli a lona nephew o Tavai e aumai ai.

O lo o tumau pea tuutuuga o loo tatala ai Tigilau i tua e fa’atali ai le aso o lana fa’amasinoga.