Tala otooto o Fa’amasinoga
CODY WOOD
Na fa’ailoa e le afioga i le ali’i Fa’amasino Sili ia Michael Kruse i le loia a Cody Wood, susuga William Olson i le vaiaso na te’a nei, e le aofia le fa’amasinoga i le mataupu e tatala ai pagota i tua mo maliu a ni isi o latou aiga. O le matafaioi tonu lava lea e gafa ma le Vaega Fa’amalosi Tulafono a le malo e aofia ai ma le Komesina o Leoleo.
O le mataupu i le tatalaina o pagota i tua mo maliu, na saunoa i ai Kruse ina ua valaau le mataupu a Wood i le aso Faraile na te’a nei. O le ali’i loia fautua ia Olson na tula’i mo Wood, lea o loo taofia pea i le toese i Tafuna, ina ua le mafai ona totogi le tupe na fa’atulaga e tatala ai o ia i tua. Ae o le tama’ita’i loia sili lagolago ia Christy Dunn na tula’i mo le itu a le malo.
Na faailoa e Kruse e fa’apea, na afua ona ia tuuina le mataupu a Wood i luga o le kalena, ona e 2 talosaga na ia maua mai le ali’i loia ia Olson mo se avanoa e tatala ai pagota i tua mo maliu.
Na fesili Kruse ia Olson poo ia fo’i lea e tauaveina le mataupu a Thomas Siaumau, na tali le ali’i loia ioe. Sa i ai Siaumau i totonu o le potu fa’amasino peita’i e le i valaauina lana mataupu.
Saunoa Kruse e fa’apea, afai e talia e le Vaega Fa’amalosi Tulafono le tatalaina i tua o pagota e auai i maliu a ni isi o aiga e pele i o latou loto, ae i ai ma le Leoleo, e le afaina lea tulaga i le faamasinoga.
O taimi uma e tatala ai i tua le pagota ae i ai ma le Leoleo, e tusa lava o loo i ai pea le pagota i lalo o le vaavaaiga a le malo.
“E le aofia fua le fa’amasinoga i mataupu e tatala ai pagota i tua mo maliu. O le matafaioi lena a le Vaega Faamalosi Tulafono, afai e finagalo le Komesina o Leoleo e tatala i tua pagota e auai i maliu, e le afaina lena tulaga i le Fa’amasinoga. E le o se tiute fo’i o le Fa’amasinoga le faia o ni fa’aiuga e tatala ai tagata o loo loka i tua mo maliu,” o le saunoaga lea a Kruse.
E talitonu le Samoa News, na faila e le ali’i loia ia Olson talosaga mo Wood ma Siaumau, ina ia mafai ai ona auai atu i laua i toe sauniga o e pele i o la loto ua fai i lagi le folauga.
PAULO PAULO JR
O le ali’i talavou lea na pu’e fa’apagota mai e Leoleo i Atu’u i le tausaga na te’a nei, ina ua maua o loo ia tulei ma fa’atauina atu i tagata faigaluega o le kamupani i’a sikaleti mariuana, ua fa’asalaina nei o ia e le fa’amasinoga e taofia i le falepuipui i Tafuna mo le umi e 12 masina.
O le vaiaso na te’a nei na fofogaina ai e le afioga i le ali’i Fa’amasino Sili ia Michael Kruse le fa’asalaga o Paulo Paulo Jr, i le mae’a ai lea ona ta’usala o ia i le moliaga mamafa o lona umia fa’asolitulafono lea o vaega o le laau fa’asaina o le mariuana.
E 5 tausaga na manatu le fa’amasinoga e fa’asala ai Paulo Jr i le toese i Tafuna, peit’ai, na faamalumalu e le fa’amasinoga le tuliina o lea fa’asalaga, ae ua faanofovaavaaia o ia mo le 5 tausaga i lalo o poloaiga e ao ona ia usita’i i ai.
O se tasi o ia poloaiga, o lona tuliina lea o masina e 20 i le toese, peita’i, o le a na o le 12 masina na te tuliina, e aofia ai ma le umi lea na taofia ai o ia i totonu o le toese. O le 8 masina o loo totoe, o le a pule atu lava le fa’amasinoga i le taimi ma le auala e tuli ai.
O le ali’i loia fautua ia Michael White na tula’i mo Paulo Jr, ae o le tama’ita’i loia sili lagolago ia Christy Dunn na tula’i mo le itu a le malo.
Ina ua maua le avanoa e fa’atoese ai i luma o le fa’amasinoga, na faailoa ai e le ua molia lona matua salamo e tusa ai o lana solitulafono sa faia, ma ua ia manaomia se isi avanoa e toe fo’i atu ai i tua e tausi lona aiga. Na ta’utino le ua molia, na te le toe faia lenei solitulafono.
Na lagolago White i le talosaga a Paulo Jr, ma ia talosagaina ai afioga i ali’i fa’amasino ina ia faamama se faasalaga mo Paulo Jr, ina ia maua ai le avanoa e toe fo’i atu ai o ia e tausi lona aiga. Sa ia faailoa fo’i i le fa’amasinoga, e 8 masina na taofia ai le ua molia i le toese, a o fa’atalitali ai se faaiuga o lana mataupu, pe le mafai ona fa’aaoga lea taimi e fai ma ana fa’asalaga.
Na talia e le loia a le malo le talosaga ina ia faanofovaavaaia le ua molia. Na faailoa atili e le loia a le malo e fa’apea, o Paulo Jr na fanau i Samoa, ae na aumaia o ia ma tupu a’e ai iinei ina ua fa’atoa 4 tausaga lona matua. Sa finau Dunn i le fa’amasinoga ina ia vaavaai i le tulaga matuia ua i ai le solitulafono o le tagofia lea o fualaau fa’asaina i le taimi nei, ina ia fuafua i ai se faaiuga mo Paulo Jr, ma poloaina ai o ia ina ia toe fo’i i Samoa.
O se tasi o tuutuuga o le nofovaavaaia a Paulo Jr, o lona totogi lea o le salatupe e $2,000, aua ne’i ona toe tagofia fualaau fa’asaina poo le ‘ava malosi, a ia avea o ia o se tasi e tausisi i tulafono a le malo i taimi uma.
Afai ae mae’a ona tuli lana fa’asalaga fa’a falepuipui e 12 masina, ona ia tuua lea o le teritori ae toe fo’i atu i lona aiga i Samoa. Peita’i, ua manatu le fa’amasinoga o le a taofi le fa’ataunu’uina e le ua molia o lea tuutuuga, fuafua lava i lona usitaia o tuutuuga uma o lana nofovaavaaia.
Afai ae magalo mai le toese, e 90 aso lea ua tuu atu e le fa’aasinoga ia Paulo Jr e saili ai sana galuega ma galue tumau ai loa. O le galuega tumau, e le aofia ai fa’atoaga a le aiga.
OKETI POLEVIA
E 2 tausaga lea ua fa’anofovaavaaia ai e le fa’amasinoga maualuga ia Oketi Polevia, ina ua ta’usala o ia i le moliaga mama o le gaoi. Na ulua’i tu’uaia e le malo Polevia i le moliaga mamafa o le gaoi, ae i lalo o se maliliega sa latou sainia ma le malo, na ia malie ai e tali ioe i le moliaga mama o le gaoi.
I le tali ioe ai o le ua molia, sa ia ta’utino ai e fa’apea, i le va o le aso 22 Aokuso ma Setema 15, 2017, na ia gaoia ai pusa susu e 56 o le “Similac baby formula milk” mai se faleoloa i Iliili. O le tau aofa’i o oloa sa ia gaoia e tusa ma le $1,232.
Ina ua fesiligia e le afioga i le ali’i fa’amasino sili ia Michael Kruse le ua molia, poo fea na ave i ai pusa susu sa ia gaoia, na tali le ua molia, “Na fa’aaoga e fafaga ai la’u pepe.”
O le masina o Tesema o le tausaga na te’a nei na fa’atulaga e lau ai le fa’asalaga a Polevia. Peita’i ina ua oo i le aso na lau ai lana fa’asalaga, na manatu ai le fa’amasinoga e tuu atu le 6 masina e totogi ai Polevia le tupe mo oloa na ia gaoia, fa’atoa tuu atu ai se faasalaga.
Ina ua toe valaau lana mataupu i le vaiaso na te’a nei, na faamaonia ai lana loia ia Michael White, ua mae’a ona totogi e le ua molia le tupe mo le tau o oloa na ia gaoia. Ona o lea tulaga, ua faanofovaavaaia ai loa o ia mo le 2 tausaga.