Ads by Google Ads by Google

Tala otooto o Fa’amasinoga

ausage@samoanews.com

IOAKIMO FELISE

 

O le aso 19 Iulai lea ua fa’atulaga e toe tula’i ai le ali’i e 55 tausaga le matua lea o loo tuuaia i lona faia o uiga mataga i se teineititi e 10 tausaga i luma o le Fa’amasinoga Maualuga, mo le isi iloiloga o lana mataupu.

 

O le vaiaso nei na toe valaau ai le mataupu a Ioakimo Felise i luma o le fa’amasinoga maualuga mo lana iloiloga masani. Ina ua valaau lana mataupu, na fa’ailoa e lana loia fautua ia Michael White i le fa’amasinoga, le mae’a lea ona ia tauaao o mau faamaonia mai le malo e uiga i le tagi fa’asaga ia Felise, atoa ai ma le ofa ua manatu le malo e tali ioe i ai le ua molia.

 

Na talosaga le ali’i loia i le fa’amasinoga mo se avanoa e toe tolopo ai le mataupu a Felise, ina ia maua ai le avanoa la te talanoa ai i le ofa a le malo.

 

Na talia e le afioga i le ali’i fa’amasino sili ia Michael Kruse le talosaga, ma toe faatulaga ai loa le mataupu a Felise e fofogaina i le aso 19 Iulai.

 

O Felise o loo tuuaia i moliaga eseese e aofia ai le faiaiga faamalosi ma se teineititi e i lalo o le 12 tausaga le matua, faia o uiga mataga, atoa ai ma le tagofia o itutinosa o se teineititi.

 

O ia moliaga na afua mai i se fa’alavelave na tula’i mai i le masina o Aperila o le tausaga nei, ona o le fa’alavelave lea o loo tuuaia ai o ia, i lona ave lea o le teineititi na a’afia i luga o se togavao i Nuuuli ae fai i ai uiga mataga.

 

Na taua e le teineititi na a’afia i Leoleo e fa’apea, ua fa’atele ona faia e Felise le amio lea ia te ia. O le taimi lava e mae’a ai ona ia faia ia uiga ia te ia, na te avatu ai loa ia te ia le tupe e fa’atau ai lana meaai i le aoga.

 

PANAPA LOLO

 

O le vaiaso na te’a nei na taofia ai e Leoleo se ali’i mai Leone, ona o tu’uaiga i lona taumafai lea e faaoolima i lona tuafafine, e mafua mai ina ua otegia e lona tuafafine o ia i lona le mafaufau ma lona aia o le taumafataga a lo latou Tama.

 

O le tulaga e sili ai ona matuia tuu’aiga fa’asaga i lenei ali’i, o lona togiina lea o lona tuafafine i se ipu, ae o loo si’i e lona tuafafine lana pepe e 2 masina le matua.

 

E 3 moliaga mama na tu’uaia ai e le malo ia Panapa Lolo, ina ua tula’i i luma o le Fa’amasinoga Fa’aitumalo i le vaiaso na te’a nei. O ia moliaga e aofia ai moliaga e 2 o le fa’aoolima i le tulaga tolu, ma le moliaga e tasi o lona faia lea o gaioiga e save’u ai le filemu i totonu o lona aiga.

 

O le teena ai e le ua molia o tu’uaiga fa’asaga ia te ia, na fa’atulaga ai loa e le afioga i le Tama’ita’i Fa’amasino ia Gwen Tauiliili-Langkilde le isi ana iloiloga e faia lea i le amataga o le masina fou o Iulai.

 

Na faia fo’i le poloaiga e tatala ai Panapa i tua e aunoa ma se tupe e totogi, i lalo o tuutuuga e ao ona ia usita’i i ai. O ni isi o ia tuutuuga e aofia ai le fa’asa lea ona ia toe taumafai e faia ni gaioiga e fa’afefe ai lona tuafafine, pe taumafai fo’i e faaoolima ia te ia. Ua poloaina o ia e tausi le filemu i totonu o lona aiga, ma ia auai i soo se taimi e valaau ai lana mataupu.

 

O le mataupu lenei na tofu atu i le Ofisa o Leoleo i Leone, ina ua talosagaina e le tama’ita’i na a’afia se fesoasoani, e mafua mai ina ua fefe i lona tuagane.

 

Na fa’amatala e le tama’ita’i na a’afia i Leoleo e fa’apea, o le vevesi na amata mai ina ua ‘ai e lona tuagane le mea’ai a le latou Tama. Ona ia alu lea ma fai i ai, i lona le mafaufau ma le mea ua ia faia. Ae na avea lea ma itu na ita ai le ua molia, ma ia togiina ai loa lea o ia i le ipu, ao ia sii lana pepe e 2 masina le matua.

 

O le vave o le ‘alo a le tama’ita’i na misi ai le togi a le ua molia. Na sosoo ai loa lea ma le lafo atu e le ua molia o upu palauvale ia te ia, sosoo ai ma le alu atu o le a fasi o ia. Na taua e le tama’ita’i i Leoleo e faapea, na ona savali atu lava o lona tuagane e fasi o ia, alu loa i le atoa i totonu o lona potu ma loka mai le faitoto’a

 

Sa ia taua i Leoleo lona matua fefe tele ina ne’i fasi o ia e lona tuagane. Sa ia taua fo’i i Leoleo e fa’apea, o loo ia masalomia le fa’aaoga e lona tuagane o le fualaau fa’asaina o le aisa. Sa ia talosaga i Leoleo, afai e le lokaina lona tuagane, e i’u lava ina pa’i atu lona lima ia te ia.

 

Mo le puipuiga o le saogalemu o le tama’ita’i ma lana tama, na faia ai loa le fa’aiuga a taofia Panapa i le falepuipui, e fa’atali ai le taimi e tula’i ai i luma o le Fa’amasinoga Faaitumalo i le taeao e sosoo ai.

 

RINTEL IATALA

 

O Iuni 28 lea ua fa’atulaga e toe tula’i ai le ali’i o Rintel Iatala i luma o le Fa’amasinoga Fa’aitumalo mo le isi iloiloga o lana mataupu. O le vaiaso na te’a nei na taofia ai e Leoleo Iatala, ona o tu’uaiga i lona fealua’i lea ma se agaese i luga o le alatele, atoa ai ma lona faia o ni gaioiga e save’u ai le nofo lelei i totonu o lona aiga.

 

Na teena e Iatala le moliaga o le fa’atupu vevesi i nofoaga faitele atoa ai ma le fa’aoolima i le tulaga tolu, ina ua tula’i i luma o le Fa’amasinoga Fa’aitumalo i le aso Tofi na te’a nei.

 

I lona teena ai o tu’uaiga fa’asaga ia te ia, na faia ai loa e le afioga i le Tama’ita’i Fa’amasino ia Gwen Tauiliili-Langkilde le poloaiga, ina ia taofia pea o ia i le falepuipui i Tafuna mo le 2 vaiaso, sei vagana ua mae’a ona faia siaki a Foma’i i le tulaga o lona mafaufau, ona fa’atoa mafai lea ona tatala o ia i tua.

 

O lenei mataupu na tofu atu i le Ofisa o Leoleo i Fagatogo, ina ua talosagaina e se molimau se fesoasoani a Leoleo, i le mae’a ai lea ona vaaia o Iatala o loo fealua’i ma se agaese i le auala e aga’i atu i Amouli ma faasolo atu ai i Aoa.

 

Na taunu’u Leoleo ma maua ai le avanoa e talanoa ai ma le Tina a le ua molia i lona maota, lea na fa’ailoa ane ai e le Tina lona fefe tele i le taimi na fealua’i ai lana tama ma le agaese i lona lima. Na taua e le Tina i Leoleo e fa’apea, o Rintel sa ‘ona i le aso ua tuana’i, ma alu atu ai loa i le fale ma amata ona laulauvavale solo, sosoo ai ma lona taei solo o fagupia i luma o le fale.

 

Na taua fo’i e le Tina na alu atu o Rintel ma aumai le agaese, ona ia tipi ai lea o le uaea tautau lavalava, sosoo ai loa ma lona fealua’i ma le agaese i luga o le auala.

 

Na fiu Leoleo e saili Rintel i le aso lea e lei maua, ae ina ua sauni Leoleo e toe fo’i, na fa’afuase’i ai ona latou vaaia le ua molia o loo alu atu i lana ta’avale. Na taofi e Leoleo le ta’avale a le ua molia ae auina atu loa o ia i le ofisa o Leoleo i Fagaitua ma faatalatalanoa ai.

 

O le mae’a ai o lea fa’atalatalanoaga, na taofia ai loa Rintel i le toese i Tafuna, e fa’atali ai le taimi e tula’i ai i luma o le Fa’amasinoga i le taeao e sosoo ai. Na taua fo’i i fa’amaumauga a Leoleo le malosi o le ‘ava malosi sa fa’alogoina i le tino o le ua molia.