FA’AILI MATAU

O le ali’i lea na tau sailia e le Fa’amasinoga Maualuga talu mai le masina o Aperila na te’a nei, e mafua mai ina ua le savali i ana folafolaga sa tuuina atu i le Fa’amasinoga, ua toe taofia nei o ia i le falepuipui e aunoa ma se tupe e tatala ai i tua, e faatali ai le aso 20 Iuni lea ua fa’atulaga e faia ai lana ulua’i iloiloga.

O le vaiaso nei na mafai ai ona pu’e fa’apagota e Leoleo ia Fa’aili Matau, poo “Whistle” fo’i e pei ona iloa ai e le to’atele, i lalo o se poloaiga mai le afioga i le ali’i Fa’amasino Sili ia Michael Kruse, ma tula’i ai loa i luma o le fa’amasinoga i le aso Lua na te’a nei.

Ina ua valaau le mataupu a Matau, sa faailoa e lana loia fautua ia Ryan Anderson le tete’e o ia i tu’uaiga a le malo, o lona le usita’i lea o tuutuuga o lana nofovaavaaia, ma ua fa’atulaga ai loa lana ulua’i iloiloga e faia lea i le aso 20 Iuni.

O le masina o Aperila na te’a nei na faila ai e le malo le talosaga i luma o le fa’amasinoga, mo se poloaiga e fa’aleaoga ai tuutuuga o le nofovaavaaia a Matau, e mafua mai i le le tausisi o Matau i tuutuuga o lana nofovaavaaia.

O ia tuutuuga e aofia ai le fa’asa lea ona ia toe tagofia fualaau faasaina poo le ‘ava malosi.

Na taua i se ripoti a le Ofisa Faanofovaavaaia e fa’apea, o le aso 26 Mati 2018 na lau ai le fa’asalaga a Matau i luma o le fa’amasinoga maualuga, i le mae’a ai lea ona ta’usala o ia i le moliaga o le umia faasolitulafono o vaega o fualaau fa’asaina o le aisa.

O le aso na lau ai lana fa’asalaga, na faia ai fo’i ma le poloaiga e tatala ai o ia i tua, ae fa’aaoga le umi e 4 ma le afa masina na taofia ai o ia i le falepuipui e fai ma ana fa’asalaga. O ni isi o tuutuuga o lana nofovaavaaia e 5 tausaga, o le fa’asa lea ona toe tagofia fualaau fa’asaina.

Sa poloaina fo’i o ia ina ia faia se suega i lona tino ina ia faamaonia ai, na te le o toe tagofia fualaau fa’asaina ma le ‘ava malosi.

I le tuana’i ai o nai aso talu ona tatala i tua Matau mai le falepuipui, na faia ai loa e sui o le ofisa faanofovaavaaia se suega i lona tino, na fa’amaonia ai lona tagofia o le pauta o le aisa.

I le aso na lau ai lana fa’asalaga, na ta’utino ai Matau i le fa’amasinoga, na te le toe faia le solitulafono e pei ona ta’usala ai o ia. Na talia fo’i e le fa’amasinoga lana talosaga, mo se avanoa e fo’i ai i tua e tausi lona tama ma lona tuafafine e a’afia uma i laua i le ma’i.

SOSENE SAUVAO

E 10 aso lea ua faasala ai e le Fa’amasinoga Fa’aitumalo le ali’i o Sosene Sauvao, ina ua ta’usala o ia i le moliaga o le faatupu vevesi i nofoaga faitele ao faanofovaavaaia ai o ia mo le 12 masina.

I le tuuina atu ai o le fa’aiuga a le fa’amasinoga faaitumalo fa’asaga ia  Sauvao i le vaiaso na te’a nei, na poloaina ai loa Sauvao ina ia taofia o ia i le toese mo fa’aiuga o vaiaso e 5, ina ia mafai ai ona tuli lana fa’asalaga e 10 aso, ae tatala ai le avanoa mo ia i aso o le vaiaso e faigaluega ai ma tausi lona aiga.

O le fa’alavelave e pei ona ta’usala ai Sauvao, na mafua mai ina ua ia toe fa’aoolima i lana uo tama’ita’i, e ui o lea na poloaina o ia e aua ne’i ona toe faia ni uiga tau fa’amata’u i lea tama’ita’i, talu mai le mataupu na ta’usala ai o ia i le faaiuga o le tausaga na te’a nei i le moliaga o le faaoolima i le tulaga tolu, e mafua mai ina ua ia fa’aoolima i lana uo tama’ita’i.

Na faailoa e le ali’i fa’amasino ia Fiti Sunia ia Sauvao e fa’apea, o le isi taimi e toe molia atu ai o ia i le fa’amasinoga i lona fa’aauau pea lea ona fa’aoolima i lana uo tama’ita’i, o le a sili atu loa le mamafa o le fa’asalaga la te fetaia’i.