Ads by Google Ads by Google

Tala otooto o Fa’amasinoga


[ata: foa'i]
ausage@samoanews.com

PIERCE SUAPILIMAI

 

O le taeao nei lea ua fa’atulaga e toe valaau ai le mataupu a le susuga ia Pierce Suapilimai i luma o le Fa’amasinoga Maualuga, ina ua fa’aalia e le ua molia i le vaiaso na te’a nei, e le i lelei ona fa’amalamalama atu e lana loia fautua ia te ia tuutuuga uma o le latou maliliega ua mae’a ona sainia ma le malo.

 

O le aso Faraile na te’a nei na tolaulauina ai i luma o le afioga i le ali’i Fa’amasino ia Fiti Sunia tuutuuga o le maliliega.

 

O le ali’i loia fautua lagolago ia Ryan Anderson na tula’i mo Suapilimai, lea o lo o taofia pea i le toese i Tafuna talu mai le taimi na pu’e fa’apagota ai o ia i le tausaga na te’a nei, ina ua le mafai ona ia totogi le tupe e $50,000 sa fa’atulaga e tatala ai o ia, ae o le ali’i loia sili lagolago ia Doug Iowe na tula’i mo le malo.

 

E lua tagi eseese o lo o tu’uaia ai Suapilimai. I le tagi muamua, o lo o molia i moliaga mamafa e 3 e aofia ai le umia faasolitulafono o vaega o le pauta fa’asaina o le aisa ma le fa’amoemoe e tulei ma fa’atau atu i isi tagata, umia faasolitulafono o vaega o le pauta fa’asaina o le aisa, atoa ai ma le umia fa’asolitulafono o vaega o le laau fa’asaina o le mariuana. O lo o tu’uaia fo’i Suapilimai i le moliaga mama o le umia faasolitulafono o se ‘aupega malosi.

 

I le tagi lona lua, o lo o molia ai o ia i moliaga mamafa e 2 o le umia fa’asolitulafono o vaega o le laau fa’asaina o le mariuana, atoa ai ma le moliaga o le gaoi.

 

Ae i lalo o se maliliega ua mae’a ona sainia e le ua molia, lea ua faamoemoe e toe fofogaina i luma o le afioga i le ali’i Fa’amasino Sili lagolago ia Fiti Sunia i le taeao nei, ua malie ai le ua molia e tali ioe i moliaga e 2 mai le tagi muamua, atoa ai ma le moliaga e tasi mai le tagi lona lua.

 

I le tagi muamua, ua malie le ua molia e tali ioe i le moliaga lona 2 lea ua toe teuteu e le malo, le moliaga o le umia faasolitulafono o vaega o le pauta fa’asaina o le aisa, faapea ai ma le moliaga lona 3 lea fo’i ua uma ona toe teuteu e le malo, le moliaga o le umia fa’asolitulafono o vaega o le laau fa’asaina o le mariuana.

 

I le tagi lona lua, ua ia malie ai e tali ioe i le moliaga muamua lea ua toe teuteu e le malo, le moliaga o le umia faasolitulafono o vaega o le laau fa’asaina o le mariuana

 

I le tali ioe ai o Suapilimai i moliaga e pei ona ia taua sa ia ta’utino ai i le fa’amasinoga e fa’apea, i se taimi o le aso 10 o Setema 2018, sa ia umia fa’asolitulafono vaega o fualaau fa’asaina o le aisa ma le mariuana.

 

Na ta’utino atili le ua molia e fa’apea, i le aso e pei ona taua, ina ua osofaia e Leoleo le fale sa i ai, sa maua ai e Leoleo vaega o fualaau fa’asaina. Sa ia ta’utino atili fo’i e fa’apea, e le gata sa maua e Leoleo i totonu o le fale fualaau fa’asaina, ae sa maua ai fo’i mea e faaaoga e tulei ma faatau ese atu ai fualaau fa’asaina i tagata lautele e pei o straws ua ta tipi tulimanu, faapea ai le anoanoa’i o tama’i pepa iila e utu i ai fualaau fa’asaina ma fa’atau atu.

 

E pei ona taua i tuutuuga o le maliliega a le ua molia ma le malo e fa’apea, na osofa’i e Leoleo le nofoaga sa nofo ai le ua molia i lalo o se poloaiga mai le fa’amasinoga. O lea poloaiga na talosagaina e Leoleo, i le mae’a ai lea ona taofia e Leoleo o se tama’ita’i ma molia i le umia faasolitulafono o fualaau fa’asaina.

 

I le aso la sa faatinoina ai le osofaiga a Leoleo, lea na aofia ai sui o le Vaega e Suesueina Fualaau fa’asaina sa fa’aaupegaina, sa latou osofaia ai le fale ma maua ai loa se vaega o fualaau fa’asaina ma mea e fa’aaoga e utu ai fualaau fa’asaina mo le tulei atu i isi tagata.

 

Ua talosagaina e le malo le fa’amasinoga ina fa’asala le ua molia i se fa’asalaga fa’a nofovaavaaia.

 

ALESANA LAFOGA

 

O le ali’i lea na tu’uaia i lona fa’aaoga o se ma’a e fa’aoo ai manu’a i le isi ali’i, ua ia ta’utino i le fa’amasinoga e moni ma fa’amaoni tu’uaiga fa’asaga ia te ia. O le vaiaso na te’a nei na tula’i ai Alesana Lafoga i luma o le fa’amasinoga maualuga mo le tolaulauina lea o le latou maliliega ma le malo.

 

Na ulua’i tu’uaia e le malo ia Lafoga i le moliaga mamafa o le faaoolima i le tulaga muamua. Ae i lalo o le maliliega na sainia e le ua molia ma le malo, na malie ai le ua molia e tali ioe i le moliaga muamua lea ua toe teuteu e le malo, le moliaga mamafa o le faaoolima i le tulaga lua.

 

I le tali ioe ai a Lafoga i le moliaga e pei ona ta’usala ai o ia e le fa’amasinoga sa ia ta’utino ai e fa’apea, i le aso 28 o Mati 2018 i Pavaiai, sa ia faaoolima ai ia Unasa ma manu’a ai o ia.

 

Na taua e le malo i le latou tagi e fa’apea, o le vevesi na mafua mai i se ta’aloga lakapi, peita’i na mafai lava ona toe teuteu se vevesi na tula’i mai i le va o Lafoga ma le susuga a Unasa na a’afia.

 

Peita’i o le po o le aso lava, ao nofo pea Lafoga ma le ita o lona o loto ia Unasa, na alu ai loa Lafoga i le fale o Unasa e fia talanoa ia te ia. Na amata le vevesi i se taugaupu i le va o Lafoga ma Unasa, sosoo ai loa ma le tu’i e Lafoga o Unasa ma pau ai i lalo.

 

A o ta’atia Unasa i luma tonu o le fasitepu o lona fale, na aapa atu Lafoga i le ma’a ma tu’i ai lona ulu ma tula’i mai ai loa ma se manu’a tuga i le ulu. E 3 aso na taofia ai Unasa i le falema’i i Fagaalu ona o le tau togafitiina o le manu’a tuga na a’afia ai o ia.

 

O lo o taofia pea Lafoga i le toese i Tafuna e fa’atali ai le taimi e toe tula’i ai luma o le fa’amasinoga maualuga i le masina fou mo le lauina o lana fa’asalaga.