VINE OLATAGA

O le aso 7 o Iuni lea ua fa’atulaga e lau ai le fa’asalaga a le susuga a Vine Olataga i le Fa’amasinoga Maualuga, i le mae’a ai lea ona ta’usala o ia i le moliaga mamafa o le fa’aoolima i le tulaga lua, i lalo o se maliliega na latou sainia ma le malo.

O Olataga, 52 tausaga le matua, na ulua’i tu’uaia i moliaga e 4 e aofia ai le moliaga mamafa e 1 o le faaoolima i le tulaga muamua, faatasi ai ma moliaga mama e 3 e aofia ai moliaga e 2 o le faaoolima i le tulaga tolu, ma le tu fua i le fanua poo le fale o le isi tagata e aunoa ma se fa’atanaga fa’aletulafono.

Ae i lalo o se maliliega na sainia e le ua molia ma le malo, na suia ai e le malo le mamafa o le moliaga e tali ioe ai Olataga, ina ia fa’ailoa ai le moliaga mamafa o le faaoolima i le tulaga lua, lea e mafai ona faasala ai se tasi i le toese mo le umi e le silia i le 5 tausaga, poo le fa’asala i le salatupe e le silia i le $5,000.

I le tali ioe ai o Olataga, sa ia ta’utino ai e fa’apea, i le aso 12 o Oketopa 2017 i Pava’ia’i, sa ia taina ai le papatua o se ali’i e 50 tausaga le matua la te tuaoi i le agaese ma manu’a tigaina ai o ia.

Na ta’utino atili Olataga e fa’apea, na ia faia lea gaoioiga ona o lona ita i le ali’i na a’afia, e mafua mai i se vevesi na tula’i mai i le fanua o loo ia fa’atoaina mo lana fa’atoaga i Pava’ia’i lava.

I le talia ai e le fa’amasinoga o le maliliega, na solofua ai loa moliaga e 3 o lo o totoe.

Na taua i faamaumauga o le maliliega e fa’apea, o le vevesi na tula’i mai i le va o Olataga ma le ali’i na a’afia, e mafua mai i le fanua sa fa’ato’a e Olataga mo lana fa’atoaga. I le aso na tula’i mai ai le fa’alavelave, na alu atu le na a’afia ma tuli ese Olataga ma le fanua, ma folafola i ai lona faia o se mea ia te ia pe afai e fa’aauau pea ona ia fa’ato’aina le fanua.

Na uma le tauga upu a Olataga ma le ali’i na a’afia, ma aga’i atu ai loa le na a’afia ma ta tipi i lalo talo ma fa’i o le fa’atoaga a Olataga, atoa ai ma lona fa’aleagaina o le tele o mea toto. Na fiu Olataga e talosaga atu i le ali’i na a’afia e taofi lana gaioiga o lo o faia, ae sa fa’aauau pea ona faia e lea ali’i.

E le i toe fa’atali Olataga ae na ia aapa atu loa i lana agaese ma ta ai loa le papatua o le na a’afia ma manu’a ai. Na alu i le atoa le na a’afia ma sulu i lona fale, peita’i sa tuliloa atu pea e Olataga o ia ma toe sasa faalua ai ona lima i le agaese.

Ua talosagaina e le malo le fa’amasinoga ina ia fa’atonu Olataga e totogi le tupe o le pili a le ali’i na a’afia e $1,207, ma ia poloaina fo’i Olataga na te tuua le atunu’u ae toe fo’i atu i Samoa, ma aumau ai mo le umi o lana fa’asalaga faanofovaavaaia o le a tuuina atu e le fa’amasinoga.

O lo o taofia pea Olataga i le toese i Tafuna i le taimi nei e aunoa ma se tupe e tatala ai i tua.

IEREMIA FINAUGA

E 5 tausaga lea ua nofovaavaaia ai le ali’i o Ieremia Finauga, i le mae’a ai lea ona ta’usala o ia e le fa’amasinoga i le moliaga mamafa o lona taofia faamalosi lea o se tagata i lalo o lana pule e aunoa ma se fa’atanaga fa’aletulafono.

Na ulua’i molia e le malo ia Finauga i moliaga mamafa e aofia ai le taumafai e faamalosi se tama’ita’i, tagofia o itutinosa o se tama’ita’i i le tulaga muamua, atoa ai ma lona taofia faapagota o se tama’ita’i.

Ae i lalo o le maliliega na sainia e le malo ma le ua molia, na malie ai le ua molia e tali ioe i le moliaga o lona taofia faamalosi o se tagata, ae solofua isi moliaga sa totoe ai i le tagi a le malo.

I le tali ioe ai o Finauga i le moliaga mamafa, na ia ta’utino ai e fa’apea, i le amataga o le 2017, sa ia taumafai ai e fai ni uiga mataga i se teineititi e 13 tausaga le matua latou te nonofo mau totogi fa’atasi i le Fale Mautotogi e tasi, e ala i lona taofia faamalosi lea o ia i totonu o le Fale Taele, ma ia taumafai e fai i ai uiga mataga fa’afeusuaiga.

O le vaiaso na te’a nei na tula’i ai Finauga i luma o le fa’amasinoga maualuga mo le lauina o lana fa’asalaga.

Ina ua maua lona avanoa mai le fa’amasinoga, sa ia fa’atoese ai e tusa i lana solitulafono sa faia. Sa ia taua i le fa’amasinoga e fa’apea, o masina e 21 sa taofia ai o ia i le toese talu mai le taimi na loka ai o ia, ua fai ma lesona aoga mo lona olaga, ma ua ia iloa ai, e le o se mea lelei le soli o le tulafono a le malo.

Na finau lana loia fautua ia Ryan Anderson i le fa’amasinoga ina ia fa’anofovaavaaia Finauga mo le 5 tausaga, ae fa’aaoga masina e 21 na taofia ai o ia i le toese e fai ma ana fa’asalaga i lenei mataupu. Na lagolagoina e le loia a le malo ia Laura Garvey le talosaga a Anderson, ma ia taua ai le agava’a o le ua molia i se fa’asalaga fa’anofovaavaaia.

Na taua a le malo e fa’apea, o se tasi o itu e sili ona lelei o lenei mataupu, e leai se tulaga matuia na a’afia ai le tama’ita’i na a’afia mai gaioiga a le ua molia. Pau le talosaga a le malo sa tuuina atu i le fa’amasinoga, ia faatonu Finauga e aua ne’i ona toe taumafai e fa’afesoota’i le teineitiiti na aafia poo lona aiga i soo se auala, ma ia taumamao ese fo’i mai le teineititi na a’afia i soo se taimi na te vaaia ai o ia.

O nisi o tuutuuga o le fa’asalaga faanofovaavaaia a Finauga, o lona tuliina lea o masina e 20 i le toese i Tafuna. Ae talu ai e 21 masina na taofia ai le ua molia i le toese e faatalitali ai se faaiuga o lana mataupu, na faia ai loa le faaiuga a le fa’amasinoga, ina ia fa’aaoga le umi lea e fai ma ana faasalaga i lenei mataupu.

O le vaiaso lava na te’a nei na tatala ai i tua Finauga, ma ua tuuina atu aso e 90 e saili ai sana galuega tumau e totogi ai lana salatupe e $1,000. Ua fa’asa ona ia toe soli se tulafono a le malo, fa’asa fo’i ona ia toe tagofia le ‘ava malosi poo fualaau faasaina.