Ads by Google Ads by Google

Tala otooto o Fa’amasinoga


[ata: foa'i]
ausage@samoanews.com

ONOSA’I MOLESI

 

O le aso 6 o Iuni lea ua fa’atulaga e lau ai le fa’asalaga a le susuga a Onosa’i Molesi i luma o le fa’amasinoga maualuga, i le mae’a ai lea ona ia tali ioe i le moliaga sa tu’uaia ai o ia e le malo, i lalo o se maliliega na latou sainia ma le malo, ma talia fo’i e le fa’amasinoga.

 

Na ulua’i tu’uaia e le malo ia Molesi i moliaga mamafa e 2 o le tagofia o itutinosa o se tama’ita’i e laititi i lalo o le tulafono, tasi le moliaga o le faia o uiga mataga fa’afeusuaiga, ma le isi moliaga e tasi o lona taofia faapagota lea o se tagata i lalo o lana vaavaaiga. Ae i lalo o se maliliega na sainia e le ua molia ma le malo, na malie ai Molesi e tali ioe i le moliaga mamafa o lona tagofia lea o itutinosa o se tama’ita’i e laititi i lalo o le tulafono, o le vaega C lea o solitulafono mamafa, lea e mafai ona fa’asala ai o ia i le toese mo le umi e le silia i le 7 tausaga, pe fa’asala fo’i i le salatupe e le silia i le $5,000.

 

I le tali ioe ai o Molesi i le moliaga e pei ona ta’usala ai o ia, sa ia ta’utino ai i le fa’amasinoga maualuga e fa’apea, i le aso 21 o Setema 2017, sa ia tagofia ai itutinosa o se teineititi e 13 tausaga le matua.

 

Na taua e le malo i le latou tagi e fa’apea, o le mataupu lenei na ripotia atu e le Tina o le teineititi na a’afia i Leoleo, ina ua fa’amatala e le teineititi i lona Tina gaiogia a Molesi sa fai atu ia te ia i le po ua mavae.

 

O Molesi e pei ona taua e le malo i le latou tagi, e nofo i le fale e tuaoi ma le fale o le teineititi na a’afia, o ia fo’i o le uo a le Tama o le teineititi na a’afia. E masani ona alu Molesi e matamata TV i le fale o le teineititi na a’afia.

 

I le po na tula’i mai ai le fa’alavelave, na aga’i atu ai Molesi i le fale o le teineititi na a’afia e matamata le TV, peita’i e taunu’u ane e le o i ai matua o le teineititi na a’afia i le fale, se’i vagana ai le teineititi o loo moe i luga o le nofoa o loo i totonu o le potu malolo.

 

E le i toe faatali le ua molia ae ua aga’i atu loa ma ia tagofia itutinosa o le teineititi na a’afia. Na te’i le teineititi i luga ina ua ia faalogoina se tagata o lo o mamafa atu i lona manava, ae ina ua ala i luga, sa ia vaaia ai Molesi o loo tu i ona luma. Na ee le teineititi ma ia tuli i fafo Molesi ma le fale, o lea na tu ai loa i luga Molesi ma alu i fafo ma le fale. Na taua fo’i e le teineititi na a’afia i Leoleo lona fa’alogoina o le malosi o le manogi ‘ava malosi sa sau mai le tino o Molesi.

 

Ina ua taunu’u matua o le teineitiiti i le latou fale i le po lea, sa faailoa ai loa e le teineititi na a’afia le faalavelave na tula’i mai, ma faila ai loa e le Tina lana tagi fa’asaga ia Molesi i le po lava lea, ma pu’e fa’apagota ai loa e Leoleo le ua molia i le po lava lea mai lona fale, ma taofia ai loa i le toese i Tafuna.

 

O lo’o taofia pea Molesi i le toese ina ua le mafai ona totogi le $10,000 na fa’atulaga e le fa’amasinoga e tatala ai i tua.

 

O le ali’i loia fautua lagolago ia Rob McNeill na tula’i mo Molesi, ae o le tama’ita’i loia sili lagolago ia Laura Garvey na tula’i mo le malo.

 

TOE AAFIA FO’I PANAPA LOLO I LE TULAFONO

 

O le ali’i lea na ia togiina lona tuafafine i se ipu ti i le tausaga na te’a nei, ua toe aafia fo’i o ia i le tulafono i le vaiaso na te’a nei.

 

O le aso 6 o Me lea ua fa’atulaga e toe tula’i ai le susuga a Panapa Lolo i luma o le fa’amasinoga fa’aitumalo, ma ua taofia nei o ia i le toese se’i vagana ua ia totogiina le $1,000 o na fa’atoa mafai lea ona tatala o ia i tua mai le falepuipui i Tafuna.

 

O mataupu fa’asaga ia Lolo e aofia ai le tusi saisai sa tuuina atu e le fa’amasinoga, ina ua le auai i lana iloiloga i le 2016, o le tagi fa’asaga ia te ia ina ua ia togiina lona tuafafine i le ipu ti, faapea ai ma le tagi fou lea na fa’atoa alia’e mai i le vaiaso na te’a nei.

 

O loo molia Lolo i moliaga o le faaoolima i le tulaga tolu, faatupu vevesi i totonu o lona aiga, faatupu vevesi i nofoaga faitele, faia o gaioiga e lamatia ai le saogalemu o fanau, tete’e atu i Leoleo a’o pu’e fa’apagota o ia, faapea ai ma le fa’aleaga meatotino.

 

O moliaga nei na afua mai i se fa’alavelave na tula’i mai i le tausaga na te’a nei, ina ua togi e Lolo lona tuafafine i le ipu ti ao sii e lona tuafafine lana tama e 2 masina le matua.

 

Ae i le mataupu fou e pei ona toe pu’e fa’apagota ai e Leoleo ia Lolo i le vaiaso na te’a nei, na alia’e mai ina ua alu atu le ua molia e aitalafu mai se $100 mai lona Tina, ae fai i ai lona Tina e le o i ai sana tupe i lana ato.

 

O le ita tele o Lolo na mafua ai loa ona ia faasaga atu ma po lona niece e tasi le tausaga le matua ma pau ai o ia i lalo, ae o le itu na laki ai, o le vave o le gaioi o le Tina o le pepe na mafai ai ona ia sapo lana tama ma le mafai ai ona tau lona ulu i luga o le fola sima o le fale.

 

Ina ua taunu’u Leoleo, sa latou fa’alogoina le fesiligia e Lolo o lona Tina, pe aisea na ia faafesoota’iina ai Leoleo. Na taumafai le isi Leoleo e loka lima o Lolo peita’i sa tete’e le ua molia ma ia taumafai e una’i ese lima o le Leoleo ina ia le mafai ai ona pu’e faapagota o ia ma sola ese ai loa le ua molia mai Leoleo, ma toe fo’i ai loa Leoleo i le ofisa.

 

Pe tusa o le itula talu ona tuana’i lea gaioiga, ae toe logo e le aiga o Lolo le ofisa o Leoleo ma faailoa i ai, o Lolo o loo taumafai e faatupu le vevesi i totonu o le latou aiga. Na kiki e Lolo le faitoto’a pito i luma o le fale ma ia folafola le fasiotiiina o tagata o lona aiga.

 

Na logoina se vaega to’atele o Leoleo mo se fesoasoani ma aga’i atu ai loa se vaega to’atele o Leoleo e pu’e faapagota le ua molia. Na loka e matua o Lolo faitoto’a pito i luma ma tua o le fale ina ia faigata ai e le ua molia ona sola i fafo ma le fale.

 

Na taunu’u Leoleo ma latou maua atu ai Lolo i totonu o le fale, ma pu’e fa’apagota ai loa o ia i le taimi lava lea. Na faailoa e le aiga i Leoleo, latou te le toe mana’omia le ua molia ina ia toe tatala atu i tua i le latou aiga, ona o popolega ina ne’i tula’i mai ai se fa’alavelave matuia ma a’afia ai se isi i se taimi o i luma.

 

O loo taofia pea Lolo i le toese i Tafuna se’i vagana ua ia totogi le tinoitupe e $1,000 ona fa’atoa mafai lea ona tatala o ia i tua.