APELU ELETISE

O le aso 30 o Me lea ua faatulaga e lau ai le fa’asalaga a le susuga a Apelu Eletise, i le mae’a ai lea ona ta’usala o ia e le Fa’amasinoga Maualuga i le vaiaso na te’a nei i le moliaga mamafa o le fa’aoolima i le tulaga lua, i lalo o se maliliega na latou sainia ma le malo, lea fo’i ua talia e le fa’amasinoga.

Na ulua’i tu’uaia e le malo ia Eletise i moliaga mamafa e 2, le moliaga o le faaoolima i le tulaga lua atoa ai ma le moliaga o le gaoi, ae i lalo o le maliliega na sainia e le ua molia ma le malo, na malie ai Eletise e sui lana tali i le moliaga mamafa o le faaoolima, ae solofua e le fa’amasinoga le moliaga o le gaoi.

I le tali ioe ai o Eletise i le moliaga o le faaoolima i le tulaga lua, na ia ta’utino ai e fa’apea, i le aso 21 o Fepuari 2018, na faaoo ai ni manu’a tuga ia Filipo Tafito o Nuuuli, e ala i lona fa’aaoga o se laupapa e ta faalua ai lona ulu.

I tuutuuga o le maliliega o lo o taua ai e faapea, i le 2 vaiaso ao lei oo atu i le aso 21 o Fepuari na tula’i mai ai le faalavelave, na masalomia ai e Tafito ia Eletise i lona talepeina lea o lona fale taavale ae gaoi le tele o mea faigaluega e alu i le uila sa loka ai.

Na faailoa e se molimau fa’atuatuaina ia Tafito lona vaai tino lava o talepe e Eletise lana fale taavale ae gaoi le anoano o mea faigaluega e alu i le uila sa loka ai. Na taua ataili fo’i e le molimau ia Tafito e faapea, o isi o mea faigaluega na gaoi e Eletise na alu atu ma fa’atau atu ia te ia i le ta’i $20 i le mea faigaluega e tasi, peita’i sa ia teena ona sa ia iloa lelei, o oloa gaoi o loo taumafai Eletise e tulei solo i tagata masani.

O le po o le aso Faraile, Fepuari 20, na fesiligia ai e Tafito ia Eletise i luma o le Fale Piliaki i Fagatogo i le mafuaaga na ia osofaia ai lona fale i Nuuuli, ma amata mai ai loa iina le tau vevesi o ali’i nei e to’alua.

I le po la o le aso na tula’i mai ai le fa’alavelave, na toe vaai ai fo’i Tafito ia Eletise i luma o se faleoloa i Nuuuli, ma ia toe fesiligia ai fo’i o ia i le mafua’aga na ia gaoia ai lona fale. Sa tele tala mamafa a Tafito ia Eletise, ae o le taimi lea o lo o inu ai Eletise ma ana uo e to’alua.

O iina na amata ai loa se fusuaga i le va o Eletise ma Tafito, ma toe fo’i ai loa Eletise i lona fale. I le tuana’i ai o le 30 minute talu ona mae’a le fusuaga, na vaaia ai le toe aga’i mai o Eletise ma se laupapa o loo uu i lona lima, ma ta ai loa le ulu o Tafito ao talanoa o ia ma se tasi o tamaloa i luma lava o le faleoloa Asia i Nuuuli na tula’i mai ai le fa’alavelave.

E faalua ona sasau e Eletise le laupapa ma manu’a ai le ulu o Tafito, ma faanatinati atu ai loa le na a’afia i le falema’i mo togafitiga, ona o le tulaga matuia o manu’a na aafia ai lona ulu ma lona lima.

Ua malilie itu e lua e finau i le fa’amasinoga mo se fa’asalaga faanofovaavaaia mo Eletise, peita’i ua manatu fo’i le malo e finau i le fa’amasinoga, e le gata ia totogi e Eletise le $653 na totogi mo le pili a Tafito, ae o le a talosaga foi ina ia toe faafoi Eletise i lona atunu’u na malaga mai ai o Samoa, ona o tulaga faaletonu i ona pepa nofomau.

O le tausaga e 2017 na mae’a ai le aoga o le ID a Eletise, ma e oo mai lava i le taimi nei e lei toe faafouina lava lona pepa nofomau.

O lo o taofia pea Eletise i le toese i Tafuna e fa’atali ai le aso e lau ai lana fa’asalaga, ina ua le mafai ona ia totogi le $10,000 na faatulaga e tatala ai o ia i tua.

HENRY ILALIO

E 20 masina lea ua faasala ai i le toese i Tafuna le ali’i o Henry Ilalio, ina ua ta’usala o ia e le fa’amasinoga maualuga i le moliaga o le umia faasolitulafono o vaega o le pauta faasaina o le aisa.

Na uluai molia Ilalio i moliaga mamafa e lua, o lona umia faasolitulafono o vaega o le pauta faasaina o le aisa, atoa ai ma lona umia faasolitulafono o vaega o le pauta faasaina o le aisa ma le fa’amoemoe e tuei ma fa’atau atu i si tagata.

Ae i lalo o le maliliega na sainia e Ilalio ma ua talia fo’i e le fa’amasinoga maualuga, na malie ai le ua molia e tali ioe i le moliaga mamafa lea ua toe teuteu e le malo, ina ia alia’e mai ai le moliaga o le umia faasolitulafono o vaega o pauta faasaina o le aisa, lea e mafai ona faasala ai o ia i le toese mo le umi e le sili atu i le 5 tausaga, poo le salatupe e le silia i le $5,000.

I le tali ioe ai o Ilalio i le moliaga e pei ona ta’usala ai o ia, sa ia ta’utino ai e faapea, i le aso 13 o Me 2018, na maua ai e Leoleo se paipa tioata o lo o i ai vaega o le pauta faasaina o le aisa i totonu o lana ta’avale.

Ina ua maua lona avanoa, na faatoese ai le ua molia e tusa ai o lana solitulafono, ma ia talosagaina ai se isi avanoa mo ia se’i fa’aauau ai lana tausiga i lana fanau ma lona aiga. Na taua e Ilalio e fa’apea, o masina e 11 talu ona taofia o ia i le toese e faatali ai se faaiuga o lana mataupu, ua ia aoaoina ai se lesona aoga mo lona olaga.

“Ua ou iloa nei, e leai lava se mea aoga e maua i le soli o le tulafono, poo le tagofia fo’i o fualaau fa’asaina,” o le molimau lea a Ilalio.

Na faailoa e lana loia fautua ia Rob McNeill i le fa’amasinoga e fa’apea, o Ilalio, o se ali’i ua 14 tausaga o Kamuta i le atunu’u ae o le sese o faaiuga na ia faia ua mafua ai ona aafia o ia i le tulafono.

Na talosaga McNeill faatasi ai ma le loia a le malo ia Laura Garvey i le fa’amasinoga mo se faasalaga faanofovaavaaia, lea fo’i na talia e le fa’amasinoga.

Saunoa le afioga i le ali’i Fa’amasino Sili Lagolago ia Fiti Sunia e fa’apea, o le faasalaga ua tuuina atu mo Ilalio, o loo fa’ailoa atu ai le naunau o le fa’amasinoga e tuu se avanoa mo Ilalio ina ia toe fuata’i ai lona olaga.

E 5 tausaga na manatu le fa’aasinoga maualuga e faasala ai le ua molia, peita’i ua faamalumalu lona tuliina o ia tausaga, ae ua faanofovaavaaia ai o ia i lalo o tuutuuga e ao ona ia usita’i i ai.

O ni isi o ia tuutuuga e aofia ai lona tuliina o masina e 20. E 12 masina lea ua manatu le faamasinoga e tuli e le ua molia, e aofia ai masina e 11 ua mae’a ona ia tuliina, ae o masina e 8 o loo totoe ai o lana faasalaga e 20 masina, o le a faamalumalu lona tuliina, fuafua lava i le usita’i o le ua molia i tuutuuga a le fa’amasinoga.

O isi tuutuuga e aofia ai le faasa lea ona ia toe tagofia le ava malosi poo fualaau fa’asaina, aua fo’i ne’i ona toe soli se tulafono.