Ads by Google Ads by Google

Tala otooto o Fa’amasinoga


[ata: foa'i]
ausage@samoanews.com

ONOSA’I AKERIPA

 

O le aso 26 o Aperila lea ua fa’atulaga e lau ai le fa’asalaga a le ali’i o Onosa’i Akeripa, ina ua ta’usala o ia e le fa’amasinoga i le moliaga mamafa o lona fa’afoeina lea o se ta’avale a o se’i e le fa’amasinoga lona laisene mo le 6 masina.

 

O le masina o Novema 2018 na ta’usala ai e le fa’amasinoga fa’aitumalo ia Akeripa i le moliaga mama o le ave ta’avale ‘ona, ma faanofovaavaaia ai loa o ia mo le 12 masina. O ni isi o tuutuuga o lana nofovaavaaia, o le fa’asa lea ona ia toe fa’afoeina se ta’avale mo le 6 masina.

 

I le masina o Ianuari 2019, na maua ai e Leoleo ia Akeripa o lo o ia fa’afoeina se ta’avale.

 

Na taua e Akeripa i le fa’amasinoga, na alu e kiliva ana fualaau’aina atoa ai ma ana meamata i faleoloa Asia e maua mai ai se tupe e tausi ai lona aiga ma lana fanau e to’a 7.

 

Na toe fa’amanatu e le fa’amasinoga ia Akeripa, tusa lava poo le a le mafua’aga na ia fa’afoeina ai le ta’avale, e tatau lava ona ia usitaia le poloaiga a le fa’amasinoga.

 

O le moliaga lea ua ta’usala ai Akeripa, e faamalosia ai lona tuliina o le fa’asalaga fa’a falepuipui e 90 aso i le toese i Tafuna, ae le mafai ona sili atu ma le 5 tausaga.

 

TOE A’AFIA FO’I ELLIOTT SIAUMAU JR I LE TULAFONO

 

O le vaiaso na te’a nei na toe tula’i ai le susuga a Elliott Siaumau Jr i luma o le Fa’amasinoga Fa’aitumalo, ona o ni tu’uaiga fou fa’asaga ia te ia, e mafua mai i le fa’alavelave lea ua tu’uaia ai o ia i lona fa’aoolima lea i se ali’i e 25 tausaga le matua.

 

Na tula’i Siaumau Jr mo lana ulua’i iloiloga i luma o le afioga i le ali’i Fa’amasino ia Elvis P. Patea. O le ali’i loia fautua lagolago ia Ryan Anderson na tula’i mo le ua molia, ae o le ali’i loia sili lagolago ia Jason Mitchell na tula’i mo le malo.

 

O lo o tu’uaia e le malo ia Siaumau Jr i le moliaga mamafa o le faomea i le tulaga muamua, lea e mafai ona fa’asala ai se tasi i le toese mo le umi e le itiiti ifo i le 10 tausaga ae le sili atu i le 30 tausaga, faapea ai ma moliaga e 2 o le gaoi ma le fa’aoolima i le tulaga tolu, o vaega A ia o solitulafono mama, lea e mafai ona faasala ai o ia i le toese mo le umi e le silia i le tasi le tausaga, poo le salatupe e le silia i le $1,000.

 

E $50,000 le tupe na fa’atulaga e le fa’amasinoga i luga o le tusi saisai na pu’e fa’apagota ai Siaumau Jr e totogi, ona fa’atoa mafai lea ona tatala o ia i tua. Afai ae mafai e le ua molia ona totogi le tupe, ua poloaina o ia e le fa’amasinoga e aua ne’i toe taumafai e fa’afesoota’i molimau a le malo ma aua ne’i ona toe soli se tulafono.

 

E pei ona taua i le tagi a le malo e fa’apea, o le afiafi o le aso 23 o Fepuari, 2019 na fa’afesoota’i ai e se Tina le Ofisa o Leoleo i Tafuna mo se fesoasoani, fa’asaga i lana tama e 25 tausaga le matua na fa’aoolima i ai Siaumau Jr. Na taua e le Tina i Leoleo, na sola ese Siaumau Jr ina ua mae’a ona ia fa’atino le solitulafono.

 

O le Tina na ia fa’afesoota’i le Ofisa o Leoleo mo se fesoasoani, o le aunty a Siaumau Jr.

 

E le i umi se taimi na va ai le telefoni a le Tina i Leoleo, ae vaaia loa e Leoleo le ulufale atu o le ali’i na a’afia i totonu o le Ofisa o Leoleo i Tafuna mo le tuuina atu o lana fa’amatalaga e tusa ai o le fa’alavelave sa tula’i mai.

 

Na maitauina e Leoleo se manu’a i luma o le muaulu a le ali’i na a’afia i le taimi na faia ai le fa’atalatalanoaga, ma fa’afesoota’i ai loa le Ofisa o le EMS mo se fesoasoani, ma auina atu ai loa le na a’afia i le Falema’i o le LBJ i Faga’alu mo togafitiga.

 

Na taua i le ripoti a le ali’i foma’i na gafa ma le fa’atinoina o togafitiga mo le ali’i na manu’a, e 3 filo na fa’aaoga e tapuni ai le manu’a sa a’afia ai le mua ulu a le na a’afia, ma toe te’a ai lava o ia i tua i le po lava lea ina ua mae’a togafitiga.

 

Na faamatala e le na a’afia i Leoleo e fa’apea, na fa’ateia o ia ina ua aga’i atu Siaumau Jr ma fai atu ia te ia mo se $30 se’i ona fa’aaogaina, peita’i sa musu ma ia fa’ailoa i ai, na te mana’omia le tupe mo lona pasese i le galuega atoa ai ma lana meaai.

 

Sa fa’atauanau pea e Siaumau Jr le ali’i na a’afia ina ia tu’u atu le tupe mo ia, peita’i sa toe teena fo’i e le na a’afia.

 

I le fa’aauau ai pea ona musu o le ali’i na a’afia e ave le tupe ia Siaumau Jr, na fa’afuase’i ai loa ona fao faamalosi e Siaumau Jr le tupe mai le ali’i na a’afia, sosoo ai loa ma le tago atu o Siaumau Jr ua titina le ua a le na a’afia. Na taua e le malo le tu’i e Siaumau Jr o le ali’i na a’afia ma pau ai loa o ia i lalo.

 

Na toe tu mai i luga le ali’i na a’afia ae sa toe tamo’e atu le ua molia i le ali’i na a’afia ma le fa’amoemoe e pu’e o ia ma ato i lalo, peita’i na aapa atu le na a’afia ma taofi le lima o Siaumau Jr ina ia aua ai ne’i toe oo atu se isi ana osofaiga ia te ia. O le taimi lea na faliu ai loa le ua molia ma oso i le ta’avale ma alu ese loa ma le $30 na ia fao fa’amalosi mai i le ali’i na a’afia.

 

Ina ua aga’i atu le ua molia i le fale fa’amasino mo se tasi o ana mataupu, na maua ai loa ma le avanoa o le malo e tuuina atu ai le tusi saisai ma pu’e fa’apagota ai loa o ia. O lo o fa’agasolo pea i luma o le fa’amasinoga fa’aitumalo le mataupu a Siaumau Jr e fa’atali ai le taimi o lana ulua’i iloiloga e su’esu’e ai pe lava mau a le malo ma tu’uina atu ai le mataupu e fa’atulaga sona fa’amasinoga i luma o le fa’amasinoga maualuga.

 

E 2 isi tagi a le malo fa’asaga ia Siaumau Jr o lo o i luma o le fa’amasinoga i le taimi nei. O le tagi muamua na tula’i mai i le masina o Novema o le 2017, lea o lo o tu’uaia ai Siaumau i moliaga e pei o le faaoolima i le tulaga tolu, tete’e atu i leoleo ao taumafai e pu’e fa’apagota o ia.

 

O isi moliaga na afua mai i le fa’alavelave lea na fai ai tuliga a le ua molia ma leoleo i luga o le alatele, amata mai i Leone e oo i Vaitogi. O lo o tu’uaia fo’i e le malo le ua molia i lona alu atu ma aveese mai lona atali’i sa i lalo o le vaavaaiga a leoleo i le Ofisa o Leoleo i Leone, e mafua mai ona sa a’afia o ia i se vevesi ma isi tamaiti aoga.

 

O poloaiga na tatala ai Siaumau Jr i tua, ia aua ne’i ona toe solia se tulafono a le malo.

 

Ae i le amataga o le tausaga na te’a nei, na toe molia ai fo’i e le malo ia Siaumau Jr i le moliaga o le fa’aoolima, e mafua mai i le fa’alavelave lea na ia fa’aoolima ai i se isi tagata.