Ads by Google Ads by Google

Tala otooto o Fa’amasinoga


[ata: foa'i]
ausage@samoanews.com

SOPI SENIO

 

O le aso Faraile o le vaiaso nei lea ua fa’atulaga e lau ai le fa’asalaga a Sopi Senio i luma o le fa’amasinoga maualuga, ina ua fa’amaonia lona le usitaia o tuutuuga o lana nofovaavaaia sa tuuina atu e le fa’amasinoga.

 

O ni isi o tuutuuga o le nofovaavaaia, o lona alu lea e vaai le ofisa faanofovaavaaia i masina ta’itasi.

 

Ina ua fiu le ofisa faanofovaavaaia e fa’atali Senio ua le toe oo atu, na latou talosagaina ai loa se poloaiga a le fa’amasinoga e pu’e fa’apagota ai Senio, ona o lona le tausisia i tuutuuga a le fa’amasinoga.

 

Na fa’ailoa e le loia a Senio ia Rob McNeill i le fa’amasinoga e fa’apea, na mafua ona le oo atu Senio e asi le ofisa fa’anofovaavaaia, ona sa umi se taimi na manu’a ai o ia i le fa’alavelave lea na tula’i mai i le tausaga na te’a nei, ina ua fana o ia e se ali’i pagota ma manu’a tigaina ai.

 

O lo o tumau pea tuutuuga o loo tatala ai Senio i tua e fa’atali ai le aso Faraile o le vaiaso nei lea ua fa’atulaga e toe tula’i ai i luma o le fa’amasinoga.

 

PIO ATONIO

 

E 12 masina lea ua fa’asala ai e le fa’amasinoga maualuga le ali’i o Pio Atonio e taofia ai i le toese i Tafuna, ina ua ta’usala o ia i le moliaga mamafa o lona umia fa’asolitulafono lea o vaega o le pauta fa’asaina o le aisa.

 

O le vaiaso na te’a nei na tu’uina atu ai le fa’asalaga a le fa’amasinoga maualuga ia Atonio. O le ali’i loia fautua lagolago ia Rob McNeill na tula’i mo Atonio, lea na taofia mai lava i le toese talu mai le masina o Me, 2018 na pu’e fa’apagota ai o ia e Leoleo, ina ua le mafai ona ia totogi le tupe e $5,000 sa fa’atulaga e tatala ai o ia i tua, ae o le tama’ita’i loia sili lagolago ia Christy Dunn na tula’i mo le malo.

 

Na ulua’i tu’uaia Atonio i le moliaga mamafa o lona umia fa’asolitulafono o vaega o le pauta fa’asaina o le aisa. O lea moliaga e mafai ona fa’asala ai o ia i le toese mo le umi e le itiiti ifo i le 5 tausaga, pe fa’asala fo’i i le salatupe e le itiiti ifo i le $5,000. Ae i lalo o le maliliega na sainia e Atonio ma le malo, na toe teuteu ai e le malo le mamafa o le moliaga fa’asaga ia Atonio.

 

I le tali ioe ai o Atonio i le moliaga e pei ona ta’usala ai o ia, sa ia ta’utino ai e fa’apea, i se taimi o le aso 17 o Me, 2018, sa ia umia fa’asolitulafono ai se paipa tioata sa tumu i vaega o le pauta fa’asaina o le aisa.

 

Ina ua maua lona avanoa mai le fa’amasinoga, na fa’atoese ai loa le ua molia e tusa ai o lana solitulafono, ma ia talosagaina ai se isi avanoa mo ia se’i toe fo’i atu ai i tua i lona aiga e fai sona aoga i ona matua, nu’u ma le ekalesia.

 

Na taua e Atonio e fa’apea, mai masina e 9 na taofia ai o ia i le toese, ua ia lagona ai lona salamo e tusa ai o le solitulafono sa ia faia, ma ua ia a’oa’oina fo’i se lesona aoga mo lona olaga, e le lelei le tagofia o fualaau fa’asaina.

 

Na talosaga Atonio i le fa’amasinoga mo se isi avanoa, faatasi ai ma lana ta’utinoga, afai ae maua se isi avanoa o ia, o le a ia fa’aaoga tatau loa e fai ai se isi mea lelei mo lona olaga.

 

Na talosaga lana loia ia McNeill i le fa’amasinoga ina ia fa’asala le ua molia i se fa’asalaga fa’anofovaavaaia, e aunoa ma le toe tuuina atu i ai o se isi fa’asalaga fa’a falepuipui. Na taua e McNeill e fa’apea, o Atonio o se tagata e i ai le taleni tusiata, ma, e mafai ona fa’aaoga lea taleni e saili ai sana galuega e maua ai se tupe e tausi ai lona aiga, ma saili ai sona lumana’i manuia.

 

Na fa’ailoa e McNeill i le fa’amasinoga e fa’apea, ua matua salamo moni lava Atonio mai lana solitulafono, ma ua ia sauni fo’i e fai se isi suiga lelei i lona olaga.

 

Na lagolagoina e le loia a le malo ia Dunn le talosaga a le itu tete’e, mo se fa’asalaga fa’a nofovaavaaia. Na taua e Dunn e fa’apea, e agava’a Atonio mo se fa’asalaga fa’anofovaavaaia, ina ia maua ai se avanoa e toe fuata’i ai se isi taeao fou mo lona olaga.

 

A o le i tuuina mai le fa’aiuga a le fa’amasinoga, na toe fa’amanatu e le afioga i le ali’i Fa’amasino Sili lagolago ia Fiti Sunia le fa’alavelave sa tula’i mai i le tausaga na te’a nei, lea na mafua ai ona molia Atonio e le malo.

 

Saunoa Sunia e fa’apea, o Atonio sa i totonu o se ta’avale na taofia e Leoleo i luga o le alatele a le malo, ina ua maitauina le sese o le laisene sa fa’apipi’i i le pito i luma o le ta’avale. Ina ua saili e Leoleo le ta’avale, sa maua i ai fualaau fa’asaina atoa ai ma pepa iila e fa’aaoga e utu i ai le aisa mo le fa’amoemoe e fa’atau atu.

 

Ina ua saili e Leoleo le tino o Atonio, sa latou maua i ai se paipa tioata o lo o i ai vaega o le aisa. Ina ua fesiligia e Leoleo ia Atonio e uiga i le paipa sa maua ia te ia, sa ia pepelo ai i Leoleo, e le o ia e ana le paipa sa maua i lona tino.

 

Na talia e le fa’amasinoga maualuga talosaga a loia ina ia fa’asala Atonio i se fa’asalaga fa’anofovaavaaia. E 12 masina lea ua poloaina e le fa’amasinoga ia Atonio na te tuliina i le toese i Tafuna, o se tasi lea o tuutuuga o lana nofovaavaaia e 5 tausaga. O lea fa’asalaga, o le a aofia ai ma masina e 9 lea ua mae’a ona ia tuliina. Lona uiga, toe 3 masina e taofia ai Atonio i le toese ona tatalaina loa lea o ia i tua.

 

TALIFOLAU AFU

 

Ua tatalaina nei i tua le ali’i o Talifolau Afu e aunoa ma se tupe e totogi e fa’atali ai le aso 23 o Aperila lea ua fa’atulaga e toe tula’i ai i luma o le fa’amasinoga fa’aitumalo, ona o le tagi a le malo fa’asaga ia te ia, i lona faia lea o ni gaioiga e save’u ai le nonofo filemu o aiga tuaoi i totonu o le afioaga.

 

O le vaiaso nei na tula’i ai Afu i luma o le fa’amasinoga fa’aitumalo, ma ia teena ai moliaga o le fa’atupu vevesi i lona aiga i Nu’uuli i le aso Sa na te’a nei.

 

Na taua e molimau sa latou fa’afesoota’iina Leoleo e uiga i lenei mataupu e fa’apea, sa latou fa’alogoina le leoleoa mai o Afu mai le latou fale, a o taumafai lona to’alua ma lona taufafine e fa’afilemu o ia.

 

O le vevesi na tula’i mai ina ua fo’i atu Afu i le fale ua te’a le 1:00 i le vaveao. Sa fesili i ai lona to’alua poo fea sa i ai, ae sa leai se tali a Afu. Sa masalosalo le to’alua a le ua molia sa i ai le fafine na eva ma le ua molia i le po atoa.

 

E ui i ripoti i le leoleoa a le ua molia, peita’i na taua i le ripoti a Leoleo, e leai lava ni fa’ailoga e iloa ai ni manu’a poo se tasi na a’afia i le to’alua a le ua molia, o lona fanau faapea fo’i lona tuafafine.