ALEX FIGOTA

Ua talia e le afioga i le ali’i Fa’amasino Sili ia Michael Kruse le talosaga a le itu tete’e, ina ai toe faia se teuteuga i le poloaiga na tatala ai i tua Alex Figota e fa’atalitali ai le taimi o lana fa’amasinoga autu.

Na manatu le fa’amasinoga e fa’aleaoga loa le poloaiga na tatala ai i tua Figota ina ua mae’a ona ia totogi le tupe e $5,000 e tatala ai o ia i tua, ina ua fa’amaonia i se suega sa faia e le Ofisa Faanofovaavaaia, le fa’aaoga e le ua molia o vaega o le fualaau fa’asaina o le aisa.

Ae ina ua talosaga le loia a Figota mo se avanoa e toe teuteu ai se faaiuga a le fa’amasinoga, na talia ai loa e Kruse le talosaga ma suia ai loa le fa’aiuga, o le a fa’aauau pea ona tatala Figota i tua, ae o le a suia le auala e totogi ai le tupe e tatala ai o ia, o le a totogi le tinoitupe e $5,000 ona fa’atoa mafai lea ona tatala o ia i tua.

E lua moliaga mamafa o le umia fa’asolitulafono o vaega o le pauta fa’asaina o le aisa, atoa ai ma le umia fa’asolitulafono o le aisa ma le fa’amoemoe e tulei pe fa’atau atu i isi tagata o lo o tu’uaia ai e le malo ia Figota.

O se tasi o tuutuuga na tatala ai i tua ia Figota ina ua ia totogi le $5,000 i le masina o Novema 2018, o le fa’asa lea ne’i ona toe tagofia le ‘ava malosi poo ni fualaau fa’asaina. O le a mafai fo’i ona su’esu’eina lona tino i soo se taimi ina ia mautinoa ai, o lo o ia tausisia lea poloaiga a le fa’amasinoga.

I le vaiaso na te’a nei ina ua aga’i atu Figota e asi le ofisa faanofovaavaaia, na faatonuina ai loa o ia ina ia faia le suega e faamaonia ai o loo ia tausisia tuutuuga o loo tatala ai o ia i tua. I lea suega sa faia, na fa’amaonia ai lona fa’aaogaina o le fualaau fa’asaina o le mariuana.

Ina ua fesiligia e Kruse ia Figota e tusa ai o le faaiuga o lana suega sa faia, sa ia ioeina ai i le taeao ananafi e fa’apea, sa ia fa’aaogaina le mariuana i le taimi sa latou tafafao ai ma ana uo.

Afai ae mafai e Figota ona totogi le tinoitupe e $5,000, ua fa’atonuina o ia e le fa’amasinoga ina ia aua ne’i ona toe tagofia ni fualaau faasaina.

SEPULONA VILIAMU

E 5 tausaga lea ua toe fa’aopoopo i le fa’asalaga fa’a falepuipui a le ali’i o Sepulona Viliamu, ina ua fa’amaonia e le fa’amasinoga le moliaga mamafa o lona sola ese lea i tua e aunoa ma se fa’atanaga mai le fa’amasinoga.

E 28 masina o loo tuli o le fa’asalaga a Viliamu i le toese i Tafuna, e mafua mai i le fa’alavelave lea na ta’usala ai o ia e le fa’amasinoga maualuga i le moliaga mamafa o le talepe fale i le tulaga muamua.

A o tuli ai le fa’asalaga a Viliamu i le toese, sa ia sola ai i tua i le tausaga na te’a nei ma aga’i atu i lona aiga. Na taua e Viliamu i le fa’amasinoga, na mafua ona alu i lona aiga, ua le lava nofo pologa i totonu o le falepuipui, aemaise ai o le fa’aletonu o mea o loo tausia ai i latou ma isi pagota.

Na fa’ailoa e le afioga i le ali’i fa’amasino ia Elvis P. Patea ia Viliamu e fa’apea, o loo manino tuutuuga o lana nofovaavaaia e 7 tausaga sa tuuina atu e le fa’amasinoga i le tausaga na te’a nei, e le tatau ona ia toe solia lava se tulafono.

“Tusa lava poo a mafua’aga ua e fa’ailoa mai i luma o le fa’amasinoga, e tumau pea tuutuuga o lau fa’asalaga faanofovaavaaia sa tuuina atu, e le tatau ona e toe solia se tulafono,” o le saunoaga lea a Patea i le ua molia.

Na fa’atoese ia Viliamu i le fa’amasinoga e tusa ai o lana solitulafono sa faia. Sa ia taua fo’i e fa’apea, talu mai le lata i le 2 tausaga na taofia ai o ia i le falepuipui, ua ia aoaoina ni lesona taua i lona olaga, ma ua ia iloa ai, e tatau lava ona ia usita’i i le tulafono. Sa faatoese fo’i Viliamu i lona Tina ma nisi o lona aiga sa i ai i totonu o le potu fa’amasino, i lona le usita’i i fautuaga ma fa’atonuga sa latou tuuina atu.

Na finau loia a itu e lua i le fa’amasinoga ina ia tuli fa’atasi le fa’asalaga a Viliamu o loo tuliina nei, ma lana fa’asalaga fou mai le mataupu e pei ona ta’usala ai o ia i le moliaga mamafa o le sola ese mai i le toese.

I le mae’a ai ona iloilo e ali’i fa’amasino o fa’afinauga a loia atoa ai ma le talosaga a le ua molia, na manatu ai loa le fa’amasinoga e fa’asala Viliamu i le toese mo le umi e 5 tausaga mo le solitulafono fou e pei ona ta’usala ai o ia, peita’i, o lea fa’asalaga o le a fa’aopoopo i lana fa’asalaga o loo tuliina nei.

E lei talia e le fa’amasinoga fa’afinauga a loia ina ia tuli fa’atasi fa’asalaga e lua a Viliamu. Saunoa Patea e fa’apea, e tatau ona avea le fa’asalaga o le a tuuina atu ia Viliamu e momoli atu ai se feau aoga i isi fo’i pagota o loo fuafua e sosola i tua, e matua leai lava se avanoa e tuuina atu e le fa’amasinoga i soo se tasi na te soli poloaiga a le fa’amasinoga.

MAFUTAGA PAULO

Ua toe tolopo le lauina o le fa’asalaga a le ali’i o Mafutaga Paulo mo le isi 2 vaiaso, ina ia maua le avanoa o lana loia e faitau ai i le ripoti sa tapena e le Ofisa Faanofovaavaaia, lea o loo fautuaina ai le fa’amasinoga i le ituaiga fa’asalaga e tatau ona fa’asala ai le ua molia.

O Paulo na ta’usala e le fa’amasinoga maualuga i le masina na te’a nei i le moliaga mamafa o le ave ta’avale ae o loo se’i lona laisene. O lea fa’asalaga e pei ona fa’amanino e le afioga i le ali’i Fa’amasino ia Elvis P. Patea ia Paulo, e mafai ona fa’asala ai o ia i le toese mo le umi e oo atu i le 5 tausaga, ae fa’amalosia ai le tuli o aso e 90 i totonu o le falepuipui.

E 6 masina o loo se’i ai e le fa’amasinoga faaitumalo le laisene ave ta’avale a le ua molia, ina ua ta’usala o ia i le moliaga o le ave ta’avale ‘ona. O se tasi o tuutuuga o lana nofovaavaaia e 12 masina, o le fa’asa lea ona ia toe fa’afoeina se ta’avale mo le 6 masina.

O le masina o Oketopa o le tausaga na te’a nei, na maua ai e Leoleo ia Paulo o loo ia fa’afoeina se ta’avale i luga o le alatele. O le aso 28 o Mati lea ua fa’atulaga e toe tula’i ai Paulo i luma o le fa’amasinoga.