Ads by Google Ads by Google

Tala otooto o Fa’amasinoga


[ata: foa'i]
ausage@samoanews.com

NOFOVAAVAAIA LE ALI’I NA MAUA I AI FUALAAU FA’ASAINA

 

E 5 tausaga lea ua nofovaavaaia ai se ali’i e 27 tausaga le matua, ina ua ta’usala o ia i le moliaga mamafa o lona umia fa’asolitulafono lea o vaega o le pauta oona o le aisa.

 

O se tasi la o tuutuuga o lana nofovaavaaia, o lona tuliina lea o masina e 20 i le toese i Tafuna e aunoa ma le tatalaina o ia i tua, se’i vagana ua auina atu o ia i le falema’i mo ni togafitiga, poo se poloaiga fo’i mai le fa’amasinoga.

 

O le vaiaso na te’a nei na tula’i ai Fidelis Taumalua i luma o le fa’amasinoga maualuga mo le lauina o lana fa’asalaga. O le ali’i loia fautua lagolago ia Rob McNeill na tula’i mo ia, ae o le tama’ita’i loia sili lagolago ia Christy Dunn na tulai mo le malo.

 

Ina ua maua le avanoa o Taumalua mai le fa’amasinoga, sa ia fa’atoese ai loa e tusa ai o lana solitulafono, ma ia talosagaina ai se isi avanoa mo ia se’i toe fo’i atu ai i tua e tausi lona aiga ma fai sona aoga i lona nu’u ma lana Ekalesia.

 

“Ou te ta’utino atu i lau afioga i le Faamasino Sili, ua ou lagona lo’u salamo ma lo’u sese i la’u solitulafono sa fai, ou te le toe solia fo’i se tulafono a le malo,” o le ta’utinoga lea a Taumaulua

 

Na fesili le Fa’amasino Sili ia Michael Kruse ia Taumalua poo le a lana mea sese sa fai, ae na tali le ua molia, “sa ou umia fualaau faasaina.”

 

Na finau lana loia ia McNeill i le fa’amasinoga ina ia fa’asala Taumalua i se fa’asalaga fa’anofovaavaaia e aunoa ma le toe tu’uina atu i ai o se isi taimi e tuli i le falepuipui. Na taua e le loia a le ua molia e fa’apea, i le silia ai i le 4 masina o taofia Taumalua i le falepuipui, ua ia aoaoina mai ai se lesona taua mo lona lumana’i, ma ua ia ta’utino atu fo’i ia te ia, o le a fa’aaoga tatau lona avanoa e tuuina atu e le fa’amasinoga.

 

Na taua atili fo’i e McNeill e fa’apea, e tusa ai o le ripoti a le ofisa faanofovaavaaia, o se taimi muamua lenei ua a’afia ai Taumalua i se solitulafono, ma, ua agava’a ai ona fa’asala o ia i se fa’asalaga faanofovaavaaia.

 

Na tete’e Dunn i le faafinauga a McNeill fai mai e lei aafia muamua Taumalua i se solitulafono. Na taua e Dunn e fa’apea, e ui o le taimi muamua lenei fa’atoa molia ai Taumalua i se solitulafono i luma o le fa’amasinoga maualuga, peita’i ua fa’atele ona molia ma ta’usala o ia i luma o le faamasinoga faaitumalo, ona o solitulafono mama e aofia ai le fa’atupu vevesi i nofoaga faitele faapea ai ma le tagofia o le ‘ava malosi.

 

Saunoa le alii fa’amasino sili e fa’apea, o Taumalua, o se tasi lea e to’atolu i ai tagata sa i totonu o se ta’avale ina ua taofia e Leoleo i Nuuuli i le aso 23 o Setema o le tausaga na te’a nei, e mafua mai i le sese o le numera o le laisene sa fa’apipi’i i le ta’avale.

 

Ina ua saili e Leoleo le ta’avale, sa maua i ai fualaau fa’asaina. Mulimuli ane ina ua mae’a ona saili e Leoleo le ta’avale, ae toe fa’ailoa e le tama’ita’i sa i totonu o le ta’avale, o loo i ai i lalo o le nofoa se paipa tioata o loo i ai vaega o le pauta oona o le aisa, sa nana ai e Taumalua.

 

Ina ua fesiligia e Leoleo le ua molia i le aso lea, sa ia ta’utino ai, e sa’o o ia na nanaina le paipa tioata o loo i ai vaega o le pauta oona o le aisa i lalo o le nofoa.

 

O nisi o tuutuuga o le nofovaavaaia a Taumalua, ua faasa ona ia toe tagofia le ‘ava malosi poo fualaau fa’asaina, o le a faia fo’i ni suega i lona tino ina ia mautinoa ai o loo mama lava o ia mai fualaau fa’asaina ma le ‘ava malosi.

 

FAASOO SAVELIO MA SHARNEL SAGOTE

 

O le aso 3 o Me, 2019 lea ua fa’atulaga e lau ai fa’asalaga a ali’i e to’alua na tu’uaia i lo la umia fa’asolitulafono o fualaau fa’asaina o le aisa, i le mae’a ai lea ona talia e le Fa’amasinoga Maualuga o se maliliega na sainia e i laua nei ma le malo i le amataga o le vaiaso nei.

 

O le mataupu e pei ona ta’usala ai Fa’asoo Savelio ma Sharnel Sagote, na tula’i mai i le masina o Novema o le tausaga na te’a nei, ina ua aga’i atu Leoleo e tau saili se teineititi e 21 tausaga le matua sa masalomia le ave fa’amalosi e se isi tagata, ae i’u ina pu’e fa’apagota atu ai ma i laua nei e Leoleo.

 

Na ulua’i tu’uaia e le malo ia Sagote i moliaga mamafa e lua, o le umia fa’asolitulafono o le pauta o le aisa, faapea ai ma le umia fa’asolitulafono o le aisa ma le fa’amoemoe e tulei ma fa’atau atu i isi tagata. Ae i le maliliega na sainia e Sagote ma le malo, na ia tali ioe ai i le moliaga o lona umia fa’asolitulafono o le pauta oona o le aisa.

 

I le tali ioe ai o Sagote i le moliaga e pei ona toe teuteu e le malo, sa ia ta’utino ai e fa’apea, i se taimi o le taeao o le aso 1 o Novema i le nofoaga e taua o le Filifili i le auala e aga’i atu i Vaitogi, sa ia umia ai ni tama’i pepa iila se lua sa i ai vaega o le pauta o le aisa.

 

Mo le ali’i o Savelio, na ulua’i tu’uaia o ia e le malo i le moliaga mamafa e tasi o lona umia fa’asolitulafono o vaega o le pauta oona o le aisa. O le moliaga lava fo’i lea ua ia tali ioe i ai, peita’i, ua toe faia i ai e le malo ni teuteuga i lea moliaga, ina ia mafai ai ona fa’asala o ia i le fa’asalaga e feololo ane lona mamafa.

 

I le tali ioe ai o Savelio i le moliaga e pei ona ta’usala ai o ia e le malo, sa ia ta’utino ai e fa’apea, i se taimi o le taeao o le aso 1 o Novema o le tausaga na te’a nei, a o la i ai fa’atasi ma Sagote i le nofoaga e taua o le Filifili i Vaitogi, i le auala e aga’i atu i Vaitogi, sa ia umia ai se paipa tioata sa i ai vaega o le pauta oona o le aisa.

 

O le ali’i loia fautua lagolago ia Rob McNeill na tula’i mo i laua ua molia, ae o le tama’ita’i loia sili lagolago ia Laura Garvey na fai ma sui o le malo.

 

I le tali ai e le fa’amasinoga o le maliliega a i laua nei ma le malo, na talosaga ai loa le malo ina ia solofua isi moliaga o loo totoe i le latou tagi sa fa’aulu fa’asaga i nei ali’i e to’alua.

 

O lo o taofia pea i laua nei e to’alua i le toese i Tafuna e fa’atali ai le aso lea ua fa’atulaga e lau ai le la fa’asalaga.