TITIFALAULA SIAUMAU

Ua taoto atu nei i se fa’aiuga a le fa’amasinoga maualuga le talosaga a le ali’i o Titifalaula Siaumau, mo se avanoa e vave ai ona tatala o ia i tua mai le toese i Tafuna e saili sana galuega e tausi ai lona aiga.

O le aso Faraile na te’a nei na finauina ai le talosaga a Siaumau i luma o le afioga i le ali’i Fa’amasino Sili ia Michael Kruse, ma ana Fa’amasino Lagolago ia Faamausili Pomele ma Muasau T. Tofili.

O le ali’i loia ia Marcellus Talaimalo Uiagalelei na tula’i mo Siaumau, ae o le tama’ita’i loia sili lagolago ia Christy Dunn na tula’i mo le malo.

E to’alua molimau na valaau e Uiagalelei, o le Pulesili o le Ofisa Faanofovaavaaia ia Malcolm Kilomita Pou ma le ali’i o Siaumau.

Na taua e Polu i lana molimau, o ni isi o ona tiute tauave i lana galuega, o le mata’itu lea o tagata uma o loo nofovaavaaia i luma o le fa’amasinoga e aofia ai ma Siaumau, poo latou usitaia tuutuuga ma poloaiga o a latou nofovaavaaia.

Mo le mataupu a Siaumau, na taua e Polu e fa’apea, talu mai lava le taimi na tuli ai le fa’asalaga a le ua molia, sa ia usitaia uma lava tuutuuga ma poloaiga a le fa’amasinoga, e leai fo’i ni ripoti mai le toese e atagia mai ai lona faia o uiga e le tusa ma tuutuuga o lana nofovaavaaia.

“E tusa ai la o la’u vaavaai i le ripoti a Siaumau, ua talafeagai lana talosaga i le fa’amasinoga mo se avanoa e vave ai ona tatala o ia i tua e saili sana galuega e tausi ai lona aiga, ao le’i oo i le taimi e mae’a aloaia ai le tuliina o lana fa’asalaga,” o le molimau lea a Polu.

Mai le fa’asalaga fa’a falepuipui e 20 masina a Siaumau o loo tuli i le taimi nei, e 16 masina ua mae’a ona ia tuliina, toe 4 masina o lana fa’asalaga o loo totoe.

Na taua e Siaumau i luga o le nofoa molimau e fa’apea, na mafua ona faila lana talosaga i le fa’amasinoga, ua fia alu i tua i lona aiga e saili sana galuega e tausi ai lona to’alua ma lana fanau laiti e to’atolu.

A o taofia ai o ia i le toese mo le 16 masina, na fa’ailoa e Siaumau i le fa’amasinoga, o lona Tama faatasi ai ma matua o si ona to’alua, o i latou ia o loo fesoasoani malosi i le tausiga o lana fanau, ona e le faigaluega lona to’alua e maua ai se tupe e tausi ai si ana fanau.

Na fa’ailoa e Kruse ia Uiagalelei e fa’apea, e tusa ma le 90% o tagata pagota o loo tuli a latou fa’asalaga i le falepuipui, e agava’a fo’i i latou i le avanoa e vave ai ona tatala i tua i o latou aiga. Ae fia malamalama le fa’amasinoga, pe aisea e tatau ai ona ese atu le mataupu a Siaumau mai mataupu a isi uma pagota o lo o agava’a fo’i i le vave tatala i tua mai le toese i Tafuna.

Sa ia taua fo’i e fa’apea, e tusa ai ma mau sa tuuina atu e le malo e uiga i le mataupu a Siaumau, sa taua ai le maua e Leoleo i le malae va’alele i Kalefonia o se tino i tupe e silia i le $10,000 sa ia Siaumau i le taimi na malaga ai o ia i fafo.

Ua toe taofia nei Siaumau i le toese e fa’atali ai se faaiuga a le fa’amasinoga e tusa ai o lana talosaga.

RONALD PICKERING

O le aso Faraile na te’a nei na faia ai se poloaiga faapitoa a le Fa’amasino Sili ia Michael Kruse, e taofia ai i le toese i Tafuna le ali’i o Ronald Pickering, ona o tu’uaiga i lona le usitaia lea o tuutuuga o loo tatala ai o ia i tua.

O se tasi o tuutuuga o loo tatala ai Pickering i tua ina ia totogi le tupe sa fa’atulaga e le fa’amasinoga, o le aua lea ne’i ona toe tagofia fualaau fa’asaina poo le ‘ava malosi, ma ia faia fo’i se suega i lona tino ina ia mautinoa o lo o ia tausisia le tuutuuga o le le maua ai o fualaau fa’asaina.

O se suega sa faia e le Ofisa Faanofovaavaaia i le ua molia, na faamaonia ai lona tagofia o fualaau fa’asaina.

O le aso Lulu o le vaiaso nei, ua fa’amoemoe e toe tula’i ai Pickering i luma o le fa’amasinoga maualuga mo lana ulua’i iloiloga.

DAVID FO’A

O le ali’i talavou o loo tuli sona fa’asalaga fa’a falepuipui e 30 tausaga le umi, ina ua ta’usala o ia i moliaga o le gaoi ma le faomea, e mafua mai i le fa’alavelave lea na ia osofaia ai ni faleoloa Asia se 9, e aofia ai ma le osofaiga sa faia fa’asaga i se faleoloa i Malaeimi, lea na ia tu’u ai se fana i le ulu o le fa’atau oloa, ua ia talosaga i le fa’amasinoga maualuga e fa’atulaga loa se aso e faia ai lana fa’amasinoga autu, mo le tu’uaiga o le sola i tua mai le falepuipui o loo tu’uaia ai o ia e le malo.

Ina ua valaau le mataupu a David Fo’a i le vaiaso na te’a nei i luma o le fa’amasinoga maualuga, na fa’ailoa ai e lana loia ia Rob McNeill e fa’apea, ua mae’a ona la tauaaoina ripoti ma mau fa’amaonia o le tagi a le malo, atoa ai ma le ofa sa tuuina atu e le loia a le malo.

Ae ina ua mae’a ona la faitau ma suesue i le ripoti atoa ai ma le ofa, na atagia mai ai le teena e le ua molia o le ofa a le malo, ae ua ia manatu loa e tu’u atu lana mataupu e fa’atulaga sona fa’amasinoga autu.

O le masina o Me o le tausaga fou 2020 lea ua fa’atulaga e fa’ataunu’u aloaia ai le fa’amasinoga autu a Fo’a i luma o le fa’amasinoga maualuga.

O le masina o Setema 2017 na fa’asala ai e le fa’amasinoga maulauga ia Fo’a e taofia i le falepuipui mo le 30 tausaga, ina ua ta’usala o ia i le moliaga mamafa o le faomea i le tulaga muamua, atoa ai ma moliaga mama e 8 o le gaoi.

Na fa’aaoga e Fo’a ma le isi ali’i talavou na la to’alua ia a’upega e pei o le fana, naifi, ma’a ma se u’amea e fa’atino ai le la osofaiga i faleoloa na a’afia, ma la ave faagaoi ai tupe ma le anoanoa’i o oloa.