Ads by Google Ads by Google

Tala otooto o Fa’amasinoga

ausage@samoanews.com

PENIAMINA LOLENESE

 

O le aso 12 o Aperila lea ua fa’atulaga e lau ai le fa’asalaga a le ali’i o Peniamina Lolenese, ina ua ta’usala o ia e le Fa’amasinoga Maualuga i le moliaga mamafa o le ave ta’avale ae o loo se’i e le Fa’amasinoga lona laisene ave ta’avale.

 

O le ali’i loia fautua lagolago ia Ryan Anderson ma tula’i mo Lolenese i le taimi o lana iloiloga i le vaiaso ua te’a, ae o le tama’ita’i loia sili lagolago ia Laura Garvey na tula’i mo le malo.

 

Na taua i le maliliega na sainia e Lolenese ma le malo e fa’apea, i le po o le aso 1 o Oketopa 2018, na taofia ai e Leoleo le ta’avale a le ua molia, ona ua mae’a le aoga o le pepa lesitala sa pipi’i i le laisene o le ta’avale. Ina ua siaki e Leoleo le laisene a le ua molia na manino ai, ua se’i e le Fa’amasinoga lona laisene ma ua fa’asa ona ia toe fa’afoina se ta’avale i luga o le alatele mo le olaga atoa, ona o moliaga o le ave ta’avale ‘ona na ta’usala ai o ia e le fa’amasinoga.

 

O le moliaga o le ave ta’avale ao se’i le laisene, e mafai ona fa’asala ai se tasi i le toese i Tafuna mo le umi e amata atu i le 90 aso seia oo atu i le 5 tausaga. O loo taofia pea Lolenese i le toese e fa’atali ai le aso e lau ai lona fa’asalaga.

 

NICK MATAIA

 

Ua talia e le Fa’amasinoga Maualuga le talosaga a le ali’i o Nick Mataia, ina ia fa’atulaga loa le aso e fa’ataunu’u ai lana fa’amasinoga autu.

 

Ina ua valaau le mataupu a Mataia i luma o le fa’amasinoga i le vaiaso na te’a nei, na fa’ailoa ai e le loia a le ua molia i le fa’amasinoga e fa’apea, ua mae’a ona latou tauaaoina mau faamaonia o le tagi tusitusia a le malo atoa ai ma se ofa sa tuuina atu e le malo. Peita’i ina ua mae’a ona la feutana’i ma Mataia e tusa ai o mau fa’amaonia o le tagi tusitusia a le malo, sa teena ai e le ua molia le ofa, ae talosagaina loa le tuuina atu o le mataupu e fa’amasino e tagata lautele.

 

O loo taofia pea i le toese i Tafuna ia Mataia ina ua le mafai ona totogi le tupe sa fa’atulaga e tatala ai o ia i tua.

 

E 2 tagi o loo tu’uaia ai e le malo ia Mataia. O le taimi muamua, o lo o tu’uaia ai Mataia faatasi ai ma isi ali’i e to’alua i moliaga o le faiaiga ma se teineititi e laititi i lalo o le tulafono; 2 moliaga o le tagofia o itutinosa o se tama’ita’i e laititi i lalo o le tulafono, ma le moliaga mama o le faia o gaioiga e lamatia ai le saogalemu o fanau laiti. I le tagi lona lua fa’asaga ia Mataia, o loo tu’uaia ai o ia i moliaga mamafa e 2 o lona umia faasolitulafono o vaega o le pauta o le aisa, atoa ai ma le umia faasolitulafono o vaega o le pauta o le aisa ma le fa’amoeoe e tulei atu i isi tagata.

 

O tagi e 2 fa’asaga ia Mataia, na alia’e mai i le fa’alavelave lea o loo tu’uaia ai o ia ma isi ali’i e to’alua e aofia ai Loma Iosia ma Apisaloma Timu, i lo latou faia lea o uiga mataga i ni tama’ita’i e to’alua e ta’i 14 tausaga le matutua, atoa ai ma le tuuina atu i ai o vaega o le pauta fa’asaina o le aisa.

 

JAMES TAITO

 

O le aso 26 o Aperila o le tausaga nei lea ua fa’atulaga e lau ai le fa’asalaga a le fa’amasinoga fa’asaga ia James Taito, e mafua mai i lona le usitaia o tuutuuga o lana nofovaavaaia sa tuuina atu e le fa’amasinoga.

 

O Taito o loo nofovaavaaia i luma o le fa’amasinoga maualuga mo le 5 tausaga, e mafua mai ina ua ta’usala o ia i le moliaga mamafa o le gaoi. O ni isi o tuutuuga o lana nofovaavaaia, e le tatau ona ia toe soli se tulafono, ia auai i aoaoga faufautua e fesoasoani ai i le leaga o le ‘ava malosi, totogi lana salatupe ma ia alu e vaai le ofisa faanofovaavaaia i masina ta’itasi.

 

Na taua i se ripoti mai le ofisa faanofovaavaaia e fa’apea, ua tele masina e lei toe alu atu lava Taito e saini, e lei totogiina fo’i lana salatupe, ma ua i ai fo’i le isi tagi fou fa’asaga ia te ia o loo i luma o le fa’amasinoga faaitumalo.

 

Ona o ia tulaga uma, na talosagaina ai loa e le Ofisa Faanofovaavaaia se poloaiga a le fa’amasinoga e pu’e fa’apagota ai Taito ae fa’atulaga sana iloiloga, ona o lea ua ia le usitaia tuutuuga o lana nofovaavaaia.

 

Ina ua tula’i Taito i luma o le fa’amasinoga maualuga i le vaiaso na te’a nei, sa ia ioeina ai lona le usitaia o poloaiga o lana fa’amasinoga e pei ona taua i le ripoti a le Ofisa Faanofovaavaaia.

 

FEALOFANI MATU’U

 

O le ali’i faigaluega a le Matagaluega o Galuega Lautele a le malo lea na fufusu ma lona Supervisor i se pati sa faia i le masina o Tesema o le tausaga ua mavae, ua faanofovaavaaia nei o ia mo le 6 masina, ina ua ta’usala o ia i le moliaga mama o le fa’atupu vevesi i nofoaga faitele.

 

Ua poloaina fo’i e le afioga i le ali’i Fa’amasino ia Elvis P. Patea le ali’i o Fealofani Matu’u ina ia totogi le salatupe e $100 i totonu o le 30 aso.

 

Na faailoa e Matu’u i le fa’amasinoga, e le o ia na amataina le vevesi na tula’i mai i le va o ia ma le ali’i na a’afia. Sa ia taua fo’i e fa’apea, o Leoleo sa taaalo piliaki i le isi itu na lagona atu le pisa, ma aga’i atu ai loa e su’esu’e le mafua’aga o le vevesi.

 

Ua fautuaina e le fa’amasinoga ia Matu’u ina ia auai i aoaoga fa’afaufautua mo le ‘ava malosi ma le ita, ma ia aua ne’i ona toe solia se isi tulafono a le malo.