Ads by Google Ads by Google

Tala otooto o Fa’amasinoga


[ata: foa'i]
ausage@samoanews.com

THOMAS SIAUMAU

 

E ui i le tete’e malosi o le loia a Thomas Siaumau i se talosaga a le malo, mo se poloaiga a le fa’amasinoga e fa’ataga ai ona aami le latou molimau mai Hawaii, o se tagata fa’apitoa i le suesueina o a’upega malolosi, peita’i na talia lava e le Fa’amasinoga Maualuga le talosaga a le malo.

 

I le mae’a ai ona talia e le Fa’amasinoga o le talosaga a le malo, na fa’atonuina ai loa e le afioga i le ali’i Fa’amasino Sili lagolago ia Fiti Sunia le Failautusi a le Fa’amasinoga ina ia fa’atulaga loa le poloaiga e tuuina atu i Hawaii e aami fa’apitoa ai le tagata ua filifilia e le malo e avea ma a latou molimau fa’apitoa i le mataupu a Siaumau.

 

A o lumana’i ai le fa’amasinoga autu o lenei mataupu i le aso Gafua o le vaiaso fou, o le aso Lulu o le vaiaso nei na toe tula’i ai Siaumau i luma o le fa’amasinoga mo le isi fo’i ana iloiloga. O lea iloiloga, o le finauina lea o se talosaga sa fa’aulu e le malo i le masina o Aperila o le tausaga na te’a nei, a o lea fa’atoa maua le avanoa e finauina ai i luma o le Fa’amasinoga.

 

Na taua e le loia a le malo ia Christy Dunn e fa’apea, e matua mana’omia lava e le malo se poloaiga mai le fa’amasinoga e fa’ataga ai ona malaga mai le latou molimau mai Hawaii e molimau i lenei fa’amasinoga.

 

Na tete’e i ai le loia a Siaumau ia Richard deSaulles. Na taua e deSaulles e fa’apea, o se taimi muamua lenei fa’atoa ia faalogo ai i se molimau faapitoa a le malo ua fuafua e malaga mai fafo e molimau i lenei mataupu. Na taua atili e le loia a le itu tete’e e fa’apea, sa tatau i le malo ona latou vave tuu atu fa’amatalaga e iuga i le latou molimau lenei, ina ia mafai ai fo’i ona faia a latou sailiiliga fa’asaga ia te ia.

 

Na tete’e i ai le loia a le malo i le fa’afinauga a le loia mo le itu tete’e. Na taua e  Dunn e fa’apea, ua leva ona latou tuuina atu i le itu tete’e le ripoti e fa’atatau i mau fa’amaonia sa auina atu i Hawaii mo suesuega. I totonu o lea ripoti, o lo o taua ai le igoa o le tagata sa faia le suesuega, o le molimau lena a le malo.

 

Na fa’aui lavea le afioga i le ali’i Fa’amasino ia Sunia ma ia fa’amanino i le itu tete’e e fa’apea, i lalo o le Tulafono o Ta’iala 16, o lo o manino mai ai le le tatau lea i le itu tete’e ona latou iloa fua igoa o molimau a le malo.

 

Na toe faamanino atili e Dunn e fa’apea, o le agaga atoa o le talosaga a le malo, ina ia mafai e le Fa’amasinoga ona tu’uina atu se poloaiga e fa’ataga ai le molimau ona malaga mai i Amerika Samoa.

 

O le po o le aso Gafua o le vaiaso fou lea ua fa’amoemoe e taunu’u mai ai i fanua le molimau a le malo, ma sauni ai loa e molimau i le fa’amasinoga o Siaumau, lea ua fa’amoemoe e amata aloaia i le aso Gafua o le vaiaso fou.

 

IOSEFO N. SAGOTE

 

E ui ua faamaonia e le fa’amasinoga maualuga le le usitaia e Iosefo N. Sagote o tuutuuga o lana nofovaavaaia, ina ua maua i se suega sa faia lona fa’aaogaina o fualaau fa’asaina o le aisa ma le mariuana, peita’i na talia e le Fa’amasino Sili le fautuaga a le Ofisa Faanofovaavaaia, ina ia toe tu’u se isi avanoa ia Sagote.

 

O le vaiaso nei na fa’atulaga e tuu atu ai le fa’aiuga a le fa’amasinoga fa’asaga ia Sagote, i lona le usitaia lea o tuutuuga o lana nofovaavaaia. O le ali’i Loia ia Marcellus Talaimalo Uiagalelei na tula’i mo Sagote ae o le tama’ita’i Loia Sili lagolago ia Christy Dunn na tula’i mo le malo.

 

Na fa’atoese Sagote i le faamasinoga e tusa ai o lona le usitaia o tuutuuga o lana nofovaavaaia, ma ia talosagaina ai se isi avanoa mo ia.

 

Na talosaga loia a itu e lua i le fa’amasinoga ina ia toe tu’u se isi avanoa ia Sagote, ina ia maua ai le avanoa e galulue fa’atasi ai ma le Ofisa Faanofovaavaaia. Na taua e le loia a le malo e fa’apea, e lei umi lava se taimi na fa’anofovaavaaia ai e le Faamasinoga ia Sagote ae tula’i mai ai loa ma le faafitauli e pei ona faamaonia ai lona fa’aaogaina o fualaau fa’asaina.

 

I le talitonuga a le malo, ana umi se taimi e faanofovaavaaia ai Sagote, atonu e i ai se isi suiga lelei e tupu mai ai.

 

Saunoa le afioga i le ali’i Fa’amasino Sili ia Michael Kruse e fa’apea, o le a leai se faaiuga a le Fa’amasinoga e fa’aleaoga ai le nofovaavaaia a le ua molia, ae o le a toe tu’u atu i ai le isi avanoa e galulue fa’atasi ai ma le Ofisa Faanofovaavaaia, ina ia mautinoa e auai o ia i Aoga Fautua e fesoasoani ai i le leaga o le tagofia o fualaau fa’asaina.

 

TIE JEFFREY LOMON

 

O le aso 7 o Mati lea ua fa’atulaga e faia ai le ulua’i iloiloga faapitoa a Tie Jeffrey Lomon i luma o le fa’amasinoga maualuga, e iloilo ai pe faamaonia tu’uaiga ua ia le usitaia tuutuuga o lana nofovaavaaia sa tuuina atu i le tausaga na te’a nei.

 

O le aso ananafi na tula’i ai Lomon i luma o le fa’amasinoga maualuga, i lalo o se poloaiga mai le Ofisa Faanofovaavaaia e pu’e fa’apagota ai o ia, ona o tu’uaiga ua ia le tausisi i tuutuuga o lana nofovaavaaia, e aofia ai le aua ne’i ona toe tagofia le ‘ava malosi, aua fo’i ne’i ona toe solia se tulafono a le malo i totonu o le 5 tausaga o lana nofovaavaaia.

 

Na taua e le Ofisa Faanofovaavaaia i se latou ripoti, talu mai le taimi na amata ai le nofovaavaaia a Lamon, ua fa’atolu (3) ona taofia o ia e leoleo ma tuuaia i le ‘ona atoa ai ma le fa’atupu vevesi i nofoaga faitele.

 

O le masina o Oketopa o le tausaga na te’a nei na tula’i ai Lomon i luma o le fa’amasinoga fa’aitumalo, ona o tu’uaiga i le ‘ona ma le fa’atupu vevesi i nofoaga faitele. O le masina o Tesema na te’a nei, o le taimi lona lua lea na toe taofia faapagota ai Lomon e leoleo ma molia ai i le ‘ona atoa ai ma le fa’atupu vevesi i nofoaga faitele. Ae i le masina o Ianuari na te’a nei, na toe molia ai fo’i o ia i le fa’atupu vevesi i nofoaga faitele.

 

Na taua e le loia a Lomon ia Rob McNeill i le fa’amasinoga e fa’apea, o loo tete’e le ua molia i tu’uaiga fa’asaga ia te ia, ona o loo fa’agasolo pea i luma o le fa’amasinoga fa’aitumalo ana mataupu e 3 e lei maua i ai se faaiuga.

 

O loo taofia pea Lomon i le toese i Tafuna ina ua le mafai ona ia totogi le $500 na fa’atulaga e tatala ai o ia i tua.