Ads by Google Ads by Google

Tala otooto o Fa’amasinoga


[ata: foa'i]
ausage@samoanews.com

THOMAS SIAUMAU

 

E ui ua mae’a ona tu’uina mai le fa’aiuga a le afioga i le ali’i Fa’amasino Sili lagolago ia Fiti Sunia, e poloaina ai le malo ina ia fa’amatu’u atu i le itu tete’e le lisi o igoa o molimau ua latou faamoemoe e valaau i le taimi o le fa’amasinoga autu a Thomas Siaumau, peita’i o le isi iloiloga o lenei mataupu na toe valaauina i le faaiuga o le vaiaso na te’a nei, na toe fa’amautu atili ai e Sunia le poloaiga a le fa’amasinoga.

 

O le aso Gafua o le vaiaso fou, Fepuari 25, 2019 ua fa’atulaga e amata aloaia ai loa le fa’amasinoga autu i le va o le malo ma Siaumau, lea o lo o tu’uaia i le fa’alavelave lea na tafana ai e se tagata le ta’avale a Leoleo i tua o le nofoaga o le Malae Baseball i Tafuna i le masina o Tesema, 2017.

 

O le iloiloga lona lua a Siaumau e pei ona fa’ataunu’uina i le aso Tofi na te’a nei, na finauina ai le talosaga a le malo mo se poloaiga a le fa’amasinoga e puipuia ai le fa’alauiloaina o igoa o a latou molimau.

 

O le talosaga lea a le malo na fa’aulu i le masina o Aperila o le tausaga na te’a nei, peita’i o lea fa’atoa maua le avanoa e finau ai i luma o le fa’amasinoga.

 

O ali’i loia e to’alua ma le RDA Law Firm ia Daniel Holladay ma Richard deSaulles na fai ma sui o Siaumau, ae o le tama’ita’i loia sili lagolago ia Christy Dunn na tula’i mo le malo.

 

Ina ua valaau le mataupu, na fa’ailoa ai e Sunia e fa’apea, na mafua ona tu’u e le fa’amasinoga le mataupu a Siaumau i luga o le kalena, ona o loo i ai se talosaga sa faila e le malo i le tausaga na te’a nei e fa’atatau i le puipuia lea o le fa’amatu’u atu o igoa o ana molimau i le itu tete’e.

 

“E ui i le talosaga a le malo lea fa’atoa finauina i luma o le fa’amasinoga, e tumau pea le poloaiga ua mae’a ona tu’uina atu e le fa’amasinoga i le amataga o le vaiaso, e poloaina ai le malo ina ia fa’amatu’u atu i le itu tete’e le lisi o igoa o ana molimau ua fuafua e valaau i le taimi o le fa’amasinoga,” o le saunoaga lea a Sunia.

 

Na taua e le loia a le malo e fa’apea, o le talosaga lea ua talanoaina nei, na faila e le ali’i loia ia Woodrow Pengelly sa fai ma sui o le malo i tausaga ua mavae, peita’i, talu mai lava le taimi na faia ai e le Faamasino Sili ia Michael Kruse lana poloaiga e le mafai ai ona fa’amatu’u atu i le itu tete’e igoa o molimau a le malo, na manatu ai loa le malo e le toe tau mana’omia le finauina o lea talosaga i luma o le fa’amasinoga.

 

“O le a la se manatu o le malo i lana talosaga lea ua i luma nei o le fa’amasinoga,” o le fesili lea a Sunia ia Dunn.

 

Na taua e Dunn e fa’apea, e tumau pea le talitonuga o le malo e le tatau ona tu’u atu fua le lisi o igoa o a latou molimau i le itu tete’e.

 

Na finau Holladay ma ia finau i le fa’amasinoga e tusa ai o lana faaiuga ua mae’a ona faia, e poloaina ai le malo ina ia fa’amatu’u atu le lisi o igoa o a latou molimau i le itu tete’e. Sa taua fo’i e Holladay e fa’apea, e le malamalama fo’i pe aisea e toe fa’atali ai fua le malo i le faaiuga o le vaiaso e fa’amatu’u atu ai igoa o molimau, ae ua tatau ona fa’amatu’u atu loa i le taimi lava lea.

 

Na toe finau Dunn e fa’apea, fa’atoa tauaao atu lava e le malo le lisi o igoa o ana molimau i le itu tete’e i le aso Faraile, e tusa ai o le poloaiga a le fa’amasinoga.

 

“E le o taumafai le malo e taofi le itu tete’e mai le fa’atinoina o a latou suesuega e uiga i lenei mataupu. O le tiute o le malo, ia puipuia le saogalemu o i latou uma o le a molimau i lenei mataupu, ina ia mautinoa e le afaina i latou, o latou aiga mai le ua molia ma lona aiga,” o le saunoaga lea a Dunn.

 

Na faailoa atili e Dunn i le fa’amasinoga le fefefe o molimau ina ua latou iloa o le a fa’amatu’u atu o lato igoa ma fa’amatalaga uma e uiga ia te i latou i le itu a le ua molia. Na talosaga Dunn i le faamasinoga, ina ia tu’u atu se taimi e talanoa muamua ai le malo i molimau ina ia fa’ailoa i ai le poloaiga a le fa’amasinoga, ona faatoa tu’u aloaia atu ai loa lea o le lisi i le itu tete’e i le aso Faraile.

 

E le i lagolagoina e Holladay le talosaga a le malo, sa ia finau e fa’apea, e leai se mea e popole ai fua molimau i lo latou saogalemu, ona o loo taofi ai le falepuipui i Tafuna ia Siaumau, e le mafai fo’i ona sau o ia i tua ma fa’atino se mea leaga i molimau poo latou aiga fo’i.

 

Sa faamautinoa e Holladay i le fa’amasinoga e fa’apea, e le o Siaumau poo lona aiga e faia le suesuega, ae o tagata suesue faapitoa a le latou Ofisa e gafa ma le fesiligiaina o molimau.

 

I le mae’a ai ona fa’afofoga o le fa’amasinoga i fa’afinauga a itu e lua, na tu’u atu ai loa e Sunia se poloaiga faapitoa i le itu a Siaumau ina ia nofo uta i ai. O lea tuutuuga faapitoa, e aofia ai le le mafai e Siaumau poo nisi o lona aiga ona talanoa i molimau a le malo poo latou aiga fo’i.

 

Na pau tagata ua faataga e le fa’amasinoga ona talanoa i molimau a le malo, o loia a Siaumau poo ana tagata suesue fo’i. Saunoa atili Sunia e fa’apea, afai ae alia’e i le taimi o le fa’amasinoga se fa’amatalaga mai se molimau e faapea sa taumafai Siaumau poo se isi o lona aiga e fa’afeso’ota’i atu i latou, ona i ai loa lea o se isi tulaga e ono tula’i mai i le ua molia.

 

IESE FA’ASAVALU

 

O le masina o Aperila o le tausaga nei lea ua fa’atulaga e faia ai le isi iloiloga o le mataupu a Iese Fa’asavalu, i le mae’a ai lea ona ia teena o tu’uaiga fa’asaga ia te ia i luma o le fa’amasinoga maualuga i le vaiaso na te’a nei.

 

O lo o tu’uaia e le malo ia Fa’asavalu i moliaga mamafa e lua o le gaoi atoa ai ma le ave fa’agaoi o ni mea totino sa tu’uina atu i lalo o lana va’avaaiga.

 

O le ali’i loia fautua lagolago ia Rob McNeill na tula’i mo Fa’asavalu i lana ulua’i iloiloga i le vaiaso na te’a nei, ae o le tama’ita’i loia sili lagolago ia Christy Dunn na tula’i mo le malo.

 

O lo o tu’uaia e le malo ia le ua molia i lona ave fa’agaoi lea o ni oloa mai se kamupani sa faigaluega ai, e pei o laupapa ma taga sima ae fa’atau atu mo ia lava.

 

E le o se taimi muamua lenei ua a’afia ai Fa’asavalu i le tulafono. I ni tausaga ua mavae atu, na molimau ma nofosala ai o ia i le fa’amasinoga i le moliaga o le umia fa’asolitulafono o vaega o le laau fa’asaina o le mariuana, ma poloaina ai loa o ia na te tuliina se fa’asalaga fa’a falepuipui e 20 masina i le toese i Tafuna, o se tasi lea o tuutuuga o lana nofovaavaaia e 5 tausaga.

 

Na osofaia e Leoleo le fale a Fa’asavalu i Aua ma maua ai se laau mariuana o lo o toto i tua o lona fale.