Ads by Google Ads by Google

Tala otooto o Fa’amasinoga


[ata: foa'i]
ausage@samoanews.com

SUI TAGO JR

 

Ua faaleaoga e le Fa’amasinoga Maualuga tuutuuga o le nofovaavaaia e 14 tausaga sa tuuina atu mo le susuga ia Sui Tago Jr, ae ua poloaina o ia e tuli le paleni o loo totoe o lana nofovaavaaia, ina ua fa’amaonia lona le usitaia o tuutuuga o lana nofovaavaaia sa tuuina atu e le fa’amasinoga.

 

O ni isi o tuutuuga o le nofovaavaaia a Tago Jr sa tuuina atu i le 2009, e le gata ia totogi lana salatupe e tusa ma le $5,000, alu e vaai le Ofisa Faanofovaavaaia i masina ta’itasi, ma ia aua fo’i ne’i ona toe solia se tulafono a le malo.

 

Na ta’utino Tago Jr i luma o le fa’amasinoga i le vaisao nei, ua ia le usitaia tuutuuga o lana nofovaavaaia. E le gata ua ia soli le tulafono, ae le’i alu fo’i e vaai le Ofisa Faanofovaavaaia, e lei totogiina fo’i lana salatupe.

 

O le vaiaso nei lea na tu’uina atu ai le fa’aiuga a le fa’amasinoga maualuga fa’asaga ia Tago Jr, ina ua fa’amaonia lona le usitaia o tuutuuga o lana nofovaavaaia. O le ali’i loia fautua lagolago ia Rob McNeill na tula’i mo Tago Jr, ae o le tama’ita’i loia sili lagolago ia Christy Dunn na tula’i mo le malo.

 

O le masina o Novema o le tausaga na te’a nei na faasala ai e le afioga i le ali’i Fa’amasino ia Elvis P. Patea ia Tago Jr e taofia i le toese mo le umi e 5 tausaga, ina ua ta’usala o ia i le moliaga o lona umia fa’asolitulafono o vaega o le pauta fa’asaina o le aisa.

 

Ina ua maua le avanoa o Tago Jr ma lana loia mai le fa’amasinoga, na talosaga ai McNeill ina ia fa’asala le ua molia i se fa’asalaga mama, e aofia ai le aua lea ne’i toe i ai se isi fa’asalaga fa’a falepuipui na te tuliina i le toese i Tafuna, ona o loo i ai fo’i le isi ana fa’asalaga e 5 tausaga o loo tuli i le taimi nei.

 

I le mataupu o le salatupe e le’i totogiina, na talosaga McNeill i le fa’amasinoga mo se avanoa e amata ai ona totogi e le ua molia lana salatupe. Sa ia faaali manino fo’i i le fa’amasinoga, e le o toe i ai se galuega a Tago Jr i le taimi nei e maua ai se tupe e totogi ai lana sala, ona o loo taofia o ia i le falepuipui.

 

Na taua e Tago Jr i luga o le nofoa molimau ina ua mae’a ona fa’atauto o ia, e tele faafitauli na tutupu i lona olaga ina ua magalo mai i tua i le tausaga e 2013, i le mae’a ai lea ona tuli o lana fa’asalaga fa’a falepuipui e 4 tausaga ma le 8 masina. O ni isi o ia fa’afitauli na tutupu e aofia ai le le toe maua o lana galuega sa galue ai i le Fono Faitulafono, atoa ai ma le maliu o si ona Tama ao taofia ai o ia i le toese.

 

Na ta’utino le ua molia, ua ia soli tuutuuga o lana nofovaavaaia, ma ua ia le usitaia fo’i le poloaiga e tatau ona totogi lana salatupe.

 

Na fesili le afioga i le alii Fa’amasino Sili ia Michael Kruse i le ua molia poo ai e totogia lana salatupe, ae na tali le ua molia, o lona Tina na te totogiina lana salatupe.

 

“Sa ou taumafai i le mea sili e gata ai lo’u malosi e saili sa’u galuega ina ua ou magalo mai i tua i le 2013, peita’i na ou fiu lava e saili se galuega ua le maua. Na ou manatu ai loa e sili pe a ou nofo i le fale e tausi si o’u Tina ua matua,” o le molimau lea a Tago Jr.

 

Saunoa Kruse ia Tago Jr, o ia o se tagata matua, ua 43 ona tausaga ae o lo o vaaia pea lava lona fa’amoemoe i lona Tina e tausia ma fafaga o ia.

 

Na faailoa e Kruse ia Tago Jr e fa’apea, afai o ia na fa’atinoina le solitulafono, e tatau fo’i ona ia sailia se tupe e totogi ai le salatupe, ae aua le tuua i lona Tina, e le o ia na fa’atinoina le solitulafono.

 

Ua faaleaoga nei e le fa’amasinoga tuutuuga o le nofovaavaaia a Tago Jr sa tuuina atu i le 2009, ma ua poloaina o ia na te tuliina le faasalaga faa falepuipui sa faamalumalu, tusa lea e 5 tausaga. Pau le tulaga fesoasoani ua ofo atu e le fa’amasinoga ia Tago Jr, o le a tuli fa’atasi lana fa’asalaga fa’a falepuipui e 5 tausaga o loo tuliina nei, ma lana fa’asalaga mai le nofovaavaaia lea ua fa’aleaoga.

 

O lona uiga, e mae’a fa’atasi lava le tuliina o fa’asalaga ia e lua a le ua molia, ma tatala ai loa o ia i tua mai le toese. Ae tusa lava pe magalo, ua fa’atonu e le fa’amasingoa ia Tago Jr ina ia totogi pea lana salatupe o loo totoe.

 

SOPI SENIO

 

E ui i taumafaiga a Leoleo e pu’e fa’apagota le ali’i o Sopi Senio, ona o se poloaiga mai le faamasinoga e pu’e fa’apagota ai o ia, ae ua toe tatalaina nei o ia i tua mai le toese i Tafuna, i lalo o se poloaiga mai le afioga i le ali’i Fa’amasino ia Fiti Sunia.

 

O le poloaiga e pu’e fa’apagota ai Senio, na mafua mai ina ua le auai o ia i le taimi na valaau ai lana mataupu i luma o le Fa’amasinoga Maualuga i le masina na te’a nei. O se tasi o tuutuuga na tatala ai i tua Senio, ia auai i soo se taimi e valaau ai lana mataupu.

 

Na taua e le loia a Senio ia Rob McNeill e fa’apea, na mafua ona le auai le ua molia i lana iloiloga, o le taimi tonu lava lea na manu’a ai o ia i le pulufana, e mafua mai i le fa’alavelave lea na fana ai o ia e se ali’i pagota i lona aiga i Leone i le tausaga na te’a nei.

 

Na talosaga McNeill i le fa’amasinoga mo se avanoa e toe tatala ai i tua Senio e fa’atali ai le isi aso o lana iloiloga, ona o popolega ina ne’i toe a’afia o ia i se isi fa’afitauli pe a toe taofia i le toese i Tafuna.

 

Na talia e Sunia le talosaga ma ia taua ai le atugalu o le fa’amasinoga i le saogalemu o Senio, ona o le fa’alavelave e pei ona manu’a ai o ia i se pulufana. Peita’i, afai e toe misi e Senio se isi aso o ana iloiloga ua fa’atulaga e le fa’amasinoga, o le a toe pu’e faapagota loa o ia ma taofia i le toese i Tafuna.

 

PIO ATONIO

 

O le aso 8 o Mati lea ua fa’atulaga e lau ai le fa’asalaga a le ali’i o Pio Atonio i luma o le fa’amasinoga maualuga, i le mae’a ai lea ona ia tali ioe i le moliaga o le umia fa’asolitulafono o vaega o le pauta fa’asaina o le aisa sa tu’uaia ai o ia e le malo.

 

O le ali’i loia fautua lagolago ia Rob McNeill na tula’i mo Atonio, lea o loo taofia pea i le toese talu mai le aso na pu’e faapagota ai o ia, ina ua le mafai ona totogi le tupe e $5,000 e tatala ai o ia i tua, ae o le tama’ita’i loia sili lagolago ia Christy Dunn na tula’i mo le malo.

 

I le tali ioe ai o Atonio i le moliaga o le umia fa’asolitulafono o le pauta o le aisa, sa ia ta’utino ai e fa’apea, i se taimi o le po o le aso 17 o Me, 2018, sa ia umia ai se paipa tioata o loo i ai vaega o le pauta fa’asaina o le aisa i totonu, ina ua saili e Leoleo lona tino.