SUI TAGO JR

O le aso Lulu o le vaiaso nei, o a taeao lea, ua fa’amoemoe e toe valaau ai le mataupu a le ali’i o Sui Tago Jr i luma o le Fa’amasinoga Maualuga, mo le fa’amaninoina o se mataupu o loo naunau le Fa’amasinoga e fa’amanino atu e loia a itu e lua o lenei mataupu.

O lea mataupu e pei ona saunoa i ai le afioga i le Fa’amasino Sili ia Michael Kruse i le vaiaso na te’a nei, pe i ai se eseesega i lalo mataupu tau Fa’amasinoga o le tupe o loo nofo aitalafu ai se tagata i le malo, ma le salatupe lea e poloaina e le fa’amasinoga se tagata ua ta’usala na te totogi i le fa’amasinoga.

Na mafua ona naunau Kruse e fia malamalama i se finagalo a loia e uiga i lenei mataupu, ona o le ali’i o Tago Jr, e i ai lana salatupe sa poloaina e le fa’amasinoga o ia e totogi ina ua faasala o ia i le 2009, peita’i e oo mai i le taimi nei e le’i totogiina lava.

O loo naunau le fa’amasinoga ina ia finau atu loia, pe i ai se avanoa e mafai ai ona faasala Tago Jr i le toese ona o lana salatupe ua le totogiina.

Na taua e le loia a le malo ia Christy Dunn e fa’apea, o loo manino le tulafono, soo se tagata e nofo aitalafu i le malo, e mafai ona molia lea tagata ma faasalaina i se faasalaga faa falepuipui.

“Ae faapefea la le tagata ua le mafai ona totogi lana salatupe sa poloaina e le fa’amasinoga e totogi, e mafai ona faasala i le falepuipui lea tagata”, o le fesili lea a Kruse ia Dunn. Na tali le Dunn e fa’apea, e i ai fo’i aiaiga i lalo o galuega fa’a faamasinoga e mafai ai ona faasala lea tagata, pe afai e faamaonia ua ia le usitaia poloaiga a le fa’amasinoga.

O Tago Jr na faasala e le fa’amasinoga maualuga i le masina o Novema na te’a nei ina ia nofosala i le toese mo le 5 tausaga, ina ua ta’usala o ia i le moliaga o le umia faasolitulafono o vaega o le pauta fa’asaina o le aisa.

Ina ua ta’usala e le fa’amasinoga ia Tago Jr i lea moliaga, na faamaonia ai loa lona le usitaia o tuutuuga o lana nofovaavaaia sa tuuina atu i le 2009, ina ua ta’usala o ia i le moliaga o le fesoasoani i se isi tagata e fa’atino le solitulafono o le gaoi.

CHUNG SE LEE

O le masinoga o Aperila lea ua fa’atulaga e toe valaau ai le mataupu a le ali’i o Chung Se Lee, ina ua faamaonia e le fa’amasinoga lona le usitaia o tuutuuga o lana nofovaavaaia sa tuuina atu i ni nai tausaga ua mavae, ina ua ta’usala o ia i le moliaga o le ave ta’avale fa’atautala ua mafua ai ona oo le maliu i se isi tagata.

O se tasi o tuutuuga o le nofovaavaaia a Lee e 5 tausaga, o le avea lea o ia ma tagatanu’u lelei e tausisi i tulafono a le malo i taimi uma.

I le masina o Ianuari na te’a nei, na ioeina ai e Lee i luma o le fa’amasinoga fa’aitumalo le solitulafono tau ta’avale afi o le ave ta’avale fa’atamala, ua mafua ai ona tupu se fa’alavelave tau ta’avale i le tausaga na te’a nei.

O lo o tatalaina pea i tua Lee e fa’atali ai le aso lea ua fa’atulaga e toe tula’i ai i luma o le fa’amasinoga.

PESEGA MALAEFONO

O le Tina e 52 tausaga le matua mai Aunu’u lea na tu’uaia i lona faaaoga o se laau e faaoolima ai i se alii e 16 tausaga le matua, ua molia nei o ia i le moliaga o le faaoolima i le tulaga tolu, faia o gaioiga e lamatia fai le saogalemu o fanau laiti, atoa ai ma le fa’atupu vevesi i nofoaga faitele.

O lenei fa’alavelave na tula’i mai i le afioaga o Aoloau i le aso 6 o Fepuari, 2019.

Na teena e Malaefono tu’uaiga fa’asaga ia te ia, ma ua tatalaina nei o ia i tua e fa’atali le isi ana iloiloga lea ua fa’atulaga mo le aso 7 o Mati, 2019.

O ni isi o tuutuuga ua tatala ai i tua Malaefono e le afioga i le ali’i Fa’amasino ia Elvis P. Patea, o le avea lea o ia ma tagatanu’u lelei e tausisi i tulafono i taimi uma, aua ne’i ona toe solia se tulafono, aua fo’i ne’i toe taumafai e fa’afeso’ota’i le ali’i na a’afia i lenei mataupu i soo se auala.

Na taua i fa’amaumauga a le fa’amasinoga e fa’apea, na fa’aaoga e Malaefono se laau e ta ai le tauau ma le ulu o le ali’i na a’afia, ma, e le o se taimi muamua fo’i lea ua ia faia ai lenei gaioiga i le tamaititi na a’afia. Ina ua fesiligia e Leoleo ia Malaefono, sa ia ta’utino ai e fa’apea, o lona ita i le ali’i na a’afia na mafua ai ona tula’i mai le fa’alavelave.

AH CHONG LEFATIA

Ua toe taofia nei i le toese i Tafuna le ali’i o Ah Chong Lefatia, ina ua le tula’i o ia i luma o le fa’amasinoga faaitumalo i le vaiaso na te’a nei mo lana mataupu. O se tasi o tuutuuga na tatala ai e le fa’amasinoga ia Lefatia i tua ina ua ia totogiina le tupe e $500, ia auai i soo se taimi e valaau ai lana mataupu i luma o le fa’amasinoga.

E tusa ai ma fa’amaumauga a le fa’amasinoga, o moliaga eseese o loo tu’uaia ai e le malo ia Lefatia e aofia ai ma le moliaga o le faaoolima i le tulaga tolu. Ina ua le mafai ona auai Lefatia i lana iloiloga, na sainia ai loa e le afioga i le ali’i Fa’amasino ia Elvis. P. Patea se poloaiga e pu’e faapagota mai ai o ia.

O le aso Faraile la na te’a nei na tula’i ai loa Lefatia i luma o le fa’amasinoga fa’aitumalo, ma ua taofia nei o ia i le toese i Tafuna, se’i vagana ua totogi le tupe e $1,000 ona fa’atoa mafai lea ona tatala o ia i tua e fa’atali ai lana iloiloga lea ua fa’atulaga mo le aso 22 o Fepuari, 2019.

NOFOVAAVAAIA LAFAELE MO LE 12 MASINA

E 12 masina lea ua faanofovaavaaia ai e le Faamasinoga Faaitumalo ia Siomia Lafaele, ina ua ta’usala o ia i le moliaga mama o le fa’atupu vevesi i nofoaga faitele.

Ina ua fesiligia Lafaele e fa’amatala i le fa’amasinoga le mea sa tupu i le aso na mafua ai ona molia o ia i le faamasinoga, na tali le ua molia, na te le o manatuaina lelei le faalavelave sa tupu, ona sa ova lona ‘ona i le taimi na tula’i mai ai le fa’alavelave.

E tusa ai ma fa’amaumauga a le fa’amasinoga, e fa’atolu ona molia Lafaele i le ave ta’avale ‘ona, atoa ai ma moliaga mama e aofia ai le fa’atupu vevesi i nofoaga faitele.

Na fa’ailoa e le afioga i le ali’i Fa’amasino ia Elvis P. Patea ia Lafaele e fa’apea, e i ai lona fa’afitauli i le tagofia o le ‘ava malosi e tatau ona foia. Afai e le foiaina lea fa’afitauli, e ono a’afia o ia i se isi fa’alavelave matuia i le lumana’i.

O nisi o tuutuuga o lana nofovaavaaia e aofia ai lona totogiina o le salatupe e $100 i totonu o le 60 aso.