Ads by Google Ads by Google

Tala otooto o Fa’amasinoga


[ata: foa'i]

MUSU FAILAUGA

 

Ua tuuina atu nei e le fa’amasinoga maualuga se tusi saisai e saili mai ai le tama’ita’i o Musu Failauga, ina ua le auai o ia i lana iloiloga sa fa’atulaga i le amataga o le vaiaso nei.

 

O le aso Gafua na te’a nei na fa’atulaga e tuuina atu ai se faaiuga a le fa’amasinoga fa’asaga ia Failauga, e tusa ai o lona le usitaia o tuutuuga o lana nofovaavaaia e 5 tausaga sa tuuina atu i le tausaga na te’a nei, ina ua ta’usala o ia i le moliaga o le umia fa’asolitulafono o fualaau fa’asaina o le mariuana.

 

O se tasi o tuutuuga o le nofovaavaaia a Failauga, o lona auai lea i ni aoaoga e fesoasoani ai i le fa’afitauli o lona tagofia o fualaau fa’asaina. Ae i se ripoti mai le Ofisa Faanofovaavaaia na faamaonia ai, e le o auai Failauga i le aoaoga e pei ona faatonu o ia e le fa’amasinoga e auai atu i ai.

 

Ina ua valaau lana mataupu i le vaiaso nei, na fa’ailoa ai e lana loia fautua ia Michael White, e i ai lona talitonuga ua sola ese Failauga ma le atunu’u.

 

O le fia malamalama atili o le afioga i le Fa’amasino Sili ia Michael Kruse e fa’atatau i le mataupu ia Failauga, na mafua ai ona ia fesiligia le Pulesili o le Ofisa Faanofovaavaaia mo se ripoti, ma fa’amaonia ai loa e le susuga a Malcolm Polu i le fa’amasinoga, o Failauga ua sola ese ma le atunu’u.

 

Na taua e Polu e fa’apea, o se imeli na ia maua mai i le Ofisa o Femalagaaiga a le malo, o lo o fa’amoania mai ai, o le aso 21 o Ianuari na te’a nei na tuua ai e Failauga le teritori.

 

O le mataupu fa’asaga ia Failauga na afua mai i se fa’alavelave na tulai mai i le ofisa o Leoleo i Tafuna i le aso 13 o Aokuso 2018, ina ua aga’i atu Failauga e fia talanoa i se tasi o Leoleo, ae tula’i mai ai ma se feeseeseaiga i le va o ia ma le Leoleo.

 

O lea eseesega na i’u ina taofia ai loa Failauga i lalo o le vaavaaiga a Leoleo, ona o tu’uaiga i lona save’uina lea o le filemu i nofoaga lautele. Ina ua saili e Leoleo le tino o Failauga, sa latou maua i ai se pepa iila o loo i ai lau mamago o le mariuana, faapea ai ma se paipa e fa’aaoga e ula ai le pauta oona o le aisa.

 

Sa maua fo’i i totonu o lana ato se tusi siaki o lo o i ai le igoa o le kamupani o le A & E Corporation, faatasi ai ma se fa’amaoniga e $180 le siaki na saini e le ua molia ma tala i se faleoloa i Nuuuli i le aso 3 o Aokuso.

 

I lalo o se maliliega na sainia e Failauga ma le malo, na ia tali ioe ai i le moliaga o le umia faasolitulafono o le fualaau fa’asaina o le mariuana, ae solofua le moliaga o le gaoi, ma faanofovaavaaia ai loa o ia e le fa’amasinoga mo le 5 tausaga.

 

AFASENE HUNKIN

 

E $5,000 le tupe lea ua fa’atulaga e le fa’amasinoga fa’aitumalo e tatala ai i tua le ali’i e 29 tausaga le matua, lea ua tu’uaia i lona fa’aaoga o se agaese e fa’aoo ai manu’a i lona nephew e 11 tausaga le matua.

 

O le vaiaso nei na tula’i ai Afasene Hunkin i luma o le fa’amasinoga fa’aitumalo, ma ia teena ai tu’uaiga fa’asaga ia te ia. Ua tu’uaia o ia e le malo i moliaga mama e 2 o le faaoolima i le tulaga tolu, atoa ai ma le faia o gaioiga e ono lamatia ai le saogalemu o fanau laiti.

 

Afai ae mafai e Hunkin ona totogi le tupe lea ua fa’atulaga e tatala ai o ia i tua, ua poloaina o ia e le fa’amasinoga e aua ne’i toe taumafai e fa’afesoota’i lona nephew na a’afia i lenei fa’alavelave, fa’asa ona ia toe soli se tulafono, a ia avea o ia ma tagatanu’u e tausisi i tulafono a le malo i taimi uma.

 

Ua poloaina fo’i o ia ina ia auai i soo se taimi e valaau ai lana mataupu, ma ia fesoota’i vavalalata ma lana loia fautua ia Ryan Anderson.

 

I le tagi a le malo o lo o taua ai e fa’apea, o le faaiuga o le vaiaso na te’a nei na tula’i mai ai lenei fa’alavelave i Leone, ina ua ausulusulu le tamaititi na a’afia i le fale o le isi aiga tuaoi mo se fesoasoani, ma ia fa’ailoa o lona uncle na fa’aoolima ia te ia i le agaese.

 

E lei umi se taimi ae taunu’u leoleo ma latou pu’e fa’apagota ai loa Hunkin i luma o lona fale, ma auina atu ai loa o ia i le ofisa o Leoleo. Na taua e le tamaititi na a’afia i Leoleo le faateia o ia ina ua ia vaaia lona uncle ua savali atu ia te ia ma se agaese.

 

Na muamua ona tu’i e le ua molia le tamaititi na a’afia, sosoo ai ma lona fa’aaoga o le pito mafolafola o le agaese ma ta ai le tino o le tamaititi na a’afia.

 

O lo o fa’agasolo pea i luma o le fa’amasinoga fa’aitumalo le mataupu fa’asaga ia Hunkin.

 

TELE’A VALAAU

 

Ua faila nei e le malo le moliaga mamafa o le ave ta’avale a o se’i le laisene fa’asaga i le ali’i o Tele’a Valaau. O lea solitulafono, o le vaega D lea o solitulafono mamafa, lea e mafai ona fa’asala ai Valaau i le toese mo le umi e le siliia i le 5 tausaga, pe fa’asala fo’i i le salatupe e le silia i le $5,000, poo le fa’asala fo’i i fa’asalaga uma ia e lua.

 

O le masina o Aokuso o le tausaga na te’a nei na ta’usala ai e le fa’amasinoga fa’aitumalo ia Valaau i le moliaga mama o le ave ta’avale ‘ona, ma faanofovaavaaia ai loa o ia mo le 12 masina i lalo o tuutuuga e fa’asa ona ia toe tagofia le ‘ava malosi, e le mafai fo’i ona ia toe fa’afoeina se ta’avale mo le umi e 6 masina lea ua se’i ai e le fa’amasinoga lana laisene.

 

I le masina na te’a nei, na tula’i mai ai se fa’alavelave tau ta’avale i Tafuna ina ua so’a e se pikiapu se isi ta’avale sa malaga atu ai se ulugali’i matutua. Na taunu’u Leoleo ma latou iloa ai, o le ave ta’avale o le pikiapu na mafua ai ona tula’i le fa’alavelave, o le susuga lea ia Valaau.

 

Na faailoa e Valaau i Leoleo, na mafua ona ia fa’afoeina le ta’avale, sa alu e piki mai fualaau e fa’ainu ai lona atali’i sa gasegase. Sa ia taua atili fo’i i Leoleo e fa’apea, sa ia iloaina lava e le tatau ona ia toe fa’afoeina se ta’avale i luga o le alatele mo le umi e 6 masina.