Ads by Google Ads by Google

Tala otooto o Fa’amasinoga

MERIKO LOMU

 

O le aso 8 Fepuari, 2019 ua fa’atulaga e le Fa’amasinoga Maualuga e lauina ai le fa’asalaga o Meriko Lomu ina ua ma’ea ona talia e le faamasinoga i le vaiaso ua te’a sa maliliega i le va o le ua molia ma le malo.

 

Lomu, 24 tausaga o lona soifuaga, e lua mataupu o lo’o molia ai o ia ma o nei tagi uma e ua a le malo e fa’atatau ia fualaau fa’asaina.

 

I le mataupu muamua, sa tali ioe ai Lomu i le moliaga o lona ona taulima ina o marijuana ma le fa’amoemoe e tulei atu i isi tagata. I le mataupu lona lua, sa tali ioe ai Lomu i le taulima ina o le pauta fa’asaina o le aisa ma le fa’amoemoe e tulei atu i isi tagata.

 

O nei moliaga uma e lua, o ni moliaga mamafa i lalo o le tuafono ma o le fa’asalaga e falepuipui i le le sili atu ma le 20 tausaga, sala tupe e $20,000 poo fa’asalaga uma e lua.

 

I le talia ai e le fa’amasinoga o le maliliega, ua solofua ai isi moliaga sa faila e le malo i latou tagi fa’asaga ia Lomu.

 

O le tali ioe o Lomu i lana mataupu muamua, sa ia tautino ai e fa’apea i le aso 15 Aperila, 2018 sa ia tauaaoina ai se taga o lo’o i ai marijana ma le fa’amoemoe e tulei atu i nisi. I le mataupu lona lua, ua ia tautino ai e fa’apea i le aso 15 Me, 2018 sa ia taulimaina ai ni taga iila o lo’o i ai le pauta fa’asaina o le aisa.

 

O moliaga fa’asaga ia Lomua sa ali’ae mai i se osofaiga a leoleo o ni fale e lua i Pago Pago ma maua ai fualaau fa’asaina i le tausaga ua te’a. O lo’o taua i le tagi a le malo, sa masalomia ia Lomu i lona fa’atauina atu i isi tagata o marijuana i Fagatogo.

 

O le ua molia e to’atolu i ai i latou sa taofia ma molia e le malo talu mai le osofaiga a leoleo. O le osofaiga sa fa’atautaia lea e Leoleo fa’a a’upegaina mai le vaega e Suesueina Fualaau Fa’asaina a le Matagaluega o Leoleo, lea na aga’i atu e fa’ataunu’u se poloaiga mai le Fa’amasinoga e saili ma su’e ai fale nei e 2, ona o lo o masalomia le fa’atauina ai o fualaau fa’asaina, le ituaiga o le aisa.

 

PUOVILI VILI

 

O se taule’ale’a sa taofia i le toese i Tafuna mo aso e 55 ina ua le mafai ona totogi le tupe fa’atulaga e le fa’amasinoga e tatala ai i tua, ua toe foi i tua i lona aiga ma le saunoaga a le afioga i le Fa’amasino ia Fiti Sunia sa fai i ai, “aua e te toe foi mai iinei”.

 

O le vaiaso ua te’a sa tulai ai le susuga ia Puovili Vili i luma o le Fa’amasinoga Fa’aitumalo mo le lauina o lana fa’asalaga ina ua ma’ea ona ia tali ioe i le moliaga mama o le save’uina o le filemu. O se moliaga o lona fa’asalaga e 6 masina i le falepuipui, $500 le sala tupe, po’o fa’asalaga uma e lua.

 

I le tali ioe o Vili i le moliaga, sa ia tautino ai e fa’apea ise taimi o le aso 22 Novema, 2018 sa ia fa’atupuina ai le vevesi i se vaega o le atunu’u i luma o se fale faigaluega. I lea taimi sa ova lona ona ma sa ia fa’alala solo se naifi.

 

O le ali’i loia fautua ia Ryan Anderson sa tulai mo le ua molia ma ia talosaga le fa’amasinoga ina ia fa’asala Vili i aso e 52 i le toese - o aso foi ia sa i ai le uma molia i le falepuipui e fa’atali ai taualumaga o lana matupu i le fa’amasinoga. Ua le gata i lea sa fa’ailoa foi e Anderson i le fa’amasinoga e leai se tulaga tele o se fa’afitauli i le ua molia i solitulafono i tausaga ua mavae.

 

Saunoa le afioga i le ali’i fa’amasino ia Sunia e fa’apea i fa’amaumauga a le fa’amasinoga e 55 aso talu ona taofia Vili i le toese ona o le fa’aletonu o ona pepa e mafai ai ona nofo i Amerika Samoa.

 

Ma o le taimi nei ua ma’ea on toe fa’afou lona ID, e fa’atoa ma’ea lona aoga ia Novema 1, 2019.

 

I le fa’aiuga a le fa’amasinoga sa fa’asalaina ai Vili i le toese - e fa’aaoga i ai aso e 55 lea na taofia ai i le falepuipui. Ua fa’atonuina foi le ua molia ina ia totogi le sala tupe e $100 ae le’i oo atu ia Fepuari 1, 2019.

 

Saunoa Sunia e fa’apea, o lo’o talosaga le malo ina ia fa’atonuina le ua molia e auai i aoaoga e taofia ai le ava malosi, ae peitai o le a le fa’atunuuina lea tulaga ona e talitonu le fa’amasino ua lava aso sa loka ai i le falepuipui e mafaufau ai le ua molia ia ana gaoigoiga.  Ua le gata i lea, e sefe mai ai tupe a le malo.

 

LOMU MOSESE

 

O le aso Faraile ua te’a sa tulai ai i luma o le Fa’amasinoga Maualuga le susuga ia Lomu Mosese, lea sa avea muamua ma leoleo, mo le isi ana iloiloga talu mai moliaga a le malo sa faila i le tausaga ua te’a fa’asaga ia te ia i mataupu eseese e lua.

 

O moliaga mamafa e lua fa’asaga ia Mosese e aofia ai le faia o gaioiga faasolitulafono, atoa ai ma le faalavelave i le molimau a le malo. O moliaga fa’asaga ia Mosese sa tulai mai i le taimi o avea o ia ma leoleo i le toese i Tafuna.

 

Ina ua valaau lana mataupu, sa fa’ailoa ai e lana loia fautua ia Rob McNeill i le fa’amasinoga e fa’apea ua ma’ea ona tauaaoina e Mosese fa’amaumauga o lenei mataupu mai le itu a le malo, fa’atasi ai ma se ofa a le malo e fa’amuta lenei mataupu. Ae peita’i sa saunoa le loia fautua ua sauni Mosese mo lana fa’amasinoga autu.

 

VOI SAUTIA

 

Ua i luma o le Fa’amasinoga Fa’aitumalo se tagi a le malo fa’asaga i le susuga ia Voi Sautia ona o lona faaaogaina o se sapelu (shovel) e sasa ai lona niece, i le taeao o le Tausaga Fou, Ianuari 1, 2019.

 

O lo’o molia Sautia i le moliaga mamafa o le fa’aoolima tulaga lua sa mafua mai i le fa’alalave na tupu ia Ianuari 1, 2019, a’o faia se igunapia a Sautia ma nisi o ana uo i luma o se fale.

 

E pei ona taua i fa’amaumauga a le fa’amasino, sa amata ona timu ona tulai lea o Satia ma ana uo ma o i totonu o le fale. I lea taimi o lo’o talanoa le niece ma lona aunty i luga o le telefoni. O le aunty o lo’o i fafo atu o le atunu’u. Ma e fa’alogo mai o ia i luga o le telefoni o lo’o pisa atu tagata i totonu o le fale.

 

O lea sa fa’ailoa ai e le aunty i lona niece ina ia fai ia Sautia e o ese mai totonu o le fale. Ma sa fa’ataunu’uina foi e le niece manoga o lona aunty ma ‘iu ai ina ita tele Sautia ma ia tago atu ai loa i le sapelu ma sasa ai le niece in lona papatua, ae le o iloa atu e lona niece.

 

O le taimi lona lua sa fa’ao’o ai e Sautia le sasa, ae tali mai e le niece i ona tulilima ma mafua ai manu’a i ona lima.

 

O le ta lona tolu a Sautia na misi, ona ua alu i le atoa i fafo le niece mai le fale agai atu i aiga tuaoi mo se fesoasoani ma fa’afesootai ai loa leoleo.

 

Ina ua taunu’u leoleo, sa latou talanoa ma niece. Sa valaauina foi le EMS mo se fesoasoani mo le niece.  Sa taumafai leoleo e saili Sautia i lea lava aso, ae fa’atoa maua ma i le aso na soso’o ai.

 

E $5,000 le tupe ua ma’ea ona fa’atulaga e le fa’amasinoga e tatala ai Sautia mai tua o le toese.