Ads by Google Ads by Google

Tala otooto o Fa’amasinoga


[ata: foa'i]
ausage@samoanews.com

PETELO AMITUANA’I

 

O le ali’i lea na tu’uaia e le malo i lona fa’aaoga o se agaese e fa’aoo ai manu’a i lona nephew ua ia ta’utino i le fa’amasinoga maualuga, e fa’amaonia tu’uaiga fa’asaga ia te ia.

 

O le susuga a Petelo Amituana’i, lea o lo o taofia pea i le toese i Tafuna ina ua le mafai ona ia totogi le tupe na fa’atulaga e tatala ai o ia i tua, na ulua’i tu’uaia e le malo i moliaga mama o le fa’aoolima i le tulaga muamua, le solitulafono e mafai ona fa’asala ai se tasi i le toese mo le umi e amata mai i le 10 tausaga e oo atu i le 30 tausaga le umi.

 

Ae i lalo o se maliliega na sainia e Amituana’i ma le malo, na ia malie ai e tali ioe i le moliaga ua toe teuteu e le malo, le solitulafono o le fa’aoolima i le tulaga lua, lea e mafai ona fa’asala ai se tasi i le toese mo le umi e le silia i le 5 tausaga, poo le salatupe e le silia i le $5,000, poo le fa’asala fo’i i fa’asalaga uma ia e lua.

 

I le tali ioe ai o Amituana’i i le moliaga e pei ona ta’usala ai o ia e le fa’amasinoga, sa ia ta’utino ai e fa’apea, i se taimi o le aso 30 o Mati o le tausaga nei, sa ia faaoolima ai i lona nephew e ala i lona fa’aaoga o se agaese e ta ai lona ulu ma manu’a tigaina ai o ia. Na taua atili le ua molia e fa’apea, na avea le vave o lona ita ma itu a ia fa’aaogaina ai loa le agaese sa uu i lona lima ma faaoo ai manu’a i lona nephew.

 

O lo o taofia pea Amituana’i i le toese i Tafuna ina ua le mafai ona ia totogi le tupe e $10,000 na fa’atulaga e tatala ai o ia i tua, e fa’atali ai le aso 19 o Ianuari o le tausaga fou lea ua fa’atulaga e lau ai lana fa’asalaga.

 

MAEA FILIPO

 

O se tasi o ali’i e to’atolu i ai pagota o loo tu’uaia i le sosola i tua ma le toese i le ogatotonu o le tausaga nei, ua mae’a nei ona sainia sa latou maliliega ma le malo ma le fa’amoemoe e fa’amuta ai le mataupu o loo tu’uaia ai o ia.

 

E 3 tagi eseese a le malo o loo faila fa’asaga ia Maea Filipo. I le tagi muamua a le malo, o loo molia ai Filipo i le moliaga mamafa o le gaoi atoa ai ma le talepe fale. I le tagi lona lua a le malo, o loo tu’uaia ai Filipo i moliaga mamafa e 4 o le gaoi, faapea ai ma le moliaga e tasi o le talepe fale. I le tagi lona tolu o loo tu’uaia ai e le malo ia Filipo, i le moliaga mamafa e tasi o le sola ese mai le toese i Tafuna.

 

I le maliliega lea ua sainia e le malo ma Filipo, ua malie ai le ua molia e tali ioe i le moliaga mamafa o le gaoi o loo i le tagi muamua. Ua ia malie fo’i e tali ioe i le moliaga mamafa o le gaoi ma le talepe fale i le tagi lona lua.

 

I le tali ioe ai o Filipo, sa ia ta’utino ai e fa’apea, i se taimi o le aso 7 o Ianuari 2018, sa ia osofaia ai se faleoloa i Tafuna ae gaoi telefoni o le Samsung Galaxy Note 7 tablet e silia i le $100 lona tau aofa’i. Sa ia ta’utino atili fo’i e faapea, i se taimi o le aso 22 o Tesema, sa ia ulufale faamalosi ai i totonu o se faleoloa i Iliili ma gaoi ni oloa mai totonu e aofia ai se computer, laptop, telefoni ma isi oloa e alu i le uila e silia i le $100 lo latou tau aofa’i.

 

I le talia ai e le fa’amasinoga o le maliliega na sainia e Filipo ma le malo, na talosaga ai loa le malo ina ia solofua le moliaga o le sola ese mai le toese o loo i le tagi lona 3 sa latou fa’aulu fa’asaga i le ali’i ua molia, atoa ai ma isi uma moliaga o loo totoe ai i le tagi muamua ma le lua sa latou faaulu fa’asaga ia Filipo.

 

O loo taofia pea Filipo i le toese ina ua le mafai ona ia totogi le $20,000 sa fa’atulaga e tatala ai o ia i tua, e fa’atali ai le aso 16 o Ianuari o le tausaga fou lea ua fa’atulaga e lau ai lana fa’asalaga.